Wp/mag/मोहिनी

मोहिनी
‌ मोह आउ वासनाके देवी
विश्व मोहित करे वाली श्री विष्णुके अवतार देवी मोहिनी
सम्बन्ध	विष्णुके अवतार, अमृतके वितरक
अस्त्र	मोहकता, सुदर्शन चक्र

मोहिनी हिन्दु भगवान् विष्णुके एकमात्र स्त्री अवतार हथिन । एकरामे उनका ऐसन स्त्री रूपमे देखावल गेलै हे जे सबके मोहित कर ले । उनकर मोहमे वशीभूत होके कौनौ सब भूला जा है । ई अवतारके उल्लेख महाभारतोमे आवऽ है । समुद्र मन्थनके समय जखनी देवता आउ असुरके सागरसे अमृत मिल गेलै हल, तखनी देवताके ई डर हलै कि असुर कहुँ अमृत पीके अमर न हो जाए । तखनी ऊ भगवान् विष्णुके पास गेलन आउ प्रार्थना कैलन कि ऐसन होवेसे रोकथिन । तखनी भगवान् विष्णु मोहिनी अवतार लेके अमृत देवताके पिऔलन आउ असुरके मोहित करके अमर होवेसे रोकलन ।

मोहिनी अवतार आउ भस्मासुर

भस्मासुर पौराणिक कथामे ऐसन दैत्य हलै जे भगवान् शिवसे वरदान माङ्गकै हल कि ऊ जेकर सिर पर हाथ रखतै, ऊ भस्म हो जैतै । कथाके अनुसार भस्मासुर ई शक्तिके गलत प्रयोग शुरू कैलकै आउ स्वयं शिवजीके भस्म करे चललै । शिवजी विष्णुजीसे सहायता माङ्गलन । विष्णुजी एक सुन्दर स्त्रीके रूप धारण कैलन, भस्मासुरके आकर्षित कैलन आउ नृत्यला प्रेरित कैलन । नृत्य करैत समय भस्मासुर विष्णुए जी नियन नृत्य करे लगलै आउ उचित मौका देखके विष्णुजी अपन सिर पर हाथ रखलन, जेकर नकल शक्ति आउ कामके नशामे चूर भस्मासुरो कैलकै । भस्मासुर अपने वरदानसे भस्म हो गेलै ।

समुद्र मन्थन आउ मोहिनी अवतार

मुख्य लेख: समुद्र मन्थन

मोहिनी देवताक अमृत पियावैत हथिन (बामा); असुर अखनी प्रतीक्षा करैत हे (दहिना) ।

समुद्र मन्थनके दौरान अन्तिम रत्न अमृत कलश लेके भगवान् विष्णु धन्वन्तरि रूपमे प्रकट होलै । असुर भगवान् धन्वन्तरिसे अमृत कलश लेके भाग गेलै त विष्णु धन्वतरि रूपके त्यागके एक नारीके रूप लेलन । ऊ बड़ी सुन्दर हल । ऊ नारीके नाम मोहिनी रखल गेलै । मोहिनी असुरसे अमृत लेलकै आउ देवताके पास गेलै । ऊ असुरके अपना दन्ने मोहित कर लेलकै आउ देवताके अमृत पियावे लगलन । मोहिनी रूपी विष्णुके चाल स्वरभानु नामके दानव बुझ गेलै आउ ऊ देवताके भेस लेके अमृत पीए चल गेलै । मोहिनीके जखनी ई बात पता चललै त ऊ स्वरभानुके सिर सुदर्शन चक्रसे काट देलन किन्तु तखनी तक ओकर गलासे अमृतके घोँट नीचे चल गेलै आउ ऊ अमर हो गेलै आउ राहुके नामसे ओकर सिर आउ केतुके नामसे ओकर धड़ प्रसिद्ध होलै ।