Wp/mwv/Punen Kamateijan ka Mentawai

Pasitanda

Punen kamateijan iate punen pureureu baga kalulun aragalak aken nan sia sarainanda kapolak. kabagan arat suku mantaoi kamateijan rarubei dua iate kamateijan simeru sambak kamateijan sikataik. Kamateijan simeruk iate kamateijan kalulun besik. Sikadua kamateijan sikatai iate kamateijan kalulun malelep kaoinan, nasaksak loingak samba leuk simatei akenen. Kanak bara situtatak ranau aken tuddukat eki punau loiba. Tuddukat iate alat pasisegek aken sibabara kasirimanua bagei. Punau loiba ratiboi aken sabe matatak samba leuk rura situtatak.

Titiboan

Punen kamateijan ratanda aken kanak alepakan arapasiratei aken. Ratando ritual pasisoso iate pasinemnem tubunda ka tirik sopak, katokolobanna nek iate pasibarasi aken tubu iobak ketcat situtatak tak itutu siabelek tak isalagi sia kabagan punen. Lepak raali uma sia kabagan punen peuk, kapunen pasibarasi aken tubu ka ketcat sikataik, kabagan ritual pasasai aken tubu, sikerei ibailiu utek punen, lepak iakek lakok mumunen kasia sibangkat punen situtatatak. Soibok na indak peuk ritual rakua onina pasibaga alaket. Sikerei samba leuk puagaijanna masirop ketcat ialak pukayoana, makerek leuk ketcat igalak aken tubu masamba leuk raoni ketcat iate bajou pukayoan. Tubu pukayoan sigalak aken ketcat ibailiu pukayoan uma. Kaberen anggota uma kabagan purereu baga peuk sia. Rasegek ka punen eeruk elek panunggru. Tando pureureu baga rabukak samba rapakoirek ngaleu simasun rapakei. Reu pureureu baganda raiak aken putarek baganda ratando incak punen panunggru, punen nek iali telu langgokna elek murura pek rabara akenna. Kanak Amatarek an sia rakau paruruiki punen, siutek akenen punen iate sikembukan uma. Kaberen keluarga rasogai sia ratarek aken simapalaru kapunen iate kokomen sagu, kan, bagok toiten, ombuk, ngangaik samba leuk manuk kau sainak.

Lepak aramatarek, punen panunggru moi an ratandana, punen panuggru nek iate punen pasiikhlas aken situtatak ka keluarganda.