Wp/mnc/Gure i alin i afan
ᡝᡵᡝ
ᠵᡠᠰᡨᠠᠨ ᡳ
ᡤᡝᠪᡠ
ᡴᡝᠮᡠᠨᡳ
ᡨᠣᡴᡨᠣᠪᡠᡵᡝ
ᡠᠨᡩᡝ᠉
ere justan -i gebu kemuni toktobure unde.
此页面的标题没有确定。
Gure i alin i afan oci, 1593 aniya uyun biya de, yehe gurun -i bujai beile, narimbolo beile; hada gurun -i menggebolo beile; ula gurun -i mantai beilei deo bujantai beile; Hoifa gurun -i baindari beile; korcin -i unggadai beile, mangkvs beile, minggan beile; sibei aiman; gvwalca -i aiman; manju gurun -i šanggiyan alin -i juxeri goloi ejen julengge; neyen i goloi ejen seowen seksi uheri uyun halai gurun jai manju gurun -i taidzu sure beile afanuha baita.[1].
duleke baita[edit | edit source]
1593 -ci aniya uyun biya de, yehei gurun -i bujai beile, narimbolo beile; hadai gurun i menggebolo beile; ulai gurun i mantai beilei deo bujantai beile; hoifa gurun i baidari beile; amargi non -i korcin -i Monggoi gurun i Unggadai beile, Mangkvs beile, Minggan beile; Sibei aiman; Gvwalca i aiman; Manju gurun ni Xanggiyan alin i Juxeri goloi ejen Julengge; Neyen i goloi ejen Seowen seksi uheri uyun halai gurun acafi ilan jugvn i cooha jihe. Manju gurun i Taizu sure beile erebe donjifi, Urikan gebungge niyalma be dergi golo de karun gene seme unggihe, Urikan karun geneme, Sure beilei tehe hecen ci emu tanggv bai dubede isinafi, emu dabagan be dabara de, geren gaha, Urikan i julergi be ladurame jamarame julesi unggirakv, amasi bederehe de gaha meni meni fakcafi ekisaka jailambi, gaha jailaha seme, geli julesi geneki seci, geren gaha geli dere yasa be ladurame jamarame unggirakv ofi, Urikan amasi bederefi gaha henturehe be, Sure beile de alaha manggi. Taizu sure beile Urikan be Jaka gebungge bai jugvn be genefi Hunehe goloi ergide karun tuwana seme unggihe, Urikan karun genefi yamji tuwaci, batai cooha Hunehe birai amargi de isinjifi ing ilifi, geren cooha buda arame dabuha tuwai elden abkai usihai adali sabumbi, tere cooha buda jefi dobori dulime Xaji gebungge dabagan be dabame jidere be toktome tuwafi feksime jifi sunjaci ging ni uju de isinjifi, Taizu sure beile de batai amba cooha isinjiha seme alara jakade, Taizu sure beile hendume: “Yehei cooha be enenggi jimbi, cimari jimbi seme donjiha te isinjiha nikai! muse dobori farhvn de cooha juraci, gurun durbembi; gereke manggi, juraki, musei coohai ejete geren ambasa de alana” seme gemu alanaha, tere siden de, Sure beile amhaha manggi, Gundai fujin getebufi hendume: “beile si liyeliyehebio? golohobio? uyun aiman i gurun acafi cooha jihebi seci si ainu amhambi?” Sure beile hendume: “gelere niyalma de emu isinjimbio? geleci bi ainu amhambi, Yehei cooha ilan golo be dosime enenggi jimbi, cimari jimbi seme donjifi mini dolo jobombihe, te isinjiha seme donjifi, mini dolo sulakan oho. Yehe de aika bure weile bifi burakv kiyangdulaha bici, abka mimbe wakalambi seme jobombi-dere, meni meni gurun be bargiyafi, abkai kesi-de baibi banjire niyalma be burerakv, uyun aiman i gurun acafi umai weile akv niyalma be gidaxame waki seme cooha jici, abka cembe wakalarao seme gvnimbi kai” seme hendufi beye be ergembume amhafi gereke manggi, buda jefi, cooha jurandara de, beise ambasa be gaifi tangse de hengkilere de neneme emu jergi niyakvrafi hengkilefi iliha, jai jergi niyakvrafi jalbarime: “dergi abka dekdere xun, fejergi na, eiten enduri, weceku: Nurhaci bi daci Yehei gurun de umai weile akv banjiha, baibi banjire niyalma be yebelerakv waki seme cooha jidere be abka beideme sambi dere” seme jalbarifi henkilefi iliha, ilaci jergi niyakvrafi jalbarame “batai uju be fusihvn obu, mini uju be wesihvn obu, mini coohai niyalmai jafaha xusiha be ume tuhebure, yaluha morin be ume buduribure, erxeme wehiyeme yabubu” seme ilan jergi hengkilefi. tereci cooha jurafi geneme Tokso gebungge gaxan i birai dogon de ilifi, coohai niyalmai galaktun monggon hvsikv be sufi gemu weri, gala monggon goifi buceci bucekini, musei beye kuxun oci bata be adarame bahafi etembi, musei beye sula oci, dain be etembi dere” seme hendufi, coohai niyalmai galktun monggon hvsikv be gemu werifi.
