Wp/mfa/Kapóng Jenók

Kapóng Jenók

Kampung Jenob
Kapóng Jenók Kampung Jenob
Kapóng
	Kapóng Jenók Kedudókkae Kapóng Jenók kak Klatae Kapóng Jenók Kapóng Jenók (Melèsiya)
	Coordinates: 5°49′20.8″N 101°52′56.9″E / 5.822444°N 101.882472°E
Negaro	Melèsiya
Negeri	Klatae
Jajohae	Tanoh Meroh
Dèkroh	Jedok
Mukéng	Nibóng

Kapóng Jenók ata Pekalae Jenók^[1] ni sbuté kapóng hok dudók dalae mukéng Nibóng, dèkroh Jedok, Tanoh Meroh, Klatae, Melèsiya. Kapóng ni dók ttepi sunga Golok, tletok dekak dengae Bukék Bungo. Nyo kato nak-nak ari Slaso nga Saktu, pekalae ssini rama orae kih nok jemerae sunga nok gi bbeli kak pekae Baók.^[1] Kapóng ni jugok dekak denga Wèng nga Bukék Ta hok lloni dók dalae Siyae.

Asa usó

Namo Jenók mmari dari sorae ni namo yo Jenub gi troko umbak ssitu dalae 200 tahóng dulu. Yo mmari dari Yala kih Yala ttiko tu keno becano alae, punoh abih rumoh nga tanaemae. Jenub nga bini yo póng nok pindoh gi tepak laéng, sapa la kak so pekalae ni. Yo póng buwak la so pondok kecik dekak nga kkalae tu.

Orae kapóng ssitu dok brani guno kkalae ni kih pok yo ccayo kkalae tu asa yo sbuté moro muara‍ sunga, kolo tu ado penunggu yakni boyo putéh sèko. Pok yo pakak maroh la Jjenub tu kih yo dèdè jah bèno pondok ssitu, pah tepak tu nyo wak mandi, bbasóh nga nngaé pulok. Orae kapóng rusing kalu boyo putéh tu nngamok kih ko krijoae Jenub, abih sbuté kapóng keno becano. Jenub nga bini yo tok ccaro póng orae kapóng dók tego, biya la keno kato póng.

Ado so ari ttiko Jenub nga bini yo dók mandi kak kkalae tu, kaba-kaba ujae panah. Pah mucó muncul‍ la boyo putéh sèko atah aé, kkoho mari dekak Jenub nga bini yo dók ralék mandi. Boyo tu dekak doh, tapi diyo beduwo tok takók póng. Boyo dók ddepae Jenub, Jenub prati jah, boyo tu póng takdok buwak ggapo-gapo. Pah ttiko boyo dekak bena nga Jenub, buléh Jenub bela membelai‍ boyo tu srupo bela budok kecik. Tok lamo tu póng, boyo tu teruh ilae. Krijoae Jenub dók bela boyo tu nyo keléh kokrae kapóng. Pah abih kecó so kapóng crito pasa Jenub, tapi tok rama póng ccayo crito tuh. Jenub braso pelék bakpo orae tok brani nngadak boyo tu.

Smènggu slepah tu ujae panah lagi, Jenub keló orae kapóng gi kkalae nok buwi bukti ggapo hok orae crito tu bendo sngoti. Tok lamo lepah ujae tu, tubék la boyo putéh tu pah gi ddekak Jenub hok dók mandi ssunga tu. Jenub teruh ggosok badae boyo tu blae-blae orae kapóng dók prati. Jok tu la orae kapóng ccayo nga crito Jenub, pah tok takók doh nok guno kkalae tu.

Lamo slepah pristiwo tu, Jenub nga bini yo póng nningga. Nok buwi ingak jaso Jenub, orae kapóng pakak stuju nok wi namo moro sunga tu sbaga Pekalae Jenub.^[1]

Ruju'ae

1 2 3 Mohd Roselan Abd. Malek (1993). Salasilah Nama Tempat Negeri Kelantan Darul Naim. Petaling Jaya: Penerbit Prisma Sdn. Bhd. pp. 38–41.

[salasilah-1] 1 2 3 Mohd Roselan Abd. Malek (1993). Salasilah Nama Tempat Negeri Kelantan Darul Naim. Petaling Jaya: Penerbit Prisma Sdn. Bhd. pp. 38–41.

[1]