Jump to content

Wp/mui/Bumi

From Wikimedia Incubator
< Wp‎ | mui
Wp > mui > Bumi
Foto Bumi dari luar angkasa yang diambek olé Appolo 17 waktu 7 Desember 1972

Bumi itu planét ketigo dari Matoari yang jugo jadi planét tebesak kelimo di sistem tata surya dengen diaméter 12.700 km. Bumi kadang disebót jugo dengen dunio atawa planét biru (keno kalo dijingok dari luar angkasa kejingokan hampér pecak warno biru galo) dan sikok-sikoknyo ni la benda langit yang suda tau dijerunyo cocok untuk keidupan. Dari awal mulo kebentók sampé mak ini ari bumi suda berumur kiro-kiro 4,54 miliar taun, nurut penanggalan radiométrik. Bejalan cak 1 miliar taun abes kebentók, keidupan mulak'i muncul di lautan, yang awalnyo dari perkembangbiakan organisme anaérob terós ke aérob dan nyebar sampé ke permukaan bumi.

Komposisi Bumi

[edit | edit source]

Lapésan paléng luar Bumi disebót kerak Bumi, iolah lapésan yang ringan tapi agak kaku dengen bemacem-macem ketebalannyo. Ado duo macem kerak bumi, pertamo kerak benua yang ketebalannyo rato-rato sekitar 35 km, kepadatannyo 2,2 sampé 2,9 g/ cm³. Keduo, kerak samudra yang rato-rato tebalnyo kiro-kiro 8 km, kepadatan 3,3 g/ cm³. Aman kerak bumi berisi 95% batuan beku samo 5% batuan sedimen, sementaro di kerak samudera tadi batuan penyósónnyo sebagian besak iolah batuan gabro samo basalt.

Lapisan luar bumi tebagi jadi beberapo lémpéng téktonik yang ngalami pergerakan nglintasi permukaan bumi selamo jutaan taun. Sekitar 71% permukaan bumi ketutup olé banyu termasók la; samudra, laut, teluk, danau, sungi, dan sisanyo 29% diisi olé benua-benua samo pulau-pulau.

Antara inti samo kerak bumi ado mantel bumi yang dominasi isinyo iolah besi, silikat samo oksida yang kayo magnesium. Ketebalannyo antara 2800 nyampe 2900 km. Kepadatannyo dewek lebéh tinggi daripada kerak bumi rato-rato 3,5 sampae 5 g/ cm³ dan makin jeru makin padat. Jao lebéh jeru lagi ado inti bumi. Tebagi jadi duo, inti dalam yang padat samo inti luar yang caér. Struktur inti dalam itu padat keno sakéng besaknyo tekanan disano dengen ketebalan kiro-kiro 2.500 km. Sementaro inti luar punyo ketebalan 2.200 km. Arus konveksi yang dihasilke dari inti Bumi terós mancar keluar jadi medan magnet Bumi.

Orbit dan Rotasi

[edit | edit source]

Di luar angkaso, bumi berinteraksi kedengen Matoari samo Bulan. Bumi ngelilingi Matoari lewat sikok orbit kiro-kiro sebanyak 365,25636 kali yang kalo di Bumi jadi dasar untuk nentuke waktu setaun. Selaen itu Bumi jugo muteri porosnyo selamo sari waktu sideris (23 jam 56 menit 4,091 detik), yang jadi dasar waktu sari semalam di Bumi. Keno Bumi tadi muternyo belawanan samo arah jaróm jam dari kutub utara, mako olé wong yang ado di permukaan bumi ni kapan dio mantau benda langit laénnyo pecak bintang, planet, matoari apo dak bulan jadi kejingoan terbit dari sebelah timur, terbenamnyo di sebelah barat.[1]

Jarak Bumi ke Matoari rato-rato nyampé 150 juta km dan kecepatan Bumi ngelilingi Matoari iolah 29,783 km/ s. Bumi sekali ari akan nyampé perihelion di orbitnyo (tempat paléng parak dengen Matoari) sekitar 3 Januari, terus ado di titik aphelion (titik di orbit paléng jao dari Matoari) sekitar 4 Juli.

Siko-sikonyo satelit alam yang dipunyo bumi iolah Bulan, benda langit yang lahér abés bumi kebentuk. Interaksi gravitasi dari Bulan ke Bumi nyebabke terjadinyo pasang laut,[2] ngimbangi keméréngan sumbu bumi, terus jugo secaro betahap ngakibatke rotasi bumi jadi lebéh lambat.[3]

Réferénsi

[edit | edit source]
  1. Lumen Learning [1] Diakses pada 29 Juni 2021.
  2. sci Jinks.[2] Diakses pada 29 Juni 2021.
  3. The Conversation.[3] Diakses pada 29 Juni 2021.