Wp/mnc/ᠪᡝᡤᡳᠩ ᡥᠣᡨᠣᠨ

ᠪᡝᡤᡳᠩ ᡥᠣᡨᠣᠨ (ᠨ᠋ᡳᡴᠠᠨ ᡤᡳᠰᡠᠨ: 北京) ᠰᡝᡵᡝᠩᡤᡝ ᠶᡠᠸᠠᠨ ᡤᡠᡵᡠᠨ᠈ ᠮᡳᠩ ᡤᡠᡵᡠᠨ᠈ ᡩᠠᡳᠴᡳᠩ ᡤᡠᡵᡠᠨ ᠵᠠᡳ ᡩᡠᠯᡳᠮᠪᠠᡳ ᠨᡳᠶᠠᠯᠮᠠ ᡳᡵᡤᡝᠨ ᡠᡥᡝ ᡥᡡᠸᠠᠯᡳᠶᠠᠮᠪᡠᡵᡝ ᡤᡠᡵᡠᠨ ‍ᡳ ᡤᡝᠮᡠᠨ ᡥᡝᠴᡝᠨ᠉

ᠪᡤᡳᠩ ᡥᠣᡨᠣᠨ᠈ ᡧᠣᠯᠣᡴᠣᠨ ᡤᡝᠪᡠ ᠪᡝ ᡤᡳᠩ ᠰᡝᠮᡝ᠈ ᠨᡝᠨᡝᡥᡝ ᡤᡝᠪᡠ ᠪᡝ ᠪᡝᡦᡳᠩ ᠰᡝᡥᡝ᠉ ᠪᡝᡤᡳᠩ ᠣᠴᡳ ᠵᡠᠩᡥᡡᠸᠠ ᠨᡳᠶᠠᠯᠮᠠ ᡳᡵᡤᡝᠨ ᡠᡥᡝ ᡥᡡᠸᠠᠯᡳᠶᠠᠮᠪᡠᡵᡝ ᡤᡠᡵᡠᠨ  ᡳ ᡤᡝᠮᡠᠨ ᡥᡝᠴᡝᠨ ᠪᡳᠮᡝ ᡨᠣᠨᡩᠣ ᡴᠠᡩᠠᠯᠠᡵᠠ ᡥᠣᡨᠣᠨ᠈ ᠣᠴᡳ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡩᠠᠰᠠᠨ᠈ ᡧᡠ ᠸᡝᠨ᠈ ᠰᠠᡵᠠᠰᡠᠴᡳᠨ ᡶᠠᡴᠰᡳ ᡝᡵᡩᡝᠮᡠ᠈ ᡨᠠᠴᡳᡥᡳᠶᠠᠨ ᡥᡡᠸᠠᡧᠠᠪᡠᠨ᠈ ᠴᠣᠣᡥᠠᡳ ᠪᠠᡳᡨᠠ ᠵᠠᡳ ᡤᡠᡵᡠᠨ ᠰᡳᡩᡝᠨ  ᡳ ᡤᡠᠴᡠᠯᡝᡵᡝ ᠨᡳᠶᠠᠮᠠᠨ ᡩᡠᠯᡳᠮᠪᠠ᠉ ᠪᡝᡤᡳᠩ ᠣᠴᡳ ᡤᡠᠪᠴᡳ ᠮᡠᠮᡠᡥᡠᡳ ᡥᠣᡨᠣᠨ  ᡳ ᡝᠮᡴᡝ᠈ ᠣᠴᡳ ᠵᠠᠯᠠᠨ ᠵᡝᠴᡝᠨ  ᡳ ᡩᠣᡵᡤᡳᡩᡝ ᠨᡳᠶᠠᠯᠮᠠᡳ ᡨᠣᠨ ᡳᠯᠠᠴᡳ ᠯᠠᠪᡩᡠ ᡥᠣᡨᠣᠨ ᠪᡳᠮᡝ ᠨᡳᠶᠠᠯᠮᠠᡳ ᡨᠣᠨ ᡠᠵᡠᡳ ᠯᠠᠪᡩᡠ ᡤᡝᠮᡠᠨ ᡥᡝᠴᡝᠨ᠉ ᠪᡝᡤᡳᠩ ᡥᡡᠸᠠ ᠪᡝ ᠨᡝᠴᡳᠨ ᡨᠠᠯᠠᡳ ᠠᠮᠠᡵᡤᡳ ᡠᠪᡠᡳ ᡠᠵᠠᠨ ᡩᡝ ᡨᡝᡳᠰᡠᠯᡝᠮᡝ᠈ ᠶᠠᠨ ᡧᠠᠨ᠋ ᡩᠠᠪᠠᡤᠠᠨ ᠪᡝᡤᡳᠩ ᠨᡳ ᠠᠮᠠᡵᡤᡳ ᡠᠪᡠ ᠪᡝ ᡩᠠᡵᡳᠮᠪᡳ᠉ ᡝᡵᡝᠴᡳ ᡨᡠᠯᡤᡳᠶᡝᠨ᠈ ᡨᡳᠶᠠᠨ ᠵᡳᠨ ᡥᠣᡨᠣᠨ᠈ ᡥᠣᠪᡝ ᡤᠣᠯᠣ ᡝᡵᡝ ᠵᡠᠸᡝ ᡥᠣᡨᠣᠨ᠈ ᡤᠣᠯᠣ ᡩᡝ ᠠᡩᠠᡴᡳ ᠣᠮᡝ᠈ ᡤᡳᠩ ᠵᡳᠨ ᠵᡳ ᡥᠣᡨᠣᠨ  ᡳ ᠠᡩᡠᠨ (ᠪᡝᡤᡳᠩ᠈ ᡨᡳᠶᠠᠨ ᠵᡳᠨ᠈ ᡥᠣᠪᡝ  ᡳ ᡥᠣᡨᠣᠨ  ᡳ ᠠᡩᡠᠨ)  ᡳ ᠣᠶᠣᠩᡤᠣ ᠪᠠᡴᡨᠠᠮᠪᡠᠨ ᠣᠮᠪᡳ᠉

beging hoton (nikan gisun: 北京市), šolokon gebu be ging (京) seme, nenehe gebu be beping (北平) sehe. beging oci junghūwa niyalma irgen uhe hūwaliyambure gurun -i gemun hecen bime tondo kadalara hoton, oci dulimbai gurun -i dasan, šu wen, sarasucin erdemu, tacihiyan hūwašabun, coohai baita jai gurun siden -i guculere niyaman dulimba. beging oci gubci mumuhui