Wp/mui/Kesultanan Pelémbang Darussalam

From Wikimedia Incubator
< Wp‎ | mui
(Redirected from Wp/mui/Kesultanan Pelèmbang Darussalam)
Wp > mui > Kesultanan Pelémbang Darussalam

Kesultanan Pelémbang Darussalam itu sikok dari negeri kesultanan di Indonesia yang pusatnyo ado di kuto Pelémbang, Sumatra, Indonésia. Negeri ini diproklamasiken taón 1675 oléh Sultan Abdurrahman (édop 1659–1706) dan dibubarken oléh pemeréntah kolonial Belando tanggal 7 Oktober 1823. Di taón 1825, rajonyo yang terakhér, Sultan Ahmad Najamuddin, ditangkep, abés tu digawak ke pengasingan di Banda Néira, Maluku.

Riwayat[edit | edit source]

Penegak'an[edit | edit source]

Tiruan singgasana Sultan Pelémbang.

Amen uji Kidung Pamacangah samo Babad Arya Tabanan[1] sikok dari wong ningrat Kediri, Arya Damar "bupati Pelémbang" mélok pasukan Gajah Mada, patih Majapahit naklukken Bali taón 1343. Uji ahli sejarah C.C. Berg, Arya Damar ini caknyo wong yang samo baé dengen Adityawarman.[2] Pelémbang déwék ado disebut di naskah Nagarakretagama jadi sikok dari wilayah taklukan Majapahit. Gajah Mada pulo ado ngomong dalem Pararaton amen Pelémbang masók wilayah yang dio taklukken.[2]

Sikok kronik Cino Chu-fan-chi yang ditólés Chou-Ju-Kua taón 1178 tetólés kato Pa-lin-fong, ceto nian amen yang dimaksud ini jolah Pelémbang. Taón 1513-an, Tomé Pires wong Perenggi ngelaporken amen Pelémbang, sikok dari kerajoan yang dialingi pemimpin dari Jawo mélok ngirimken pasukan dengen Kesultanan Demak buat ngepung Melaka yang lah diembék Perenggi. Di taón 1596, VOC tecatet nyerang Pelémbang. 1659-an, namo Sri Susuhunan Abdurrahman lah tecatet jadi penguaso Kesultanan Pelémbang. Catetan hubungan dengen VOC lah ado sejak taón 1601.[3]

Keraton Kuto Gawang[edit | edit source]

Di mulo abad ke-17, Pelémbang jadi sikok dari pusat ngembangken Islam di Indonesia. Kesultanan ini ditegakken oléh Ki Gede ing Suro, sikok dari wong ningrat dari Kesultanan Demak, yang ngungsi ke Pelémbang buat ngélak dari babak-bingkas di Demak lantak mangkatnyo Sultan Trenggana. Di sebelah utaro (ilir) Sungi Musi, dio negakken gedóng kraton yang dinamoi Kuto Gawang. Tempat Kuto Gawang bingén mak'ini lah jadi komplek PT Pupuk Sriwijaya di 2 Ilir. Lokasi kraton ini strategis nian; tecuguk di parak sungi besak yang jadi tempat wong-wong liwat. Kuto Gawang dipageri dengen gedék kayu, 290-an rijnlandsche roede (1093 meter) lebar samo panjangnyo. Tinggi gedék kayu ini lebéh dari 7 meter. Di seberang ulunyo, ado Plaju samo Pulo Kemaro.[4]

Sketsa Kuto Gawang sempet digawéke oléh Joan van der Laen taón 1659. Dari sketsa ini pacak diciréni sikok kuto begedék yang dibela Sungi Rengas dari utaro ke selatan, tecuguk di pinggir Sungi Musi. Parak ke arah timur ado Sungi Taligawé, sedangken parak ke arah barat ado Sungi Buah. Tenga-tenga Kuto Gawang ado gedóng pecak istana (amen idak mesjid), tetegak di sebelah barat Sungi Rengas. Wong jabo, pecak Cino atawa Perenggi, berompok di seberang Sungi Musi, pinggir barat Sungi Komering (mak'ini Seberang Ulu, Plaju).[4]

Taón 1659, Kuto Gawang ditunu abés oléh wong Belando dari VOC. Susuhunan Abdurrahman mindaken singgasananyo ke Beringin Janggut.[4]

Kraton Beringin Janggut[edit | edit source]

Kraton Beringin Janggut ditegakken di parak daérah Mesjid Lamo (mak'ini Jalan Segaran). Katék catetan makmano bentuk samo sebesak apo Kraton Beringin Janggut ini.[4]

Daérah sekiteran Kraton Beringin Janggut rami lantak kanal-kanal samo sungi-sungi: ado Sungi Musi di selatan, Sungi Tengkuruk di barat, Parét Penédan di utaro, samo Sungi Rendang/Karang Waru di timur. Parét Penédan ini tesambung dengen parét Kemenduran, Kapuran samo Kebon Duku. Jaringan kanal ini jadi moda transportasi utama wong-wong di Kesultanan Pelémbang jaman itu.[4]

Kraton Kuto Tengkuruk[edit | edit source]

