Wp/mui/Teknologi

Tèknologi itu iolah sekómpólan teknik, keterampilan, metode samo prosès yang digunoke untuk ngasilke barang dan jasa. Kato teknologi asal mulonyo dari baso Yunani kunó technología (τεχνολογία), yang kesósón dari duó kato: téchnē (τέχνη) retinyo seni, kerajinan, keterampilan, samo lógos (λόγος) retinyo ilmu atawa teori. Jadi, reti tèknologi secaro ringkas iolah risalah berseni tentang seni atau sains. Di jeru baso Yunani Helenistik atau Koiné (kiro-kiro 300 SM) kato ini kadang-kadang digunoke untuk ngambarke perlakuan sistematis untuk tata baso samo retorika.

Bentók tèknologi yang palèng sederhano iolah peralatan dasar yang digunoke olè manusio untuk ngawéke apo bae. Mulak'i dari jaman prasejarah abés ditemukenyo caro memanfaatke api, terus masuk ke Revolusi Neolitikum, manusio punyo kendali besak untuk ngaturi sumber makanannyo dengen peralatan. Ditambah dengen ditemukenyo roda, bantu manusio untuk bepegian samo ngendalike lingkungannyo. Di jaman seterusnyo, perkembangan tèknologi pecak mesin cetak, télépón malah bikin manusio pacak salèng bekabaran dari jarak yang lebéh jauh.

Sejarah tèknologi

Jaman dimano pas ditemukenyo api itu jadi titik awal pejalanan èvolusi tèknologi umat manusio. Tanggal pasti ditemukenyo api memang idak diketahui secaro pasti. Tapi ado bukti-bukti kuat dari wong-wong arkéolog, diantarnyo adonyo sisa tulang binatang yang kebakar di wilayah situs sejarah Cradle of Humankind, sekitar 50 kilometer barat dari Johannesburg, nunjukke kalo penggunoan samo pemanfaatan api suda digawéke sejak 1 juta taun sebelóm mak ini ari. Komunitas ilmiah hamper sependapat galo pas mempertimbangke kalo Homo èrèctus ngendalike api sekitar 500.000 sampe 400.000 taun yang lalu.

Api di bakar make kayu, dijadike areng. Panas dari api tadi memungkinke manusio pertamo pacak masak makanan dio sambèl ningkatke daya cerna, pengawetan, samo nilai gizi makanan. Kemajuan teknologi laénnyo dibikin selamo Jaman Paléolitikum iolah munculnyo pakèan samo tempat tinggal. Pakaèan diambék dari bulu samo kulit binatang buruan.

Inovasi

Mak ini ari, tèknologi sudah bekembang dengen pesatnyo, saking banyaknyo inovasi dari pakarnyo ditambah memang ado untuk kebutuhan idup manusio. Beberapo dekade terahir tèknologi èlèktronik suda jadi bagian yang dak pacak dipisahke dari keidupan sari-ari dan ngubah gayo idup manusio secaro radikal. Beberapo contoh tèknologi èlèktronik kontèmporèr mak ini ari iolah; tèlèvisi digital (inovasi make modulasi digital samo sistem kompresi untuk nyiarke sinyal gambar, suaro samo data ke tèlèvisi), layar LCD (teknologi dari kristal caér yang diaplikasike ke layar ponsel, tv, dan yang laénnyo, singgonyo layarnyo lebéh tipis samo lebéh ringan), bioskop 3D, kamera (perangkat fotografi), samo sistem navigasi satelit (pacak deteksi posisi wong dimano bae dio tegak di planet ini).

Pengaruh tèknologi

Tèknologi punyo peran penténg semisal biso bantu ngembangke èkonomi sikok negara jadi lebéh maju, termasók èkonomi global mak ini ari. Tapi ado banyak jugo proses teknologi yang ngasilke produk sampéngan yang idak nak dipake, dikenal dengen polusi dan nguras sumber dayo alam sampé ngrusak lingkungan. Disampèng itu perdebatan filosofis tentang perkembangan samo penggunoan tèknologi muncul dari sejak revolusi industri, dengen pertimbangan apo iyo nian tèknologi pacak ningkatke kondisi manusio jadi lebéh makmur atau sebaliknyo malah bikin nambah saro idupnyo.

Bacoan lanjutan

1. Basalla, George. (1988). The Evolution of Technology[1]. Cambridge University Press. isbn = 9780521296816
2. Donze, Pierre-Yves. (2016). Industrial Development, Technology Transfer, and Global Competition: A history of the Japanese watch industry since 1850[2]. Taylor & Francis. isbn = 9781317226338
3. More, Charles. (2002). Understanding the Industrial Revolution[3]. Routledge. isbn = 9781134670079