hoton -i emke, oci jalan jecen -i dorgide niyalmai ton ilaci labdu hoton bime niyalmai ton ujui labdu gemun hecen. beging hūwa be necin talai amargi ubui ujan de teisuleme, yan šan' dabagan beging ni amargi ubu be darimbi. ereci tulgiyen, tiyan jin hoton, hobe golo ere juwe hoton golo de adaki ome, ging jin ji hoton -i adun (beging, tiyan jin, hobe -i hoton -i adun) -i oyonggo baktambun ombi.

ᠪᡝᡤᡳᠩ ᡥᠣᡨᠣᠨ ᠣᠴᡳ ᡳᠯᠠᠨ ᠮᡳᠩᡤᠠᠨ ᡶᡠᠨᠴᡝᡵᡝ ᠠᠨᡳᠶᠠᡳ ᡥᠣᡨᠣᠨ ᠪᡝ ᡳᠯᡳᠪᡠᡥᠠ ᠰᡠᡩᡠᡵᡳ ᠵᠠᡳ ᠵᠠᡴᡡᠨ ᡨᠠᠩᡤᡡ ᠨᡳᠨᠵᡠ ᡶᡠᠨᠴᡝᡵᡝ ᠠᠨᡳᠶᠠᡳ ᡤᡝᠮᡠᠨ ᠪᡝ ᡳᠯᡳᠪᡠᠠᡥ ᠰᡠᡩᡠᡵᡳ ᠪᡳᠰᡳᡵᡝ ᠰᡠᡩᡠᡵᡳ ᡧᡠ ᠸᡝᠨ  ᡳ ᡤᡝᠪᡠᠩᡤᡝ ᡥᠣᡨᠣᠨ᠉ ᠯᡳᠶᠣᠣ ᡤᡠᡵᡠᠨ᠈ ᠠᡳᠰᡳᠨ ᡤᡠᡵᡠᠨ᠈ ᠶᡠᠸᠠᠨ ᡤᡠᡵᡠᠨ᠈ ᠮᡳᠩ ᡤᡠᡵᡠᠨ᠈ ᡩᠠᡳᠴᡳᠩ ᡤᡠᡵᡠᠨ ᡝᡵᡝ ᠰᡠᠨᠵᠠ ᡥᠠᡵᡤᠠ ᡥᠠᡵᡤᠠᡧᠠᠨ ᡶᠣᡵᡤᠣᠨ ᡤᡝᠮᡠ ᡠᠪᠠᡩᡝ ᡤᡝᠮᡠᠨ ᡳᠯᡳᠪᡠᡥᠠ ᠪᡳᡥᡝ᠉ ᠪᡝᡤᡳᠩ ᡥᠣᡨᠣᠨ ᠶᡠᠸᠠᠨ ᡤᡠᡵᡠᠨ ᠮᡳᠩ ᡤᡠᡵᡠᠨ᠈ ᡩᠠᡳᠴᡳᠩ ᡤᡠᡵᡠᠨ ᠴᡳ ᡝᠪᠰᡳ ᠵᡠᠩᡥᡡᠸᠠ ᡧᡠ ᠸᡝᠨ ᠪᡝ ᡳᠰᠠᠪᡠᡥᠠ ᠴᡳ ᡨᡠᠯᡤᡳᠶᡝᠨ᠈ ᡠᠮᡝᠰᡳ ᠯᠠᠪᡩᡠ ᡨᡠᠸᠠᠮᡝᡥᠠᠩᡤᡝ ᠰᡠᡩᡠᡵᡳ ᠵᠠᡳ ᡧᡠ ᠸᡝᠨ  ᡳ ᠠᡵᠪᡠᠩᡤᠠ ᠣᡵᠣᠨ ᠪᡳ᠉ ᠠᡧᡧᠠᠪᡠᠴᡳ ᠣᠵᠣᡵᠠᡴᡡ ᡧᡠ ᠵᠠᡴᠠ 3840 ᡥᠠᠴᡳᠨ᠈ ᡤᡠᠪᠴᡳ ᡤᡠᡵᡠᠨ  ᡳ ᠣᠶᠣᠩᡤᠣ ᡧᡠ ᠵᠠᡴᠠ ᠪᡝ ᡴᠠᡵᠮᠠᡨᠠᡵᠠ ᡝᠮᡠᠨᡳᠣ 135 ᡥᠠᠴᡳᠨ᠈ ᠵᠠᠯᠠᠨ ᠵᡝᠴᡝᠨ  ᡳ ᠸᡝᡵᡳᡥᡝ ᡥᡝᡨᡥᡝ 8 ᡥᠠᠴᡳᠨ ᠪᡝ ᠪᠠᡴᡨᠠᠮᠪᡠᠮᡝ᠈ ᡤᡠᠪᠴᡳ ᠮᡠᠮᡠᡥᡠ  ᡳ ᡩᠣᡤᡳᡩᡝ ᡧᡠ ᠸᡝᠨ  ᡳ ᠸᡝᡵᡳᡥᡝ ᡥᡝᡨᡥᡝ  ᡳ ᡥᠠᠴᡳᠨ ᡨᡝᠨ  ᡳ ᠯᠠᠪᡩᡠ ᡥᠣᡨᠣᠨ ᠣᠮᠪᡳ᠉ ᠪᡝᡤᡳᠩ ᡩᡝ ᡩᠠᠪᡴᡡᡵᡳ ᡩᠣᡵᡤᡳ ᡥᠣᡨᠣᠨ᠈ ᠠᠪᡴᠠᡳ ᠮᡠᡴᡩᡝᡥᡠᠨ᠈ ᡳ ᡥᠣ ᠶᡠᠸᠠᠨ᠈ ᡳᠣᠸᠠᠨ ᠮᡳᠩ ᠶᡠᠸᠠᠨ᠈ ᡧᠠᠨᠶᠠᠨ ᠵᠠᠰᡝ (ᡨᡠᠮᡝᠨ ᠪᠠ  ᡳ ᡤᠣᠯᠮᡳᠨ ᡥᡝᠴᡝᠨ) ᠰᡝᡵᡝ ᠵᡝᡵᡤᡳ ᡤᡝᠪᡠᠩᡤᡝ ᠵᡠᠯᡤᡝᡳ ᡠᠯᠠᠰᡳ ᠪᡳ᠉ ᠪᡝᡤᡳᠩ ᠣᠴᡳ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᠣᠶᠣᠩᡤᠣ ᠰᠠᡵᡤᠠᡧᠠᡵᠠ ᡥᠣᡨᠣᠨ᠈ ᡥᡡᡨᡠᠩ ᠵᠠᡳ 四合院 ᠰᡝᡵᡝᠩᡤᡝ ᠪᡝᡤᡳᠩ ᠨᡳ ᡠᠶᡠᠨ ᡩᡠᡴᠠ ᠵᠠᡳ ᡨᡠᠯᡝᡵᡤᡳ ᡥᠣᡨᠣᠨ  ᡳ ᡩᠣᡵᡤᡳᡩᡝ ᡩᠠᡵᡠᡥᠠᡳ ᠰᠠᠪᡠᠴᡳ ᠣᠵᠣᡵᠣ ᠵᡠᡤᡡᠨ ᡤᡳᠶᠠᡳ᠈ ᠪᠣᠣ ᡥᡡᡱᡳᠠ  ᡳ ᡩᡠᡵᡠᠨ᠈ ᡝᠮᡤᡝᡵᡳ ᠪᡤᡳᠩ ᠨᡳ ᠣᠶᠣᠩᡤᠣ ᡧᡠ ᡱᡳᡝᠨ  ᡳ ᡨᡝᠮᡤᡝᡨᡠ ᠣᡥᠣᠪᡳ᠉

beging hoton oci ilan minggan funcere aniyai hoton be ilibuha suduri jai jakūn tanggū ninju funcere aniyai gemun be ilibuha suduri bisire suduri šu wen -i gebungge hoton. liyoo gurun, aisin gurun, yuwan gurun, ming gurun, daicing gurun ere sunja hargašan forgon gemu ubade gemun ilibuha bihe. beging hoton yuwan gurun, ming gurun, daicing gurun ci ebsi junghūwa šu wen be isabuha ci tulgiyen, umesi labdu tuwamehangge suduri jai šu wen -i arbungga oron bi. aššabuci ojorakū šu jaka 3840 hacin, gubci gurun -i oyonggo šu jaka be karmatara emunio 135 hacin, jalan jecen -i werihe hethe 8 hacin be baktambume, gubci mumuhu -i dorgide šu wen -i werihe hethe -i hacin ten -i labdu hoton ombi. beging de dabkūri dorgi hoton, abkai mukdehun, i ho yuwan, iowan ming yuwan, šanyan jase (tumen ba -i golmin hecen) sere jergi gebungge julgei ulasi bi. beging oci dulimbai gurun -i oyonggo sargašara hoton, hūtung jai 四合院 serengge beging ni uyun duka jai tulergi hoton -i dorgide daruhai sabuci ojoro jugūn giyai, boo hūwa -i durun, emgeri beging ni oyonggo šu wen -i temgetu ohobi.

