Wp/lus/Sumrèlna

Sumrèlna (Sâp ṭawngin: economics) hi bungrua, hnarel leh sum-chang thildang hrim hrim siamchhuahna, semdarhna leh hmanralna chanchin zirna a ni. Ram leh hnam emaw khawvêl pum sumrel bihchianna leh zirzauna, leh a tihmasawn tùra kawng zawnna zirna péng a ni.

Sap ṭawng thumal economics tih hi sap ṭawng thumal dang economy tih leh thuhnungbet -ics tih aṭanga lo kal a ni a. He thumal economy tih hi kum zabi 15-naa ferên thumal économie tih aṭanga lâk, chu chu Grik thumal οἰκονομία (oikonomia) tih aṭanga lo kal leh chhawng a ni. He Grik thumal οἰκονομία tih hi chhungkaw enkawlna, chhungkaw hmakhaw rèlna, emaw rorèlna tihna a ni.

Hë zirnapéng tum ber chu sumrel hrang hrang inkhawih tawn dàn leh nungchang zir a ni.

Tunlai hrilhfiahna

He zirnapéng hi sâp finrilnazirmi John Stuart Mill-a chuan heti hian a lo hrilhfiah:

“

Sumrèlna chu mihringten tum leh beiseina dang hranpa nei lova hausakna siam chhuah an tumna kawnga vantláng nun insawi danglam dàn leh khawtlang nun a nghawng dàn zirna a ni.

”

tiin. Hei hi vantlang nun nen a inkaihhnawihna la liana hrilhfiahna a ni.

Tunlaia sawichhàwn hlawh tak hrilhfiahna chu Alfred Marshall-a'n a lehkhabu Principles of Economics-a a hrilhfiahna hi a ni:

“

Sumrèlna chu nitin nunrama mihring khawsakphung zirna hi a ni. A sum hmuh dàn leh hmanral dàn te a zirchiang a. Chuvang tak chuan kawng khatah chuan hausakna zirna a ni a, kawng lehlam, leh kawng pawimawh zâwkah chuan, mihring zirchianna a ni.

”

tiin.