Wp/mwv/Sikerei

Sikerei rakuana iate dukun kapulau mentawai. Rapatuna sikerei sibara puagaijan. Raangkat ia ibailiu sikerei rabara aken punen taddek. Kamentawai sikerei iate puagaijan, raagai masilaggek simabesik. Kalulun puagaijanna sikerei rakua ia sirimanua simapenting ka mentawai. Sikerei ibailiu sipasilaggek, utek punen ka uma mentawai. Bara besik isalagi tubuh rakau agotna lakok ibeteina sikerei. Sibara besik isailagi simagre raale aken samba rabara aken punen simagre. Sikerei kamentawai iagai leuk ijokjok ketcat sikataik isailagi tubu simabesik, sikerei rakuana iagai leuk iak punu teteu samba paruruk ka sanitu.

Puenunganan Ibailiu Sikerei

Puagaijan sikerei tak malangen ibara, maata puenunganan samba ujian ralewati ibailiu sia sikerei. Calon sikerei igelai katukoloban lakok-lakok agot, rabara aken leuk ritual, punen adat, urai sikerei samba leuk turuk sikerei. Kaberen ibara agai calon sikerei kalulun pasigelai ia ka sikerei sikamata elek sikerei sikembukan rakua ia sipuumat. Sipuumat nek igelai aken samba ipanturi calon sikerei puagaijan samba leuk pasialak agot. Kanak naagaian en lakok agot ragelai aken ia incak arat sabulungan iobak iagai paruruk kapunu teteu siburuk. Iagai raparuruk pasamba kanpunu teteu ia te ka urai samba leuk muturuk. Calon sikerei igelai muurai samba muturuk, naagaian kabeberen sigelaina, sipuumat matonem an bagana ka calon sikerei, rakau bara aken punen sikamata pasisilok sikerei sibau.

Kasilak oinan, lepak punen sikamata sambek lek moi ipakei luat sikerei siabau nek samba moi an leuk ibailiu utek kapunen pasilanggek simabesik. Obak iagai keberenna sikerei sibau masigelai peuk incak ia. Kabagan pasi imok punen si kadua sikerei sibau matarek tubu samba leuk patuanna, sikerei sibau nek mukeikei samba kau imatarek sainak samba manuk simaigi. Punen sikadua nek maigi peuk karajona, iate rakau taddat tubu elek liat tadde, kabeberen anggota uma patandek sia kapunen puangkakat baga. Sikerei sibau kapunen si kadua nek tak moi ipakei ngaleu elek bagei-bagei. Sikerei siburuk lek moi ipakei kaberen pakake kanak rabara aken punen. Dua gogoina rabara aken punen kaddut alaket. Kapunen nek sikerei sibau moi an ipakei kabeberen ngaleu pasamba leuk gelang. Kabagan punen rasogai kaberen sikerei, soibokna sikerei nek mutarian sia teret iali siobun. Lepak punen nek sikadua rabara aken incak tuktuk punen, rakauan jen leccu katandak sikerei. Punen sikatai nek rakuana punen alup, ia nek punen sabeu, kaberen kokomen rabara aken simaigi.

Soibokna sikerei sibau rauji incak ia ipandere bo aluten, kasia matonem baganda kanak maeruk paraboatna sikerei sibau tak ilabok tandak na aluten. kapunen nek rabara aken pangande monga kaberen simerei muturuk sia, utek punen iate sipaumat. Rapakei leuk manai kakabeira, kabagan turukra sikerei ratiboi aken puenunganan barana calon sikerei pak aili ia sikerei paserang ia ka ketcat pagetta sabbau, rakua nia iate ukkui Sikerei elek punu teteu Sikerei. Puenunganan ratanda barana kapulanggajan sikerei sibau, raenung kasopak pasamba muurai sia. Kapuenunganda pangande sia mongan sopak, kanak raserang mongan sopak muari sia pasamba muturuk. Ralepak aken muenung kanak naserang an sikerei sibau lelengan pagetta sabbau. Lepak sikerei sibau naserang an pulelengan pagetta sabbau ikau tiddou panindogat lepak en toili sia incak kapulanggajan sikerei sibau. Toili sia rakau leuk incak muturuk raali kapulanggaijan abelek an matam sulu. Ia nek rakuana harapan sibau, puangkakat baga kapurimaniaijan samba ka karajona sikerei sibau.