ᠪᡝᡤᡳᠩ ᡥᠣᡨᠣᠨ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡩᠣᡵᡤᡳᡩᡝ᠈ ᡩᠠᠰᠠᠨ᠈ ᠵᡳᠩᠵᡳ᠈ ᡧᡠ ᡱᡳᡝᠨ᠈ ᡨᠠᠴᡳᡥᡳᠶᠠᠨ ᡥᡡᡱᡳᠠᡧᠠᠪᡠᠨ᠈ ᠰᠠᡵᠠᠰᡠᠴᡳᠨ ᡝᡵᡩᡝᠮᡠ ᠰᡝᡵᡝ ᠵᡝᡵᡤᡳ ᡤᡝᡵᡝᠨ ᠪᠠᡩᡝ ᠠᠮᠪᡠᠯᠠ ᡠᡵᠠᡥᡳᠯᠠᡵᠠ ᡥᡡᠰᡠᠨ ᠪᡳ᠉ ᠯᠠᠪᡩᡠ ᡨᠣᠨ  ᡳ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡤᡠᡵᡠ  ᡳ ᠨᡝᡳᡥᡝ ᡶᠠᠯᡳᠨᡩᡠᠨ ᡳᠨᡝᡴᡠ ᡥᠣᡨᠣᠨ ᠪᡝ ᠨᡳᠶᠠᠮᠠᠨ ᡩᡠᠯᡳᠮᠪᠠ ᠣᠪᡠᠮᡝ᠈ ᡤᡠᠪᠴᡳ ᠮᡠᠮᡠᡥᡠ ᡩᡝ ᡨᡝᠨ  ᡳ ᠯᠠᠪᡩᡠ ᠵᠠᠯᠠᠨ ᠵᡝᠴᡝᠨ  ᡳ 500 ᡝᡨᡠᡥᡠ  ᡳ ᡠᡝᡥᡵᡳᠯᡝᡥᡝ ᡠᠪᡠ ᡳᡝᠨᡴᡠ ᠣᡥᡨᠣ ᡩᡝ ᠪᡳ᠉ ᠪᡝᡤᡳᠩ ᡥᡡᡩᠠᡧᠠᡵᠠ ᠪᠠᡳᡨᠠᡳ ᠨᡳᠶᠠᠮᠠᠨ ᡩᡠᠯᡳᠮᠪᠠᡳ ᠣᡵᠣᠨ ᡩᡝ ᡤᡠᡵᡠᠨ ᠰᡳᡩᡝᠨ  ᡳ ᡥᡡᡩᠠᡧᠠᡵᠠ ᠪᠠᡳᡨᠠ ᡩᠠᡵᠠ ᡧᡠᠩᡤᡳᡵᡠᠨ ᠵᠠᡳ ᠠᠮᠪᠠ ᡨᠠᡴᡨᡠ ᠪᡝ ᠠᠮᠪᡠᠯᠠ ᡳᠰᠠᠪᡠᠮᡝ᠈ ᠵᡠᠩ ᡤᡠᡱᡳᠠᠨ ᡮᡠᠨ ᡩᡝ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᠣᠶᠣᠩᡤᠣ ᡩᡝᠨ ᠰᠠᡵᠠᠰᡠᠴᡳᠨ ᡝᡵᡩᡝᠮᡠ  ᡳ ᠪᠠᠨᠵᡳᡵᡝ ᡥᡝᡨᡥᡝ ᠪᡝ ᡳᠰᠠᠪᡠᡥᠠᠪᡳ᠉ ᠪᡝᡤᡳᠩ ᠣᠴᡳ ᡩᡠᠯᡳᠮᠪᠠᡳ ᡤᡠᡵᡠ  ᡳ ᠰᡝᠯᡝᡳ ᠵᡠᡤᡡᠨ  ᡳ ᡥᠠᡶᡠᠨᠠᠨ ᠵᠠᡳ ᠵᡠᡤᡡᠨ ᠣᠨ  ᡳ ᡥᠠᡶᡠᠨᠠᠨ  ᡳ ᡧᠣᡧᠣᡥᠣᠨ ᡥᠣᡨᠣᠨ ᠪᡳᠮᡝ᠈ ᠪᡝᡤᡳᠩ ᡤᡝᠮᡠᠨ ᡥᡝᠴᡝᠨ ᡤᡠᡵᡠᠨ ᠰᡳᡩᡝᠨ  ᡳᡩᡝᠶᡝᡨᡠᠨ ᡶᠠᠯᠠᠨ ᠵᠠᡳ ᠪᡝᡤᡳᠩ ᡩᠠ ᡥᡳᠩ ᡤᡠᡵᡠᠨ ᠰᡳᡩᡝᠨ  ᡳ ᡩᡝᠶᡝᡨᡠᠨ ᡶᠠᠯᠠᠨ ᡝᡵᡝ ᠵᡠᡱᡳᡝ 4F ᠴᡳ ᠵᡝᡵᡤᡳ (ᡠᠮᡝᠰᡳ ᡩᡝᠨ ᠵᡝᡵᡤᡳᠩᡤᡝ) ᡧᠣᡧᠣᡥᠣᠨ ᡩᡝᠶᡝᡨᡠᠨ ᡶᠠᠯᠠᠨ ᠪᡳ᠉ ᠪᡝᡤᡳᠩ ᠨᠠ ᠰᡝᠯᡝᡳ ᠵᡠᡤᡡᠨ (ᠪᡝᡤᡳᠩ ᠮᡝᡨᡵᠣ) ᠣᠴᡳ ᠵᠠᠯᠠᠨ ᠵᡝᠴᡝᠨ ᡩᡝ ᡤᠣᠯᠮᡳᠨ ᡴᡝᠮᡠᠨ ᠵᠠᡳ ᠵᡝᡵᡤᡳ ᠠᠮᠪᠠ᠈ ᠵᡠᡱᡳᡝᡵᡝ ᠠᠨᡨᠠᡥᠠ ᡠᠮᡝᠰᡳ ᠯᠠᠪᡩᡠ ᡥᠣᡨᠣᠨ  ᡳ ᠰᡝᠯᡝᡳ ᠵᡠᡤᡡᠨ  ᡳ ᡥᠠᡶᡠᠨᠠᠨ  ᡳ ᡳᡵᡝᠨᡨᡠ᠉

beging hoton dulimbai gurun -i dorgide, dasan, jingji, šu wen, tacihiyan hūwašabun, sarasucin erdemu sere jergi geren bade ambula urahilara hūsun bi. labdu ton -i dulimbai gurun -i gurun -i