Wp/mnc/ᡩᠠᡳᠴᡳᠩ ᡤᡠᡵᡠᠨ ᠊ᡳ ᡝᠨᡩᡠᡵᡳᠩᡤᡝ ᡥᠠᠨ ᠊ᡳ ᡤᡠᠩ ᡝᡵᡩᡝᠮᡠᡳ ᠪᡝᡳ
ᡩᠠᡳᠴᡳᠩ ᡤᡠᡵᡠᠨ ᠊ᡳ ᡝᠨᡩᡠᡵᡳᠩᡤᡝ ᡥᠠᠨ ᠊ᡳ ᡤᡠᠩ ᡝᡵᡩᡝᠮᡠᡳ ᠪᡝᡳ ᠰᡝᡵᡝᠩᡤᡝ ᠴᠣᠣᡥᡳᠶᠠᠨ ᡳ ᠸᠠᠩ ᡩᠠᡥᠠ ᠮᠠᠩᡤᡳ ᡩᠠᡳᠴᡳᠩ ᡤᡠᡵᡠᠨ ᡳ ᡥᡝᠰᡝ ᡩᡝ ᠠᡵᠠᡥᠠ ᠴᠣᠣᡥᡳᠶᠠᠨ ᡳ ᠪᡝᡳ᠈ ᠴᠣᠣᡥᡳᠶᠠᠨ ᠠᡵᠠᡥᠠ ᠸᡝᡳᠯᡝ᠈ ᡩᠣᡵᠣ ᠣᠪᡠᡵᠠᡴᡡᠩᡤᡝ᠈ ᠴᠣᠣᡥᡳᠶᠠᠨ ᠴᡳ ᠪᡝᠨᠵᡳᡵᡝ ᠠᠯᠪᠠᠪᡠᠨ ᡳ ᡥᠠᠴᡳᠨ ᠵᡝᡵᡤᡳ ᠪᡝ ᡝᠵᡝᠯᡝᡥᡝ᠈ ᠨᡳᡴᠠᠨ ᡤᡳᠰᡠᠨ᠈ ᠮᠣᠩᡤᠣ ᡤᡳᠰᡠᠨ᠈ ᠮᠠᠨᠵᡠ ᡤᡳᠰᡠᠨ ᡩᡝ ᠠᡵᠠᠮᡝ ᠪᡳ᠈ ᠰᠣᠯᡥᠣ ᡩᠣᠯᠣ ᡳᠨᡳ ᠴᡳᠰᡠᡳ ᠰᠠᠨ ᡨᡳᠶᠠᠨ ᡩᡠ ᠪᡝᡳ ᡝᠮᠪᡳᠴᡳ ᡤᡳᡵᡠᠴᡠᠨ ᡳ ᠪᡝᡳ ᠰᡝᠮᡝ ᡥᡡᠯᠠᠮᠪᡳ᠈
ᡤᡳᠰᡠᠨ
ᡩᠠᡳᠴᡳᠩ ᡤᡠᡵᡠᠨ ᡳ ᡝᠨᡩᡠᡵᡳᠩᡤᡝ ᡥᠠᠨ ᡳ ᡤᡠᠩ ᡝᡵᡩᡝᠮᡠᡳ ᠪᡝᡳ᠈ ᡩᠠᡳᠴᡳᠩ ᡤᡠᡵᡠᠨ ᡳ ᠸᡝᠰᡳᡥᡠᠨ ᡝᡵᡩᡝᠮᡠᠩᡤᡝᡳ ᠰᡠᠴᡠᠩᡤᠠ ᠠᠨᡳᠶᠠ ᡨᡠᠸᡝᡵᡳ ᠵᠣᡵᡤᠣᠨ ᠪᡳᠶᠠ ᡩᡝ ᡤᠣᠰᡳᠨ ᠣᠨᠴᠣ ᡥᡡᠸᠠᠯᡳᠶᠠᠰᡠᠨ ᡝᠨᡩᡠᡵᡳᠩᡤᡝ ᡥᠠᠨ ᠠᠴᠠᡥᠠ ᠪᡝ ᡝᡶᡠᠯᡝᡥᡝᠩᡤᡝ ᠮᡝᠨᠴᡳ ᡩᡝᡵᡳᠪᡠᡥᡝ ᠰᡝᠮᡝ ᠠᠮᠪᡠᠯᠠ ᠵᡳᠯᡳ ᠪᠠᠨᠵᡳᡶᡳ ᠴᠣᠣᡥᠠᡳ ᡥᠣᡵᠣᠨ ᡝᠩᡤᡝᠯᡝᠵᡳᡶᡳ ᡩᡝᡵᡤᡳ ᠪᠠᡵᡠ ᠴᡳᠩ ᠰᡝᠮᡝ ᠵᡳᠴᡳ ᠶᠠᠶᠠ ᡤᡝᠯᡝᠮᡝ ᠠᠯᡳᡥᠠᡴᡡ ᡨᡝᡵᡳ ᡶᠣᠨᡩᡝ ᠮᡝᠨᡳ ᠰᡳᡨᠠᡥᡡᠨ ᡝᠵᡝᠨ ᠨᠠᠨ ᡥᠠᠨ ᡩᡝ ᡨᠣᠮᠣᡶᡳ ᡤᡝᠯᡝᠮᡝ ᠣᠯᡥᠣᠮᡝ ᠨᡳᠶᡝᠩᠨᡳᠶᡝᡵᡳ ᠵᡠᡥᡝ ᠪᡝ ᡶᡝᡥᡠᡶᡳ ᡤᡝᠨᡝᠨᡩᡝᡵᡝ ᠪᡝ ᠠᠯᡳᠶᠠᡵᠠ ᡤᡝᠰᡝ ᠰᡠᠰᠠᡳ ᠴᡳ ᡳᠨᡝᠩᡤᡳ ᡩᡝᡵᡤᡳ ᠵᡠᠯᡝᡵᡳ ᡤᡝᡵᡝᠨ ᠵᡠᡤᡡᠨ ᡳ ᠴᠣᠣᡥᠠ ᠰᡳᡵᠠᠨ ᠰᡳᡵᠠᠨ ᡳ ᡤᡳᡩᠠᠪᡠᡥᠠ ᠸᠠᡵᡤᡳ ᠠᠮᠠᡵᡤᡳ ᠵᡳᠶᠠᠩᡤᡳᠶᡡᠨ ᠰᡝ ᠠᠯᡳᠨ ᡥᠣᡵᠣ ᡩᡝ ᠵᠠᡳᠯᠠᡶᡳ [ ] [ ] ᡝᠮᡠ ᠣᡴᠰᠣᠮᡝ ᠮᡠᡨᡝᡥᡝᡴᡡ ᡥᡝᠴᡝᠨ ᡳ ᡩᠣᡵᡤᡳ ᠵᡝᡴᡠ ᡤᡝᠯᡳ ᠸᠠᠵᡳᡥᠠ ᡨᡝᡵᡝ ᡶᠣᠨᡩᡝ ᠠᠮᠪᠠ ᠴᠣᠣᡥᠠ ᡥᡝᠴᡝᠨ ᠪᡝ ᡤᠠᡳᠵᠠᡵᠠᠩᡤᡝ ᠰᠠᡥᡡᡵᡠᠨ ᡝᡩᡠᠨ ᠪᠣᠯᠣᡵᡳ ᡝᡵᡳᠨ ᡳ ᠮᠣᠣᡳ ᠠᠪᡩᠠᡥᠠ ᠪᡝ ᠰᡳᡥᠠᠪᡠᡵᡝ ᡨᡠᡶᡳ ᡤᡡᡵᡤᡳᠨ ᡩᡝ ᡤᠠᠰᡥᠠᡳ ᡶᡠᠩᡤᠠᠯᠠ ᠪᡝ ᡩᡝᠵᡳᡵᡝ ᡤᡝᠰᡝ ᠪᡳᡥᡝ ᡝᠨᡩᡠᡵᡳᠩᡤᡝ ᡥᠠᠨ ᠸᠠᡵᠠᡴᡡ ᠪᡝ ᡩᡝᠯᡝ ᡝᡵᡩᡝᠮᡠ ᠰᡝᠯᡤᡳᠶᡝᡵᡝ ᠪᡝ ᠣᠶᠣᠩᡤᠣ ᠣᠪᡠᡶᡳ ᡥᡝᠰᡝ ᠸᠠᠰᡳᠮᠪᡠᡶᡳ ᡠᠯᡥᡳᠪᡠᠮᡝ ᠵᡳᡥᡝᡩᡝ ᠰᡳᠮᠪᡝ ᠶᠣᠣᠮᡳ ᠣᠪᡠᡵᡝ ᠵᡳᡩᡝᡵᠠᡴᡡ ᠣᡥᠣᡩᡝ ᠰᡠᠨᡨᡝᠪᡠᠮᠪᡳ ᠰᡝᡥᡝ ᡨᡝᡵᡝᠴᡳ ᡳᠩᡤᡡᠯᡩᠠᡳ ᠮᠠᡶᡠᡨᠠ ᡤᡝᡵᡝᠨ ᠵᡳᠶᠠᠩᠵᡳᠶᡡᠨ ᠰᡝ ᡝᠨᡩᡠᡵᡳᠩᡤᡝ ᡥᠠᠨ ᡳ ᡥᡝᠰᡝ ᠪᡝ ᠠᠯᡳᡶᡳ ᠠᠮᠠᠰᡳ ᠵᡠᠯᡝᠰᡳ ᡤᡳᠰᡠᡵᡝᠮᡝ ᠶᠠᠪᡠᡵᡝ ᠵᠠᡴᠠᡩᡝ ᠮᡝᠨᡳ ᠰᡳᡨᠠᡥᡡᠨ ᡝᠵᡝᠨ ᠪᡳᡨᡥᡝ ᠴᠣᠣᡥᠠᡳ ᡤᡝᡵᡝᠨ ᠠᠮᠪᠠᠰᠠ ᠪᡝ ᡳᠰᠠᠪᡠᡶᡳ ᡥᡝᠨᡩᡠᠮᡝ ᠪᡳ ᠠᠮᠪᠠ ᡤᡠᡵᡠᠨ ᡳ ᠪᠠᡵᡠ ᠠᠴᠠᡶᡳ ᠵᡠᠸᠠᠨ ᠠᠨᡳᠶᠠ ᠣᡥᠣ ᠮᡳᠨᡳ ᡶᠠᡵᡥᡡᠨ ᠯᡳᠶᡝᠯᡳᠶᡝᡥᡠᠨ ᡩᡝ ᠠᠪᡴᠠᡳ ᡩᠠᡳᠯᠠᡵᠠ ᠪᡝ ᡥᡡᡩᡠᠯᠠᠪᡠᡶᡳ ᡨᡠᠮᡝᠨ ᡥᠠᠯᠠᡳ ᡳᡵᡤᡝᠨ ᠵᠣᠪᠣᠯᠣᠨ ᡨᡠᡧᠠᡥᠠ ᡝᡵᡝ ᠸᡝᡳᠯᡝ ᠮᡳᠨᡳ ᡝᠮᡥᡠᠨ ᠪᡝᠶᡝ ᡩᡝ ᠪᡳ ᡝᠨᡩᡠᡵᡳᠩᡤᡝ ᡥᠠᠨ ᠨᡝᠮᡝᠮᡝ ᠸᠠᠮᡝ ᠵᡝᠨᡩᡝᡵᠠᡴᡡ ᡠᠵᠠᡨᡠ ᡠᠯᡥᡳᠪᡠᡵᡝ ᠪᠠᡩᡝ ᠪᡳ ᠠᡳ ᡤᡝᠯᡥᡠᠨ ᠠᡴᡡ ᠮᡳᠨᡳ ᡩᡝᡵᡤᡳ ᠮᠠᡶᠠᡵᡳ ᡩᠣᡵᠣ ᠪᡝ ᠶᠣᠣᠨᡳ ᠣᠪᡠᠮᡝ ᠮᡳᠨᡳ ᡶᡝᠵᡝᡵᡳ ᡳᡵᡤᡝᠨ ᠪᡝ ᡥᠠᡵᠠᠮᡝ ᡥᡝᠰᡝ ᠪᡝ ᠠᡳᠮᡝ ᡥᠠᡳᠵᠠᡵᠠᡴᡡ ᠰᡝᡥᡝ ᠮᠠᠩᡤᡳ ᡤᡝᡵᡝᠨ ᠠᠮᠪᠠᠰᠠ ᠰᠠᡳᠰᠠᠮᡝ ᡩᠠᡥᠠᡶᡳ ᡠᡨᡥᠠᡳ ᡝᠮᡠ ᡠᡩᡠ ᠵᡠᠸᠠᠨ ᠮᠣᡵᡳᠩᡤᠠ ᠪᡝ ᡤᠠᡳᡶᡳ ᠴᠣᠣᡥᠠᡳ ᠵᡠᠯᡝᡵᡳ ᠵᡳᡶᡳ ᠸᡝᡳᠯᡝ ᠪᡝ ᠠᠯᡳᡵᡝ ᠵᠠᡴᠠᡩᡝ ᡝᠨᡩᡠᡵᡳᠨᠩᡝ ᡥᠠᠨ ᡩᠣᡵᠣᠯᠣᠮᡝ ᡤᠣᠰᡳᠮᡝ ᡴᡝᠰᡳ ᡳ ᠪᡳᠯᡠᠮᡝ ᠠᠴᠠᠮᡝ ᠵᠠᡴᠠᡩᡝ ᠮᡠᠵᡳᠯᡝᠨ ᠨᡳᠶᠠᠮᠠᠨ ᠪᡝ ᡨᡠᠴᡳᠪᡠᠮᡝ ᡤᡳᠰᡠᡵᡝᡥᡝ ᡧᠠᠩᠨᠠᠮᡝ ᠪᡠᡥᡝ ᡴᡝᠰᡳ ᡩᠠᡥᠠᡵᠠ ᠠᠮᠪᠠᠰᠠ ᡩᡝ ᠪᡳᡵᡝᠮᡝ ᡳᠰᡳᠨᠠᡥᠠ ᡩᠣᡵᠣᠯᠣᠮᡝ ᠸᠠᠵᡳᡥᠠ ᠮᠠᠩᡤᡳ ᡠᡨᡥᠠᡳ ᠮᡝᠨᡳ ᠰᡳᡨᠠᡥᡡᠨ ᠸᠠᠩ ᠪᡝ ᠠᠮᠠᠰᡳ ᡩᡠ ᡥᡝᠴᡝᠨ ᡩᡝ ᠪᡝᡩᡝᡵᡝᠪᡠᡶᡳ ᡳᠯᡳᡥᠠᡳ [ ] ᡩᡝ ᠵᡠᠯᡝᠰᡳ ᡤᡝᠨᡝᡥᡝ ᠴᠣᠣᡥᠠ ᠪᡝ ᠪᠠᡵᡤᡳᠨᡶᡳ ᠸᡝᠰᡳᡥᡡᠨ ᠪᡝᡩᡝᡵᡝᠮᡝ ᡳᡵᡤᡝᠨ ᠪᡝ ᠪᡳᠯᡠᡵᡝ ᡠᠰᡳᠨ ᡳ ᠸᡝᡳᠯᡝ ᠪᡝ ᡥᡠᠸᡝᡴᡳᠶᡝᠪᡠᡵᡝ ᠵᠠᡴᠠᡩᡝ ᡤᠣᡵᠣᡴᡳ ᡥᠠᠨᠴᡳᡴᡳ ᠰᠠᠮᠰᡳᡥᠠ ᡳᡵᡤᡝᠨ ᡤᡝᠮᡠ ᡩᠠᠰᠠᠮᡝ ᠵᡳᡶᡳ ᡨᡝᡥᡝᠩᡤᡝ ᠠᠮᠪᠠ ᡴᡝᠰᡳ ᠸᠠᡴᠠᠣ ᠠᠵᡳᡤᡝ ᡤᡠᡵᡠᠨ ᡩᡝᡵᡤᡳ ᡤᡠᡵᡠᠨ ᡩᡝ ᠸᡝᡳᠯᡝ ᠪᠠᡥᠠᡶᡳ ᡤᠣᡳᡩᠠᡥᠠ ᠰᠣᡥᠣᠨ ᡥᠣᠨᡳᠨ ᠠᠨᡳᠶᠠ ᡩᡠ ᠶᡠᠸᠠᠨᠰᡠᠸᠠᡳ ᠵᡳᠶᠠᠩᡥᡡᠩᠯᡳ ᠪᡝ ᡨᠠᡴᡡᡵᠠᡶᡳ ᠮᡳᠩ ᡤᡠᡵᡠᠨ ᡩᡝ ᠴᠣᠣᡥᠠ ᠠᡳᠰᡳᠯᠠᠮᡝ ᡤᡝᠨᡝᡥᡝᠩᡤᡝ ᡤᡳᡩᠠᠪᡠᡶᡳ ᠵᠠᡶᠠᠪᡠᡥᠠ ᠮᠠᠩᡤᡳ ᡨᠠᡳᡯᡠ ᡥᠣᡵᠣᠩᡤᡠ ᡥᠠᠨ ᡩᠠᠮᡠ ᠵᡳᠶᠠᠩᡥᡡᠩᠯᡳ ᠵᡝᡵᡤᡳ ᡠᡩᡠ ᠨᡳᠶᠠᠯᠮᠠ ᠪᡝ ᠪᡳᠪᡠᡶᡳ ᡤᡡᠸᠠ ᠪᡝ ᡤᡝᠮᡠ ᠠᠮᠠᠰᡳ ᠪᡝᡩᡝᡵᡝᠪᡠᡥᡝ ᡴᡝᠰᡳ ᡝᡵᡝᠴᡳ ᠠᠮᠪᠠᠨ ᠨᡳᠩᡤᡝ ᠠᡴᡡ ᡨᡠᡨᡨᡠ ᠣᠴᡳᠪᡝ ᠠᠵᡳᡤᡝ ᡤᡠᡵᡠᠨ ᡤᡝᠯᡳ ᠯᡳᠶᡝᠯᡳᠶᡝᡶᡳ ᡠᠯᡥᡳᠶᠠᡴᡡ ᠣᠵᠣᡵᠣ ᠵᠠᡴᠠᡩᡝ ᡶᡠᠯᠠᡥᡡᠨ ᡤᡡᠯᠮᠠᡥᡡᠨ ᠠᠨᡳᠶᠠ ᡝᠨᡩᡠᡵᡳᠩᡤᡝ ᡥᠠᠨ ᠵᡳᠶᠠᠩᠵᡳᠶᡡᠨ ᠪᡝ ᡨᠠᡴᡡᡵᠠᡶᡳ ᡩᡝᡵᡤᡳ ᠪᠠᠪᡝ ᡩᠠᡳᠯᠠᠨᠵᡳᡥᠠ ᠮᠠᠩᡤᡳ ᠮᡝᠨᡳ ᡤᡠᡵᡠᠨ ᡳ ᡝᠵᡝᠨ ᠠᠮᠪᠠᡳ ᡤᡝᠮᡠ ᠮᡝᡩᡝᡵᡳ ᡨᡠᠨ ᡩᡝ ᠵᠠᡳᠯᠠᠮᡝ ᡩᠣᠰᡳᡶᡳ ᡝᠯᠴᡳᠨ ᡨᠠᡴᡡᡵᠠᡶᡳ ᠠᠴᠠᡴᡳ ᠰᡝᠮᡝ ᠪᠠᡳᡥᠠ ᡝᠨᡩᡠᡵᡳᠩᡤᡝ ᡥᠠᠨ ᡤᡳᠰᡠᠨ ᠪᡝ ᡤᠠᡳᡶᡳ ᠠᡥᡡᠨ ᡩᡝᠣ ᡳ ᡤᡠᡵᡠᠨ ᠣᠪᡠᡶᡳ ᠪᠠ ᠨᠠ ᠪᡝ ᠶᠣᠣᠨᡳ ᠣᠪᡠᡥᠠ ᠵᡳᠶᠠᠩᡥᡡᠩᠯᡳ ᠪᡝ ᠨᡝᠮᡝᠮᡝ ᠠᠮᠠᠰᡳ ᠪᡝ ᠶᡝᡵᡝᠪᡠᡥᡝ ᡝᡵᡝᠴᡳ ᠠᠮᠠᠰᡳ ᡩᠣᡵᠣᠯᠣᡥᠣᠩᡤᡝ ᡝᠪᡝᡵᡝᡴᡝ ᠠᡴᡡ ᡝᠯᠴᡳᠨ ᡨᠠᡴᡡᡵᠠᡥᠠᠩᡤᡝ ᠯᠠᡴᠴᠠᡥᠠ ᠠᡴᡡ ᠪᡳᡥᡝ ᡴᡝᠰᡳ ᠠᡴᡡ ᠣᡳᠯᠣᡵᡳ ᡥᡝᠪᡝ ᡩᡝᡴᡩᡝᡶᡳ ᡶᠠᠴᡠᡥᡡᠨ ᡳ ᡨᠠᠩᡴᠠᠨ ᠪᠠᠨᡳᠨᠠᡶᡳ ᠠᠵᡳᡤᡝ ᡤᡠᡵᡠᠨ ᠵᡝᠵᡝᠨ ᡳ ᠠᠮᠪᠠᠰᠠ ᡩᡝ ᡤᠣᠴᡳᠰᡥᡡᠨ ᠠᡴᡡ ᡤᡳᠰᡠᠨ ᡳ ᠪᡳᡨᡥᡝ ᠠᡵᠠᡶᡳ ᡠᠩᡤᡳᡥᡝ ᡨᡝᡵᡝ ᠪᡳᡨᡥᡝ ᠪᡝ ᡝᠯᡝᠴᡳᠨ ᠵᡳᡥᡝ ᠠᠮᠪᠠᠰᠠ ᠪᠠᡥᠠᡶᡳ ᡤᠠᠮᠠᡥᠠ ᡝᠨᡩᡠᡵᡳᠩᡤᡝ ᡥᠠᠨ ᡥᠣᠨᠣ ᠣᠨᠴᠣᡳ ᡤᠠᠮᠠᠮᡝ ᡠᡨᡥᠠᡳ ᠴᠣᠣᡥᠠ ᠵᡳᡥᡝᡴᡡ ᠨᡝᠨᡝᠮᡝ ᡤᡝᠩᡤᡳᠶᡝᠨ ᡥᡝᠰᡝ ᠪᡝ ᠸᠠᠰᡳᠮᠪᡠᠮᡝ ᠴᠣᠣᡥᠠᠯᠠᡵᠠ ᡝᡵᡳᠨ ᠪᡝ ᠪᠣᠯᠵᠣᠮᡝ ᡩᠠᡥᡡᠨ ᡩᠠᡥᡡᠨ ᡳ ᡠᠯᡥᡳᠪᡠᡥᡝᠩᡤᡝ ᡧᠠᠨ ᠪᡝ ᠵᠠᡶᠠᡶᡳ ᡨᠠᠴᡳᡥᡳᠶᠠᡵᠠ ᠴᡳ ᡥᠣᠨᠣ ᡩᠠᠪᠠᠯᡳ ᡴᠠᡳ ᡨᡠᡨᡨᡠ ᠣᠴᡳᠪᡝ ᡤᡝᠯᡳ ᡠᡵᡤᡠᠨᠵᡝᠮᡝ ᡩᠠᡥᠠᡴᡡᠩᡤᡝ ᠠᠵᡳᡤᡝ ᡤᡠᡵᡠᠨ ᡳ ᡤᡝᡵᡝᠨ ᠠᠮᠪᠠᠰᠠᡳ ᠸᡝᡳᠯᡝ ᡝᠯᡝ ᡤᡠᠸᡝᠴᡳ ᠣᠵᠣᡵᠠᡴᡡ ᠣᡥᠣ ᡝᠨᡩᡠᡵᡳᠩᡤᡝ ᡥᠠᠨ ᡳ ᠠᠮᠪᠠ ᠴᠣᠣᡥᠠ ᠨᠠᠨ ᡥᠠᠨ ᠪᡝ ᡤᠠᡶᡳ ᡤᡝᠯᡳ ᡥᡝᠰᡝ ᠸᠠᠰᡳᠮᠪᡠᡶᡳ ᠨᡝᠨᡝᠮᡝ ᡝᠮᡠ ᡤᠠᡵᡤᠠᠨ ᡳ ᠴᠣᠣᡥᠠ ᡠᠩᡤᡳᡶᡳ ᡤᡳᠶᠠᠩ ᡩᡠ ᠪᡝ ᡤᠠᡳᡶᡳ ᠸᠠᠩ ᠨᡳ ᠵᡠᠰᡝ ᠰᠠᡵᡤᠠᠨ ᠠᠮᠪᠠᠰᠠ ᡥᡝᡥᡝ ᠵᡠᠰᡝ ᡤᡝᠮᡠ ᠵᠠᡶᠠᠪᡠᡥᠠ ᠮᠠᠩᡤᡳ ᡝᠨᡩᡠᡵᡳᠩᡤᡝ ᡥᠠᠨ ᡤᡝᡵᡝᠨ ᠵᡳᠶᠠᠩᠵᡳᠶᡡᠨ ᠪᡝ ᡠᠮᡝ ᠨᡝᠴᡳᡵᡝ ᡠᠩᠨᡝᡵᡝ ᠰᡝᠮᡝ ᡶᠠᡶᡠᠯᠠᡶᡳ ᠮᡝᠨᡳ ᡥᠠᡶᠠᠰᠠ ᡨᠠᡳᡤᡳᠶᠠᠰᠠ ᠪᡝ ᡨᡠᠸᠠᡴᡳᠶᠠᠪᡠᡥᠠ ᡨᡠᡨᡨᡠ ᠠᠮᠪᠠ ᡴᡝᠰᡳ ᠪᡝ ᡳᠰᡳᠪᡠᡵᡝ ᠵᠠᡴᠠᡩᡝ ᠠᠵᡳᡤᡝ ᡤᡠᡵᡠᠨ ᡳ ᡝᠵᡝᠨ ᠠᠮᠪᠠᠨ ᠵᠠᡶᠠᠪᡠᡥᠠ ᠵᡠᠰᡝ ᠰᠠᡵᡤᠠᠨ ᡤᡝᠮᡠ ᡶᡝ ᠨᠠᠨ ᡳ ᠣᡶᡳ ᡤᡝᠴᡝᠨ ᠨᡳᠮᠠᠩᡤᡳ ᡴᡡᠪᡠᠯᡳᡶᡳ ᠨᡳᠶᡝᠩᠨᡳᠶᡝᡵᡳ ᠣᡥᠣ ᠣᠯᡥᠣᠨ ᡥᡳᠶᠠ ᡶᠣᡵᡤᠣᡧᠣᡶᡳ ᡝᡵᡳᠨ ᡳ ᠠᡤᠠ ᠣᡥᠣ ᡤᡝᠰᡝ ᠠᠵᡳᡤᡝ ᡤᡠᡵᡠᠨ ᡳ ᡤᡠᡴᡠᡥᡝ ᠪᡝ ᡩᠠᠰᠠᠮᡝ ᠪᡳᠪᡠᡥᡝ ᠮᠠᡶᠠᡵᡳ ᡩᠣᡵᠣ ᠮᠠᡴᠴᠠᡥᠠ ᠪᡝ ᡩᠠᡥᡡᠮᡝ ᠰᡳᡵᠠᡥᠠ ᡩᡝᡵᡤᡳ ᠪᠠᡳ ᡧᡠᡵᡩᡝᠮᡝ ᡠᡩᡠᡩᡠ ᠮᡳᠩᡤᠠᠨ ᠪᠠᡳ ᠨᡳᠶᠠᠯᠮᠠ ᡤᡝᠮᡠ ᠪᠠᠨᠵᡳᠪᡠᡥᠠ ᡥᡠᠸᠠᡧᠠᠪᡠᡥᠠ ᡴᡝᠰᡳ ᡩᡝ ᡥᠣᡵᠣᠪᡠᡥᠠ ᡝᡵᡝ ᠶᠠᡵᡤᡳᠶᠠᠨ ᡳ ᠵᡠᠯᡝᡳ ᡴᠣᠣᠯᡳ ᡩᡝ ᠰᠠᠪᡠᡥᠠᡴᡡᠩᡤᡝ ᡴᠠᡳ ᡥᠠᠨ ᠰᡠᡳ ᠮᠣᡴᡝᡳ ᠸᡝᠰᡳᡥᡠᠨ ᠰᠠᠨ ᡨᡳᠶᠠᠨ ᡩᡠ ᠪᠠᡳ ᠵᡠᠯᡝᡵᡤᡳ ᡠᡨᡥᠠᡳ ᡝᠨᡩᡠᡵᡳᠩᡤᡝ ᡥᠠᠨ ᡳ ᡳᠰᡳᠨᠵᡳᡥᠠ ᠪᠠ ᡨᠠᠨ ᠰᠣᠣᡵᡳᠨ ᠪᡳ ᠮᡝᠨᡳ ᠰᡳᡨᠠᡥᡡᠨ ᡝᠵᡝᠨ ᠵᡠᡵᡤᠠᠨ ᡳ ᠨᡳᠶᠠᠯᠮᠠ ᡩᡝ ᡥᡝᠨᡩᡠᡶᡳ ᡨᠠᠨ ᠰᠣᠣᡵᡳᠨ ᠪᡝ ᠨᠣᠩᡤᡳᠮᡝ ᡩᡝᠨ ᠠᠮᠪᠠᠨ ᠪᠠᡩᠠᡵᠠᠪᡠᡶᡳ ᡤᡝᠯᡳ ᠸᡝᡥᡝ ᠪᡝ ᡤᠠᡳᡶᡳ ᠪᡝᡳ ᡳᠯᡳᠪᡠᡶᡳ ᡝᠨᡨᡝᡥᡝᠮᡝ ᠪᡳᠪᡠᠮᡝ ᡝᠨᡩᡠᡵᡳᠩᡤᡝ ᡥᠠᠨ ᡳ ᡤᡠᠩ ᡝᡵᡩᡝᠮᡠ ᠪᡝ ᠠᠪᡴᠠ ᠨᠠ ᡳ ᠰᠠᠰᠠ ᠣᡴᡳᠨᡳ ᠰᡝᠮᡝ ᡨᡝᠮᡤᡝᡨᡠᠯᡝᡥᡝ ᡝᡵᡝ ᠮᡝᠨᡳ ᠠᠵᡳᡤᡝ ᡤᡠᡵᡠᠨ ᡳ ᡨᡝᡳᠯᡝ ᠵᠠᠯᠠᠨ ᡥᠠᠯᠠᠮᡝ ᡝᠨᡨᡝᡥᡝᠮᡝ ᠠᡴᡩᠠᡶᡳ ᠪᠠᠨᠵᡳᡵᡝ ᠠᠩᡤᠠᠯᠠ ᠠᠮᠪᠠ ᡤᡠᡵᡠᠨ ᡳ ᡤᠣᠰᡳᠨ ᠮᠠᠩᡤᠠ ᡥᠣᡵᠣᠨ ᡳ ᠶᠠᠪᡠᠨ ᡩᡝ ᡤᠣᡵᠣᡴᡳ ᠴᡳ ᠠᠨᠠᠮᡝ ᡤᡝᠮᡠ ᡩᠠᡥᠠᡵᠠᠩᡤᡝ ᡳᠨᡠ ᡝᡵᡝᠴᡳ ᡩᡝᡵᡳᠪᡠᠮᠪᡳ ᡴᠠᡳ ᡠᡩᡠ ᠠᠪᡴᠠ ᠨᠠ ᡳ ᠠᠮᠪᠠᠨ ᠪᡝ ᠠᡵᠠᡥᠠ ᡧᡠᠨ ᠪᡳᠶᠠ ᡳ ᡤᡝᠩᡤᡳᠶᡝᠨ ᠪᡝ ᠨᡳᡵᡠᡥᠠ ᠰᡝᠮᡝ ᡨᡝᡵᡝᡳ ᡨᡠᠮᡝᠨ ᡩᡝ ᡝᠮᡠ ᡳᠨᡠ ᡩᡠᡳᠪᡠᠯᡝᠴᡳ ᠣᠵᠣᡵᠠᡴᡡ ᡥᠣᠨᠣ ᠮᡠᠸᠠᡧᠠᠮᡝ ᡶᠣᠯᠣᠮᡝ ᡨᡝᠮᡤᡝᡨᡠᠯᡝᡵᡝᠩᡤᡝ ᠠᠪᡴᠠ ᡤᡝᠴᡝᠨ ᠰᡳᠯᡝᠩᡤᡳ ᠪᡝ ᠸᠠᠰᡳᠮᠪᡠᡶᡳ ᡶᡠᠨᡩᡝᡥᡠᠨ ᠣᠪᡠᡥᠣ ᠪᡝ ᠪᠠᠨᠵᡳᠪᡠᠮᠪᡳ ᡝᠨᡩᡠᡵᡳᠩᡤᡝ ᡥᠠᠨ ᡝᡩᡝ ᠠᠴᠠᠪᡠᠮᡝ ᡥᠣᡵᠣᠨ ᡝᡵᡩᡝᠮᡠ ᠪᡝ ᠰᠠᠰᠠ ᠰᡝᠯᡤᡳᠶᡝᠮᠪᡳ ᡝᠨᡩᡠᡵᡳᠩᡤᡝ ᡥᠠᠨ ᡩᡝᡵᡤᡳ ᠪᠠᠪᡝ ᡩᠠᡳᠯᠠᡥᠠ ᠵᡠᠸᠠᠨ ᡨᡠᠮᡝᠨ ᠴᠣᠣᡥᠠ ᡴᡠᠩᡤᡠᡵᡳ ᠰᡝᠮᡝ ᡤᡝᡵᡝᠨ ᡨᠠᠰᡥᠠ ᡦᡳ ᡤᡠᡵᡤᡠ ᡳ ᡤᡝᠰᡝ ᠸᠠᡵᡤᡳ ᠠᠮᠠᡵᡤᡳ ᡤᡠᡵᡠᠨ ᡤᡝᠮᡠ ᠠᡤūᡵᠠ ᠪᡝ ᠵᠠᡶᠠᡶᡳ ᠵᡠᠯᡝᡵᡳ ᠣᠵᠣᡵᠣ ᠪᡝ ᡨᡝᠮᡧᡝᡵᡝᠩᡤᡝ ᡥᠣᡵᠣᠨ ᠠᠮᠪᡠᠯᠠ ᡤᡝᠯᡝᠴᡠᡴᡝ ᡴᠠᡳ ᡝᠨᡩᡠᡵᡳᠩᡤᡝ ᡥᠠᠨ ᡠᠮᡝᠰᡳ ᡤᠣᠰᡳᠨ ᠣᡶᡳ ᡤᠣᠰᡳᠮᡝ ᠸᠠᠰᡳᠮᠪᡠᡥᠠ ᡥᡝᠰᡝ ᡤᡳᠰᡠᠨ ᠵᡠᠸᠠᠨ ᠵᡠᡵᡤᠠᠨ ᡳ ᠸᠠᠰᡳᠮᠪᡠᡥᠠ ᠪᡳᡨᡥᡝ ᡥᠣᡵᠣᠩᡤᠣ ᠪᡳᠮᡝ ᡥᡡᠸᠠᠯᡳᠶᠠᠠᠰᡠᠨ ᡩᠠᡩᡝ ᠯᡳᠶᡝᠯᡳᠶᡝᡶᡳ ᠰᠠᡵᡴᡡ ᠣᡶᡳ ᠪᡝᠶᡝ ᠵᠣᠪᠣᠯᠣᠨ ᠪᡝ ᠪᠠᡳᡥᠠ ᡝᠨᡩᡠᡵᡳᠩᡤᡝ ᡥᠠᠨ ᡳ ᡤᡝᠩᡤᡳᠶᡝᠨ ᡥᡝᠰᡝ ᡳᠰᡳᠨᠵᡳᡵᡝ ᠵᠠᡴᠠᡩᡝ ᠠᠮᡥᠠᡶᡳ ᡨᡝᠨᡳ ᡤᡝᡨᡝᡥᡝ ᡤᡝᠰᡝ ᠮᡝᠨᡳ ᠸᠠᠩ ᡤᠠᡳᡶᡳ ᡩᠠᡥᠠᡥᠠᠩᡤᡝ ᡥᠣᡵᠣᠨ ᡩᡝ ᡤᡝᠯᡝᡵᡝ ᡨᡝᡳᠯᡝ ᠸᠠᡴᠠ ᡝᡵᡩᡝᠮᡠ ᡩᡝ ᡩᠠᡥᠠᡥᠠᠩᡤᡝ ᡴᠠᡳ ᡝᠨᡩᡠᡵᡳᠩᡤᡝ ᡥᠠᠨ ᡤᠣᠰᡳᡶᡳ ᡴᡝᠰᡳ ᡳᠰᡳᠪᡠᠮᡝ ᡩᠣᡵᠣᠯᠣᠮᡝ ᠰᠠᡳᠨ ᠴᡳᡵᠠ ᡳᠨᠵᡝᡵᡝ ᠠᡵᠪᡠᠨ ᡳ ᠠᡤᡡᡵᠠ ᠪᡝ ᠪᠠᡵᡤᡳᠶᠠᡶᡳ ᠰᠠᡳᠨ ᠮᠣᡵᡳᠨ ᠸᡝᡳᡥᡠᡴᡝᠨ ᡩᠠᡥᡠᡧᠠᠩᠨᠠᡵᠠ ᠵᠠᡴᠠᡩᡝ ᡥᡝᠴᡝᠨ ᡳ ᡥᠠᡥᠠ ᡥᡝᡥᡝ ᡠᠴᡠᠯᡝᠮᡝ ᠮᠠᡴᡨᠠᡵᠠᠩᡤᡝ ᠮᡝᠨᡳ ᠸᠠᠩ ᠨᡳ ᠪᠠᡥᠠᡶᡳ ᠪᡝᡩᡝᡵᡝᡥᡝᠩᡤᡝ ᡝᠨᡩᡠᡵᡳᠩᡤᡝ ᡥᠠᠨ ᡳ ᠪᡠᡥᡝᠩᡤᡝ ᡴᠠᡳ ᡝᠨᡩᡠᡵᡳᠩᡤᡝ ᡥᠠᠨ ᠮᡝᠨᡳ ᡳᡵᡤᡝᠨ ᠪᠠᠨᠵᡳᡴᡳᠨᡳ ᠰᡝᠮᡝ ᠴᠣᠣᡥᠠ ᠪᡝ ᠪᡝᡩᡝᡵᡝᠪᡠᡥᡝ ᠮᡝᠨᡳ ᡶᠠᠴᡠᡥᡡᠨ ᠣᡥᠣ ᠰᠠᠮᠰᡳᡥᠠ ᠪᡝ ᡤᠣᠰᡳᠮᡝ ᠮᡝᠨᡳ ᡠᠰᡳᠨ ᡳ ᠸᡝᡳᠯᡝ ᠪᡝ ᡥᡠᠸᡝᡴᡳᠶᡝᠪᡠᡥᡝ ᡝᡶᡠᠵᡝᡥᡝ ᡤᡠᡵᡠᠨ ᡩᡝ ᠠᠨ ᡳ ᠣᡥᠣᠩᡤᡝ ᡝᡵᡝ ᡳᠴᡝ ᡨᠠᠨ ᡳ ᡨᡠᡵᡤᡠᠨ ᡴᠠᡳ ᠣᠯᡥᠣᡥᠣ ᡤᡳᡵᠠᠩᡤᡳ ᡩᡝ ᡩᠠᠰᠠᠮᡝ ᠶᠠᠯᡳ ᠪᠠᠨᠵᡳᠪᡠᡥᠠ ᡨᡠᠸᡝᡵᡳ ᠣᡵᡥᠣ ᡳ ᡶᡠᠯᡝᡥᡝ ᡤᡝᠯᡳ ᠨᡳᠶᡝᠩᡤᠨᡳᠶᡝᡵᡳ ᡝᡵᡳᠨ ᠪᡝ ᡠᠴᠠᡵᠠᡥᠠ ᡤᡝᠰᡝ ᠣᡥᠣ ᠠᠮᠪᠠ ᡤᡳᠶᠠᠯᡳ ᠨᡳ ᡩᠠ ᠵᠠᡴᠠᡩᡝ ᡩᡝᠨ ᠠᠮᠪᠠ ᠸᡝᡥᡝ ᡳᠯᡳᠪᡠᡶᡳ ᠰᠠᠨ ᡥᠠᠨ ᡳ ᠪᠠ ᡨᡠᠮᡝᠨ ᠠᠨᡳᠶᠠ ᠣᠵᠣᡵᠣᠩᡤᡝ ᡝᠨᡩᡠᡵᡳᠩᡤᡝ ᡥᠠᠨ ᡳ ᠰᠠᡳᠨ ᡩᡝ ᡴᠠᡳ ᠸᡝᠰᡳᡥᡠᠨ ᡝᡵᡩᡝᠮᡠᠩᡤᡝᡳ ᡩᡠᡳᠴᡳ ᠠᠨᡳᠶᠠ ᠵᠣᡵᡥᠣᠨ ᠪᡳᠶᠠᡳ ᡳᠴᡝ ᠵᠠᡴᡡᠨ ᡩᡝ ᡳᠯᡳᠪᡠᡥᠠ