Wp/lus/Sawnpinga

From Wikimedia Incubator
< Wp‎ | lusWp > lus > Sawnpinga
Jump to navigation Jump to search
Mizo thạwnthü
Sawnpinga

lemziak tàrna

Langvète

Changtupâ: Sawnpinga

Thawnthu kalhmang

Savain mal a sàwm

Sawnpinga hi Mizo thawnthu pakhat a ni.

A thawnthu[edit]

Hmanlai hian pa pakhat hmelchhe deuh mai hi a awm a, a hming chu Sawnpinga a ni a. A hmelchhiat em avangin nupui pawh a hmu zo lo va. Nulate reng reng chuan a ngaihmelh ang tih an hlau va, a lawm pawh an lawm duh ngai lo va. Sawnpianga chu a khua a har em em mai thin a. A khawhar chuan sava a veh a veh thin a, a perh tla thei em em mai a. Sava sain a chhungte chu a hrai puar reng hi a ni ngawt mai a.

Vawi khat chu sava vehin ramhnuaiah a kal a, sava mak tak leh danglam tak mai pakhat hi a hmu fuh ta hlauh mai a. Chu sava chu a perh dawn lai chuan sava te chuan, “Na miah lovim min perh la, thial maih lovin min ei la, sang miah lovin min e chhuak leh la, tuk thum tukah min rawn en la i nupui atan min nei dawn nia,” a ti ta reuh va. Sawnpinga chu a inngaihtuah vang vang a. “Awle,” a ti a. Chu sava te chu na miah lovin a perh a, thial miah lovin a ei leh ta vek a. Sang miah lovin a e chhuak leh ta a.

A tuk thum tukah chuan eng tak lo thleng ang maw tia ngaihtuah neuh neuh chungin a ekna hmun lamah chuan a zu kal a, a beisei loh deuh maiin a ek chu nula hmeltha em em maiah a lo chang a. A inah a hruai hawng a, nupui atan a nei ta a. Sawnpinga nupui chu a hmeltha si a, mite chuan a hmelthatzia thu chu an sawi luai luai reng a, “Sawnpingate ang han neih chu a duhtui lo mang tak e,” an ti thin a. Sawnpingate nupa chu an inhmangaih khawp mai a. An feh kal turte hi an innghak zel a, an kal dun rial rial thin a.

Hmelchhe dang[edit]

An khuaah chuan Sawnpinga ang bawka hmelchhia leh to lo tlangval pakhat hi a awm ve bawk a. Sawnpinga nupui neih hma chuan kawm tur dang nei hek lo, an inkawm rawt reng a. Sawnpinga’n nupui a neih takah chuan kawm tur reng reng a hre ta lo va. Sawnpinga nupui chu a’n en thin a, a awt ngawih ngawih mai a, neihsak dan tur ngawt a ngaihtuah a. Sawnpinga hnenah chuan, “Sawnping, engtin nge i tih bik, i nupui neih dan thuruk hi min hrilh rawh khai?,” a ti a. Sawnpinga chuan savain a lo tih dan zawng zawngte kha a hrilh ve ta vek a. Tichuan, ani pawh chu ramah a va kal a, Sawnpinga tawn ang tawn ngei tum chuan a vak a vak a.

Tihdàn zir thiam lo[edit]

A vanneiha siamin sava mak danglam tak chu a va hmu ve ta a. Perh a tum lai chuan sava te chuan, “ Na miah lovin min perh la, thial miah lovin min ei la, sang miah lovin min e la. Tuk thum tukah min rawn en la min nei dawn nia,” a lo ti ve a.

Tichuan, an perh ta a. Sawnpinga ang khan thiam ve hek lo, na deuhvin a perh a, thial lova ei tur a nih laiin a ruh leh a tite chu a thial ta buaih buaih mai a. A ek a lo chhuak a, sang lova ek tur a nih laiin, a ek lo khal bawk nen a sang ta vak mai a. A tuk thum tukah chuan beisei nei tak maiin a ek chu a zuk en ve a, nu thur re ru hmelchhe em em mai hi a lo awm ngut mai a. Hmeichhe dang hmu chuang hek lo, tui lo deuhvin a hawn ve ta a. Sawnpinga chungah chuan a thin a ur em em mai a, Sawnpinga chu a mawhpuh vek a, a nupui neihsak dan tur chu a ngaihtuah leh ta a.

Vawi khat chu thing put puiah a zuk sawm a, Sawnpinga chuan a lo remti ve mai bawk a. Tichuan ramhnuaiah thing pu tur chuan an kal ta a. Thing chu a han kit a, a tlukna lam turah chuan Sawnpinga chu a awmtir tlat a, thing chuan Sawnpinga chu a delh ta a. Chu veleh a hawsan ta daih a. Sawnpinga nupui chuan a lo haw har tawh ma’nge tiin a lo thlir reng a. A thianpa lo haw hnu pawha a rawn haw tak lohvah chuan ramhnuaiah a va kal ve a, Sawnpinga chu a va zawng a. “Sawnping ” tiin a au va, Sawnpinga lah chu che thei hek lo a awmna hmun atang chuan, “Ei ah! ” a lo ti thin a. A tawp a tawpah chuan a va zawng hmu ta a. Hlim takin an haw duh leh ta a.

Thulâkna[edit]