neihe falindun ineku hoton be niyaman dulimba obume, gubci mumuhu de ten -i labdu jalan jecen -i 500 etuhun falindun -i uherilehe ubu ineku hoton de bi. beging hūdašara baitai niyaman dulimbai oron de gurun siden -i hūdašara baita dara šunggitun jai amba taktu be ambula isabume, jung guwan ts'un de dulimbai gurun -i oyonggo den sarasucin erdemu -i banjire hethe be isabuhabi. beging oci dulimbai gurun -i selei jugūn -i hafunan jai jugūn on -i hafunan -i šošohon hoton bime, beging gemun hecen gurun siden -i deyetun falan jai beging da hing gurun siden -i deyetun falan ere juwe 4F ci jergi (umesi den jergingge) šošohon deyetun falan bi. beging na selei jugūn (beging metro) oci jalan jecen de golmin kemun jai jergi amba, juwere antaha umesi labdu hoton -i selei jugūn -i hafunan -i sirentu.

ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡩᠣᡵᡤᡳᡩᡝ ᠪᡝᡤᡳᠩ ᡥᠣᡨᠣᠨ  ᡳ ᡩᡝᠨ ᠵᡝᡵᡤᡳ ᡴᡡᡱᡳᠠᡵᠠᠨ ᡨᠠᠴᡳᡴᡡ ᡠᠮᡝᠰᡳ ᠯᠠᠪᡩᡠ᠈ ᠪᡝᡤᡳᠩ ᠠᠮᠪᠠ ᡨᠠᠴᡳᡴᡡ ᠵᠠᡳ ᠴᡳᠩ ᡥᡡᡱᡳᠠ ᠠᠮᠪᠠ ᡨᠠᠴᡳᡴᡡ ᠣᠴᡳ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡩᠣᡵᡤᡳᡩᡝ ᡨᡝᠨ  ᡳ ᡶᡠᠯᡠ ᠠᠮᠪᠠ ᡨᠠᠴᡳᡴᡡ ᠣᠮᠪᡳ᠉ ᠪᡝᡤᡳᠩ ᡥᠣᡨᠣᠨ ᡤᡠᠪᠴᡳ ᠮᡠᠮᡠᡥᡠᡳ ᡩᠠᠰᠠᠨ᠈ ᠵᡳᠩᠵᡳ ᠰᡝᡵᡝ ᠵᡝᡵᡤᡳ ᡤᡝᡵᡝᠨᡠᠰᡠ  ᡳ ᠠᡧᡧᠠᠨ ᡩᡝ ᡠᡵᠠᡥᡳᠨ ᠠᠮᠪᡠᠯᠠ᠈ GaWC ᡤᡠᠪᠴᡳ ᠮᡠᠮᡠᡥᡠᡳ ᡥᠣᡨᠣᠨ  ᡳ ᡩᠣᡵᡤᡳᡩᡝ ᠨᡳᠩᡤᡠᠴᡳ ᠵᡝᡵᡤᡳᠩᡤᡝ ᡩᡝ ᠪᡳᠮᡝ᠈ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡩᠣᡵᡤᡳ ᡤᡡᡱᡳᠠ ᡥᠣᡨᠣᠨ ᡩᡝ ᡩᡠᡳᠪᡠᠯᡝᠴᡳ᠈ ᡥᡳᠶᠠᠩ ᡬᠠᠩ᠈ ᡧᠠᠩ ᡥᠠᡳ ᡝᡵᡝ ᠵᡠᡱᡳᡝ ᡥᠣᡨᠣᠨ ᠪᡝᡤᡳᠩ ᠴᡳ ᡶᡠᠯᡠ᠉ ᠵᠠᠯᠠᠨ ᠵᡝᠴᡝᠨ  ᡳ ᡥᠣᡨᠣᠨ ᠪᡝ ᠰᡳᠪᡴᡳᡵᡝ ᡝᠮᡠᠨᡳᠣ GaWC ᡳᠨᡝᡴᡠ ᡥᠣᡨᠣᠨ ᠪᡝ ᠵᠠᠯᠠᠨ ᠵᡝᠴᡝᠨ  ᡳ ᡠᠵᡠᡳ ᠰᡳᡵᡝᠨ  ᡳ ᡥᠣᡨᠣᠨ ᠣᠪᡠᡥᠠᠪᡳ᠉ ᡠᡥᡝᡵᡳᠯᡝᡥᡝ ᡤᡠᡵᡠᠨ ᡳᠨᡝᡴᡠ ᡥᠣᡨᠣᠨ  ᡳ ᠨᡳᠶᠠᠯᠮᠠ ᡩᡠᡱᡳᠠᠯᡳ  ᡳ ᠪᠠᡩᠠᡵᠠᡵᠠ ᠵᠣᡵᡳᡨᠣᠨ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡩᠣᡵᡤᡳᡩᡝ ᠵᠠᡳ ᠵᡝᡵᡤᡳᠩᡤᡝ ᡩᡝ ᠪᡳ ᠰᡝᠮᡝ ᠪᠣᠣᠯᠠᡥᠠᠪᡳ᠉ ᠵᠠᠯᠠᠨ ᠵᡝᠴᡝᠨ ᡩᡝ ᠵᡠᡱᡳᠠᡵᡳ ᡶᠣᡵᡤᠣᠨ  ᡳ ᠣᠯᡳᠮᡦᡳᡴ ᡳᠰᠠᠨ ᡳᠨᡠ ᡨᡠᡱᡳᡝᡵᡳ ᡶᠣᡵᡤᠣᠨ  ᡳ ᠣᠯᡳᠮᡦᡳᡴ ᡳᠰᠠᠨ ᠪᡝ ᠨᡝᡳᠮᡝ ᡳᠴᡳᡥᡳᠶᠠᡥᠠ ᡥᠣᡨᠣᠨ ᠪᡝᡤᡳᠩ ᠨᡳ ᡨᡝᡳᠯᡝ ᠪᡳ᠉

dulimbai gurun -i dorgide beging hoton -i den jergi kūwaran tacikū umesi labdu, beging amba tacikū jai cing hūwa amba tacikū oci dulimbai gurun -i dorgide ten -i fulu amba tacikū ombi. beging hoton gubci mumuhui dasan, jingji sere jergi gerenusu -i aššan de urahin ambula, GaWC gubci mumuhui hoton -i dorgide ningguci jergingge de bime, dulimbai gurun -i dorgi gūwa hoton de duibuleci, hiyang g'ang, šang hai ere juwe hoton beging ci fulu. jalan jecen -i hoton be sibkire emunio GaWC ineku hoton be jalan jecen -i ujui siren -i hoton obuhabi. uherilehe gurun ineku hoton -i niyalma duwali -i badarara joriton dulimbai gurun -i dorgide jai jergingge de bi seme boolahabi. jalan jecen de juwari forgon -i olimpik isan inu tuweri forgon -i olimpik isan be neime icihiyaha hoton beging ni teile bi.

ᠪᡝᡤᡳᠩ ᡥᠣᡨᠣᠨ  ᡳ ᡠᡥᡝᡵᡳᠯᡝᡥᡝ ᠪᠣᡩᠣᠪᡝ ᡨᠣᡴᡨᠣᠪᡠᠨ (2016 ᠴᡳ ᠠᠨᡳᠶᠠ - 2035 ᠴᡳ ᠠᠨᡳᠶᠠ) ᠪᡝᡤᡳᠩ ᡥᠣᡨᠣᠨ ᠪᡝ 「ᡤᡠᠪᠴᡳ ᡤᡠᡵᡠᠨ  ᡳ ᡩᠠᠰᠠᠨ  ᡳ ᠨᡳᠶᠠᠮᠠᠨ ᡩᡠᠯᡳᠮᠪᠠ᠈ ᡧᡠ ᡱᡳᡝᠨ  ᡳ ᠨᡳᠶᠠᠮᠠᠨ ᡩᡠᠯᡳᠮᠪᠠ᠈ ᡤᡠᡵᡠᠨ ᠰᡳᡩᡝᠨ  ᡳ ᡤᡠᠴᡠᠯᡝᡵᡝ ᠨᡳᠶᠠᠮᠠᠨ ᡩᡠᠯᡳᠵᠮᠪᠠ᠈ ᠰᠠᡵᠠᠰᡠᠴᡳᠨ ᡝᡵᡩᡝᠮᡠ  ᡳ ᡳᠴᡝᠮᠯᡝᡵᡝ ᠨᡳᠶᠠᠮᠠᠨ ᡩᡠᠯᡳᠮᠪᠠ」 ᠰᡝᠮᡝ ᡨᠣᡴᡨᠣᠪᡠᠮᡝ᠈ ᡝᡵᡝ 「ᡩᡠᡳᠨ ᠨᡳᠶᠠᠮᠠᠨ ᡩᡠᠯᡳᠮᠪᠠ」 ᠪᡝ ᡝᠯᡝᡳ ᠰᠠᡳᡴᠠᠨ ᠪᠠᡩᠠᡵᠠᡵᠠ ᠪᡝ ᡨᡝᠨᠣᠪᡠᡥᠠᠪᡳ᠉ ᡳᡝᠨᡴᡠ ᡥᠣᡨᠣᠨ ᠪᠠᡩᠠᡵᠠᡵᠠ ᡩᡝ᠈ ᡠᡩᡠᡩᡠ ᡥᠠᠴᡳ  ᡳ 「ᡥᠣᡨᠣᠨ  ᡳ ᠨᡳᠮᡝᡴᡠ」 ᡨᡠᠴᡳᡴᡝ ᡨᡠᡵᡤᡠᠨᡩᡝ᠈ ᡩᡠᠯᡳᠮᠪᠠᡳ ᡤᡠᡵᡠᠨ  ᡳ ᡩᠣᡵᡤᡳᡩᡝ ᡠᠵᡠᡳ ᡨᠣᠨ ᠪᡝ ᡝᡴᡳᠶᡝᠮᠪᡠᠮᡝ ᠪᠠᡩᠠᡵᠠᡵᠠ ᡥᠣᡨᠣᠨ ᠣᡥᠣᠪᡳ᠉ ᡤᡝᠮᡠᠨ ᡱᡳᠠᡴᠠ ᠮᡠᡨᡝᠨ ᠪᡝ ᠰᠠᠮᠰᡳᠪᡠᠮᡝ 「ᡩᡠᡳᠨ ᠨᡳᠶᠠᠮᠠᠨ ᡩᡠᠯᡳᠮᠪᠠ」 ᡩᡝ ᠠᠴᠠᠨᠠᡵᠠᡴᡡ ᡝᠮᡠᡳᠨᠣ ᠪᡝ ᠨᡳᠶᠠᠮᠠᠨ ᡩᡠᠯᡳᠮᠪᠠᡳ ᡥᠣᡨᠣᠨ ᠣᡵᠣᠨ ᠴᡳ ᡤᡠᡵᡳᠪᡠᠮᡝ᠈ ᡥᠣᠪᡝ  ᡳ ᡥᡳᠣᠩ ᠠᠨ ᡳᠴᡝ ᠣᡵᠣᠨ ᠪᡝ ᠪᠣᡩᠣᠮᡝ ᡨᠣᡴᡨᠣᠪᡠᠮᡝ᠈ ᡩᡝᠨ ᠮᡠᡴᡝᠨᡝᠴᡳᠨ  ᡳ ᠪᡝᡤᡳᠩ ᡥᠣᡨᠣᠨ  ᡳ ᡳᠯᡥᡳ ᠨᡳᠶᠠᠮᠠᠨ ᡩᡠᠯᡳᠮᠪᠠ ᠪᡝ ᡳᠯᡳᠪᡠᡵᡝ ᠪᡝ ᡩᡝᡵᡳᠪᡠᡥᡝᠪᡳ᠉

<beging hoton -i uherilere bodome toktobun (2016 ci aniya - 2035 ci aniya)> beging hoton be "gubci gurun -i dasan -i niyaman dulimba, šu wen -i niyaman dulimba, gurun siden -i guculere niyaman dulimba, sarasucin erdemu -i icemlere niyaman dulimba" seme toktobume, ere "duin niyaman dulimba" be elei saikan badarara be ten obuhabi. ineku hoton badarara de, ududu hacin -i "hoton -i nimeku" tucike turgunde, dulimbai gurun -i dorgide ujui ton be ekiyembume badarara hoton ohobi. gemun waka muten be samsibume "duin niyaman dulimba" de acanarakū emunio be niyaman dulimbai hoton oron ci guribume, hobe -i hiong an ice oron be bodome toktobume, den mukenecin -i beging hoton -i ilhi niyaman dulimba be ilibure be deribuhebi.

