Wp/lus/Ludwig Tieck

Ludwig Tieck-a (1773, Ţomir thla ni 31-1853, Ţau thla ni 28) hi zerman hla phuah thiam, ţawng lettu, ziakmi leh kum zabi 18 leh kum zabi 19 tir lama Romantic Movement puipate zinga mi a ni.

A nun chawmhma lam

Tieck-a hi Berlin khuaah hruihruala eizawng chhungkuaah a lo piang a. Friedrich Werdersche Gymnasium (sikul) leh Halle, Göttingen leh Erlangen Zirnainsang-ah te a inzir chho va. Göttingen-ah hian Shakespeare-a thuziak leh Lalnu Elizabeth-i hunlaia lemchan an ziahhote a zir a ni.

Kum 1794 khan lehkhaziaka eizawn tumin Berlinah a lêt leh a. Straussfedern thawnthu khawnkhawmah thawnthu tawi tam tak a thawh chho ţan a. Abdallah tih hi kum 1796-ah ziakin kum 1795-1796 chho khan William Lovell tih a ziak bawk a ni.^[1]

Romanticism a luh

Romanticism lama a tui hi Volksmärchen von Peter Lebrecht tiha a thawnthu ziah aţangin a hmuh theih. Heta a thawnthu lar tak chu lasi thawnthu rawngkai deuh tak Der Blonde Eckbert tih thawnthu tawi hi a ni.

Kum 1789 khan Jena-ah a inbengbel a, tah chuan unau pahnih August Wilhelm von Schlegel leh Friedrich von Schlegel leh hla phuah thiam Novalis-a nen Zerman romanticism hruaitu tih theih chan an chang a. Hetih hun chhova a thuziak larte chu Prinz Zerbino (1799), Romantische Dichtungen (1799-1800) tih te a ni^[2].

A hun hnuhnung lam

A hun laia Zermanrama thawnthu, hla leh thawnthu tawi tam tak a ziak chho va. A hun chawhnu lamah erawh chuan August Wilhelm von Schlegela'na Zerman ţawnga William Shakespeare-a thuziakho a lehlinnaa editor chan changin a hun a hmang deuh ber^[3]. Kum 1841 khan Friedrich Wilhelm IV (Prussia lal) chuan Berlin lama khawsa tùrin a sawm a. Hetah hian pension neiin hun hlimawm tak a hmang a. Kum 1853, ţau thla ni 28 khan Berlin-ah a boral a ni.

A pawimawhna

A thuziak lar, mipuite ngaihhlut em emte bâkah hian Romanticism lama sulsutu a nihna hi a pawimawhna langsar tak pakhat a ni a. Zerman rimawi ziaktu lar Richard Wagnera opera Tannhäuser tih hi Tieck-a Phantasua behchhana phuah a ni nghe nghe.

A kutchhuak ţhenkhat

Der blonde Eckbert (thawnthu tawi)
Der Pokal (thawnthu tawi)
Die Elfen (thawnthu tawi)
Dichterleben (thawnthu)
Altenglisches Theater (lemchan khawnkhawm)
Leben und Tod der heiligen Genoveva (hlaril)
Leben und Tod des kleinen Rotkäppchens (hlaril)

Thulâkna

↑ R Köpke, Ludwig Tieck (bu 2, kum 1855-a chhuah)
↑ J Minor, Tieck als Novellendichter, (kum 1884)
↑ H von Friesen, Ludwig Tieck. Erinnerungen (bu 2,kum 1871)

[1] R Köpke, Ludwig Tieck (bu 2, kum 1855-a chhuah)

[2] J Minor, Tieck als Novellendichter, (kum 1884)

[3] H von Friesen, Ludwig Tieck. Erinnerungen (bu 2,kum 1871)

[1]

[2]

[3]