tereci genefi Jaka gebungge bihan de isinaha manggi, Jakai hoton tuwakiyaha ejen Naihv, Santan gebungge juwe amba jifi alame: “cooha muduri erin de isinjifi, Jakai hoton be kafi afame tuwafi, afara be nakafi bederefi, Hejigei hoton de afanaha, jihe cooha dembei geren” seme alara jakade, coohai niyalma gemu cira aljafi bisire de, Jakai hoton de bihe Langtari gebungge niyalma amala jifi, “beile aba” seme hvlafi, “musei cooha udud bi” seme hendufi, jugvn i dalbai alin i dele tafufi coohai baran be tuwafi hendume: “jihe cooha geren seci, musei cooha inu geren, julge daiming gurun be dailara fonde, daiming gurun i cooha alin bihan i jalu ilihangge be, musei juwe ilan tanggv cooha uthai gidambihe, musei gurun i niyalma silhi ehe, fahvn mangga, ere cooha be urunakv gidambi, ere cooha be gidarakv ohode, Lnangtari mimbe wa” seme hendure jakade, geren coohai niyalma donjifi mujilen majige tohoroko,
tereci Sure beile hendume: “jihe cooha bedereme geneci, yamji afaki, deduci cimari afaki” seme karun unggifi, tuwanaha niyalma jifi alame: “cooha dedume morin de ulebure orho jeku juwembi, ing ni tehereme jase jafambi” seme alaha manggi, Taizu sure beile tubade dedume ing iliha, tere yamji Yehei coohai emu niyalma ukame jifi alame: “Yehei Bujai beile, Narimbulu beilei cooha emu tumen, Hadai Manggebulo beile, Ulai Bujantai beile, Hoifai Baidari beilei cooha emu tumen, Monggo i Korcin i Unggadai beile, Manggvs beile, Minggan beile, Sibe, Gvwalcai cooha emu tume, uheri ilan tumen bi” seme alaha manggi, geren cooha geli cira ehe oho.
Sure beile hendume: “geren coohai niyalma suwe ume joboro, bi suwembe jobobume afaburakv, muse bai akdun be gaime ilifi, jihe cooha be yarkiyame ganafi, ce afanjici muse alime gaifi afaki; yarkiyara de jiderakv oci, muse gemu yafahalafi duin dere arame faidafi elhei dosime afanaki, tere acamjame jihe cooha uju geren, entehe acamjaha uju geren cooha de coohai niyalma anahvnjame julesi afarakv, urunakv beisei beye juleri gaifi dosimbi, muse ilihai alime gaifi afaha de, ini juleri gaifi dosika beise i beye, emke juwe tuheke de, tere cooha uthai burlambi kai, musei cooha udu komso bicibe, emu hvsun i afaha de, urunakv etembi!” seme hendufi, tere dobori dedufi, jai cimari erde cooha juraka, Yehei cooha Hejegei hoton be nenehe inenggi afaci bahakv ofi, jai inenggi geli afara de, Taizu sure beile isinafi Hejigei hoton i bakcilame Gurei alin i ninggui akdun sain ba de, cooha faidafi gvsa gvsai cooha gaifi, afara beise ambasa be teisu teisu afabufi belheme wajiha manggi, Eidu baturu de tanggv cooha adabufi yarkiyame unggihe, Eidu baturu yarkiyame genehe be, Yehei cooha sabufi, Hejigei hoton be afara be nakafi, cooha bargiyafi afanjiha manggi, Manju i cooha ilihai alime gaifi emu jergi gidafi uyun niyalma be waha, Yehei cooha emu jergi bederefi, jai dasame Yehei Bujai beile, Gintaisi beile, Korcin i Monggoi ilan beile i cooha be gaifi emu babe xorgime afame, Yehei Bujai beile juleri gaifi afame dosifi yaluha morin moo de afafi tuheke manggi, Manju gurun i coohai Utan i gebungge niyalma sujume dosifi Bujai beile be aktalame yalufi gidalame waha manggi, Yehei cooha gidabufi, Bujai beile i wabuha be safi, Yehei beise gemu songgocoro jakade, acafi jihe coohai beise ambula golofi, gemu silhi meijefi meni meni cooha be tuwarakv jugvn jugvn i samsime burlaha, Monggoi Korcin i Minggan beile i yaluha morin lifafi tuhenefi, morin i enggemu, etuhe fakvri be gemu waliyafi bontoho morin yalufi, arkan seme burlame tucike, Sure beile cooha be sindafi, sacime wame nuhaliyan sangga de jalume sahame tuhebume, Hadai gurun i Caiha gaxan i julergi Wehe juwen de isitala boxome wafi, tere dobori jugvn be gvsu futa gocime tuwakiyafi burlame genere niyalma be ambula waha[2].
Afan i amala[edit | edit source]
jai inenggi emu niyalma Ulai Bujantai beile be weihun jafafi huthufi gajifi, Sure beile de alame: “bi emu niyalma be bahafi waki seci, mimbe ume wara, joligan gaisu sere jakade, bi huthufi gajiha” seme Taizu sure beilei juleri niyakvrabuha, Sure beile fonjime: “si ainaha niyalma?” tere niyalma jabume: “mimbe warahv seme geleme alahakv, bi Ulai gurun i Mantai beilei deo Bujantai, waci, ujici beile sini ciha” seme hendume hengkilehe manggi. Taizu sure beile hendume: “suweni uyun aiman i gurun acafi umai weile akv niyalma be waki seme cooha jihe, abka suwembe wakalafi sikse inenggi baha bici simbe wambihe, minde emgeri dere acaha niyalma be adarame wara, ‘wahaci ujihe gebu dele, gaiha ci buhe gebu dele’ sere” seme hendufi huthuhe futa be sufi silun i dahv etubufi ujihe[3].
Manju gurun i sure beile afan ci bahangge[edit | edit source]
duin minggan niyalma waha, ilan minggan morin, emu minggan uksin baha[4].
Sekiyen[edit | edit source]
- temgetu