ᡤᡝᠪᡠ gebu

ᠵᡠᠯᡤᡝᡳ ᡶᠣᠨᡩᡝ᠈ ᡤᡳ᠈ ᠶᠠᠨ ᡤᡠᡵᡠᠨ  ᡳ ᡧᠠᠩ ᡩᡠ ᡥᡝᠴᡝᠨ᠈ ᠶᠠᠨ ᡤᡳᠩ᠈ ᡤᡳ ᡥᡳᠶᠠᠨ᠈ ᡤᡠᠸᠠᠩ ᠶᠠᠩ ᡤᡳᠶᡡᠨ᠈ ᡤᡠᠸᠠᠩ ᠶᠠᠩ ᡤᡠᡵᡠᠨ᠈ ᡳᠣ ᠵᡝᠣ᠈ ᠶᠠᠨ ᡤᡠᡵᡠᠨ᠈ ᠶᠠᠨ ᡤᡳᠶᡡᠨ᠈ ᠵᠣ ᡤᡳᠶᡡᠨ᠈ ᡩᠠᡳ ᡩᡠ᠈ ᡶᠠᠨ ᠶᠠᠩ᠈ ᠯᡠ ᠯᡠᠩ᠈ ᠨᠠᠨ ᡤᡳᠩ ᡳᠣ ᡩᡠ ᡶᡠ᠈ ᠨᠠ ᡤᡳᠩ ᡥᡳ ᡤᡳᠨ ᡶᡠ᠈ ᠶᠠᠨ ᡧᠠᠨ᠋ ᡶᡠ ᠵᡠᡤᡡᠨ᠈ ᠵᡠᠩ ᡩᡠ ᡩᠠ ᡥᡳᠩ ᡶᡠ᠈ ᠵᡠᠩ ᡩᡠ ᠵᡠᡤᡡᠨ᠈ ᡩᠠ ᡥᡳᠩ ᡶᡠ᠈ ᠪᡝ ᡦᡳᠩ ᡶᡠ᠈ ᠪᡝᡤᡳᠩ᠈ ᡤᡝᠮᡠᠨ ᡥᡝᠴᡝᠨ᠈ ᡧᡡᠨ ᡨᡳᠶᠠᠨᡶᡠ᠈ ᡤᡳᠩ ᠵᠣᠣ ᠪᠠ ᠨᠠ᠈ ᠪᡝᡦᡳᠩ ᠴᠣᡥᠣᡨᠣᡳ ᡥᠣᡨᠣᠨ ᠰᡝᡵᡝ ᠵᡝᡵᡤᡳ ᡤᡝᠪᡠ ᠪᡳᡥᡝ᠉ 1928 ᠴᡳ ᠠᠨᡳᠶᠠ ᡤᡠᡵᡠᠨ ᡳᡵᡤᡝᠨ  ᡳ ᡩᠠᠰᠠᠨ ᠶᠠᠮᡠᠨ ᠪᡝᡤᡳᠩ ᠪᡝ ᠪᡝᡦᡳᠩ ᠰᡝᠮᡝ ᡥᠠᠯᠠᡥᠠ᠉ 1949 ᠴᡳ ᠠᠨᡳᠶᠠ 9 ᠪᡳᠶᠠᡳ 27 ᡳᠨᡝᠩᡤᡳ ᡩᡝ ᡩᡠᠯᡳᠮᠪᠠᡳ ᡤᡠᡵᡠᠨ ᡳ ᠨᡳᠶᠠᠯᠮᠠ ᡳᡵᡤᡝᠨ ᡩᠠᠰᠠᠨ ᠪᡝ ᡥᡝᠪᡩᡝᡵᡝ ᡳᠰᠠᠨ  ᡳ ᡠᠵᡠᡳ ᠪᡳᠯᠠᡤᠠᠨ ᠶᠣᠣᠨᡳᠩᡤᠠ ᡳᠰᠠᠨ ᠪᡝᡦᡳᠩ ᠪᡝ ᡩᠠᡥᡳᠮᡝ ᠪᡝᡤᡳᠩ ᠰᡝᠮᡝ ᡥᠠᠯᠠᡵᠠ ᠪᡝ ᡨᠣᡴᡨᠣᠪᡠᡥᠠᠪᡳ᠉

julgei fonde, gi, yan gurun -i šang du hecen, yan ging, gi hiyan, guwang yang giyūn, guwang yang gurun, io jeo, yan gurun, yan giyūn, jo giyūn, dai du, fan yang, lu lung, nan ging io du fu, nan ging hi gin fu, yan šan' fu jugūn, jung du da hing fu, jung du jugūn, da hing fu, be ping fu, beging, gemun hecen, šūn tiyan fu, ging joo ba na, beping cohotoi hoton sere jergi gebu bihe. 1928 ci aniya gurun irgen -i dasan yamun beging be beping seme halaha. 1949 ci aniya 9 biyai 27 inenggi de dulimbai gurun -i niyalma irgen dasan be hebdere isan -i ujui bilagan yooningga isan beping be dahime beging seme halara be toktobuhabi.