Wp/mfa/Keteboh
Keteboh (Arak: خُطْبَة, khuṭba) ni so acaro dalae Islae nok buwi dakwoh ko orae awae. Orae hok jóng buwi keteboh ni orae ggela yo tók koték. khatib
Keteboh ni bendo hok ttetak doh dalae mazehak-mazehak dalae Islae. Yo skalo buwak duwo kali sbelóng mmayae Jemaãk. Tapi ado jugok keteboh slepah mmayae ari rayo yakni Rayo Poso nga Rayo Korebae, slepah mmayae grehano ttari nga bulae, dae slepah mmayae mitok ujae.
Keteboh Jemaãk
[edit | edit source]
Keteboh Jemaãk ni so istiloh hok ruju' ko duwo keteboh hok nyo ssapa di tók koték sbelóng mmayae Jemaãk. Ahli Sunnoh Waljemooh sluróh duniyo ppakak doh keteboh ni keno buwi jugok ttiko Jemaãk. Keteboh hok nyo buwi ado syarak-syarak diyo, bohkae nok jadi tók koték póng ado syarak khah diyo. Keteboh Jemaãk nyo ssapa sbelóng mmayae Jemaãk, llepah bae lohó. Mmayae Jemaãk wak ttiko waktu lohó ari Jemaãk.
Keteboh Jemaãk skalo tepak nok buwi pesaenae ko orae rama. Skalo nyo kkaék nga isu smaso nga ibadak agamo ikók muséng macae ttiko bulae poso nga muséng haji. Mesejék hok tepak wak mmayae Jemaãk skalo wak kak ssejék besa, orae ggela yo "Ssejék Jamek".
Keteboh ni woh nngelah yo skalo dengae doõ nga slawak katah Nabi Muhammad, lepah tu mmayae duwo rokaãk, tók imae baco dengae kuwak srupo mmayae alék malae (ggorék nga iso).