Wp/mfa/Bèkwoh

Bèkwoh ata kiyasae kiasan‍  yo makae pulók ata makae gula (Kècèk Nnayu: Kenduri) ni mejeléh nok jjamu makae ko orae rama. Skalo orae buwak bèkwoh ni kih ado bendo macae mejeléh nnikoh nga mejeléh kesyukórae. Orae ccayo pekatoae 'bèkwoh' ni asa dari pekatoae kécék Inggrih big work, dokpóng dari pekatoae berarwah yakni wak makae kih ado orae nningga.

Caro-caro bèkwoh

Sbelóng nok buwak bèkwoh ni, tuwae hok nok wak bèkwoh keno pacok ari dulu biya buléh agae mmolèk dae nok buwi kaba jepuktae ko orae. Orae nok buwak bèkwoh ni skalo gi mmadoh yakni gi mari rumoh woréh-waroh nok jepuk gi bèkwoh.

Kalu ikók labok, nok buléh ko ado bèkwoh ni keno ado krijo bratae dari orae rama, samo ado masyarakak stepak atapóng tepoh katering. Dalae bèkwoh ni ado jóng gula yakni tukae masok ttiko bèkwoh. Ado pulok jóng kako yakni orae hok keno akak hidaengae ko orae.

Ttiko bèkwoh jugok skalo ado blarok, yakni rombongae orae hok nnikoh jjalae skali nga woréh-waroh nga saéng rapak. Orae hok mari bèkwoh buléh siso yakni buwoh tangae dari tuwae rumoh.

Jenih orae hok mari bèkwoh

Kalu ado leba hok jenih suko mari bèkwoh, orae ggela diyo leba pulók. Leba pulók ni gelarae ko tók leba hok jenih brèhi bena mari bèkwoh nok makae smato.

Pah ado jugok orae hok buwi nngelae yakni pitih hadiyoh ko bèkwoh nnikoh. Skalo sbelóng nok gi bèkwoh ado hok tanyo dulu ado nngelae ko dok, kalu dok gak kironyo gi makae jah takdok salae kaók.