Pas jaman pemeréntahan Sultan Mahmud Badaruddin I, Kuto Tengkuruk dengen besak 50 hektar jadi pusat utama Kesultanan Pelémbang. Kraton Kuto Tengkuruk bebatesan dengen Sungi Kapuran (mak'ini Pasar Cindé) di utaro, Sungi Tengkuruk River di timur (yang mak'ini jadi komplek Pupuk Sriwidjaja Palembang), Sungi Musi di selatan, samo Sungi Sekanak (jugo dinamoi Sungi Lambidaro 36 Ilir) di barat. Penando Kraton Kuto Tengkuruk itu gedóng bekawah tengkurep Mesjid Agung samo Istana Kuto Batu/Kuto Tengkuruk.[4]

Kraton Kuto Besak[edit | edit source]

Lawang Kuto, lawang utamo Kuto Besak.

Jamannyo Sultan Muhamad Bahaudin meréntah dari taón 1776 sampé 1803, Kraton Kuto Besak ditegakken. Mak'ini Kuto Besak masé ado di Pelémbang. Kraton ini kraton paléng besak yang pernah ditegakke oléh Kesultanan Pelémbang. Kuto Besak tecuguk di arah barat Kuto Tengkuruk. Panjang Kuto Besak itu 288.75 meter, lébar 183.75 meter, tinggi 9.99 meter, dengen tebel gedék 1.99 meter. Di segalo ujungnyo ado bastion. Jalan masuk kuto ini ado di sebelah timur, selatan, samo barat. Lawang paling utamo itu yang lawang selatan; inila yang galak dikatoken wong itu Lawang Kuto. Lawang yang idak pulo gerot dinamoi Lawang Buratan, cumen mak'ini siso sikok baé di sebelah barat Kuto Besak.[4]

Lantak Perang Ménténg 1821, yang dipélok'i pengapusan Kesultanan tanggal 7 Oktober 1823, Kraton Kuto Tengkuruk diancurratoken. Di pucuk Kuto Tengkuruk yang lah babat-bindat, gedóng anyar ditegakke oléh van Sevenhoven; kagéknyo gedóng ini jadi rompok Regeering Commissaris. Mak'ini gedóngnyo lah jadi Musium Sultan Mahmud Badaruddin II.[4]

Kesultanan mak'ini[edit | edit source]

Taón 2003, Majelis Musyawarah Adat Kesultanan Pelémbang Darussalam ngelantik Raden Muhammad Syafei Prabu Diraja jadi Sultan dengen gelar Mahmud Badaruddin III. Pelantikannyo di Mesjid Lawang Kidul, parak makam Sultan Mahmud Badaruddin I (meréntah 1724–1756).[5]

Sultan-sultan Pelémbang[edit | edit source]

  • Sri Susuhunan Abdurrahman (1659–1706)
  • Sultan Muhammad Mansyur Jayo Ing Lago (1706–1718)
  • Sultan Agung Komaruddin Sri Teruno (1718–1724)
  • Sultan Mahmud Badaruddin I Jayo Wikramo (1724–1757)
  • Sultan Ahmad Najamuddin I Adi Kusumo (1757–1776)
  • Sultan Muhammad Bahauddin (1776–1803)
  • Sultan Mahmud Badaruddin II (1804–1812, 1813, 1818–1821)
  • Sultan Ahmad Najamuddin II (1812–1813, 1813–1818)
  • Sultan Ahmad Najamuddin III (1821–1823)
  • Sultan Mahmud Badaruddin III, Prabu Diradja Al-Hajj (2003–2017)[5]
  • Sultan Mahmud Badaruddin IV, Djaya Wikrama RM Fauwaz Diradja (2017-mak ikak)[5]

Rujukan[edit | edit source]

  1. Darta, A.A. Gde, A.A. Gde Geriya, A.A. Gde Alit Geria, (1996), Babad Arya Tabanan dan Ratu Tabanan, Denpasar: Upada Sastra.
  2. 2.0 2.1 Berg (1985)
  3. Kartodirdjo, Poesponegoro, & Notosusanto (1975), hlm. 46
  4. 4.0 4.1 4.2 4.3 4.4 4.5 4.6 4.7 "Kuto Besak Fort". Melayu Online. https://web.archive.org/web/20171116190220/http://melayuonline.com/eng/history/dig/412/kuto-besak-fort
  5. 5.0 5.1 5.2 "Latar belakang sejarah Kesultanan Palembang Darussalam." Kesultanan Palembang Darussalam. https://web.archive.org/web/20200815082021/https://sultanpalembang.com/latar-belakang/. 2017. Disanjo 19 November 2017 Cite error: Invalid <ref> tag; name "mod" defined multiple times with different content

Bibliograpi[edit | edit source]

  • Berg, C.C. (1985). Penulisan Sejarah Jawa. Jakarta: Bhratara.
  • Kartodirdjo, Sartono; Poesponegoro, Marwati Djoened; Notosusanto, Nugroho (1975). Sejarah nasional Indonesia: Jaman pertumbuhan dan perkembangan kerajaan-kerajaan Islam di Indonesia. Departemen Pendidikan dan Kebudayaan.