Wp/lld/Max Tosi

From Wikimedia Incubator
< Wp‎ | lldWp > lld > Max Tosi
Jump to navigation Jump to search
Articul por Ladin Gherdëina Val Gardena dall'alto.JPG
Max Tosi

Max Tosi ie nasciù dl 1913 da familia furlana a Villanova Marchesana (RO) y ie ruvà per gaujes de lëur a abité a Maran.

Si oma, la maestra Telene Canell, ti à dat inant n gran amor per i lingac y davia che I univa ai frësc te Gherdëina via per l instà, à Max Tosi mparà l ladin de Gherdëina, che ël ratova si vëir lingaz dl' ana. Bele cun chindesc ani scrijovel si prima cumposizion lirica per ladin "Ansciuda inviërnela".

L à studià leteratura y lingac a Milan y daldò al nsenià materies letereres a Maran, ulache l à metù su cun la professëura Tresl Gruber la "Union Culturela di Ladins a Maran" dl 1945. L ie nce stat l prim che se à cruzià che l vënie fat trasmiscions tl radio per ladin. Dl 1946 al dat ora la revista ladina "Popul ladin", che ël nstës spartiva ora persunalmënter ma che ne à nia vivù giut ala longia.

Tres si culaburazion cun Frida Piazza, Malia Obletter y Alex Moroder se al dat ju dassën cun la vita culturela y leterera ladina, ma l à nce messé patì truepa incomprenscions da pert de cërta persones de Gherdëina.

Si sëula edizion de liriches y stories curtes ie unida publicheda dl 1975 cun l titul "Ciofes da Mont". Cun gran savëi lirich y sensibeltà artistica iel stat n model per generazions de scritëures ladins. N possa bën dì che si produzion leterera ie stata chëla che à inaugurà la leteratura ladina nueva do la segonda gran viera. N pert ie si stil unì influenzà dai simbolisc' franzëusc che l cunesciova drët bën. Tosi à nce purtà pro a arichì l lingaz ladin cun criazions lessicales nueves, n pert tëutes dal rumantsch, n pert dal franzëus.

Purtruep al vivù scialdi da sëul y dalonc da si Ladinia che l amova tan dassën a Maran, ulache l ie mort dl 1988.

Funtanes

  • Frida Piazza. Max Tosi, poet ladin. Ai monc dla patria. Danterëures. Spiedl de nosc tëmps, in: “Ladinia”, I, 1977, S 195–200. (per ladin)
  • Walter Belardi. Max Tosi poeta ladino (Studi gardenesi XII), in «Archivio Alto Adige», 79 (1985), S. 6-33.
  • Walter Belardi. Narrativa Gardenese. Max Tosi. Università La Sapienza Roma - Union di Ladins de Gherdëina Urtijëi 1988. S. 271-289. (in ladino)
  • cm (Christian Moroder). Prof. Max Tosi. Calënder de Gherdëina 1989. Union di Ladins de Gherdëina. St. Ulrich in Gröden. S. 58-60.
  • Walter Belardi. Max Tosi. Profilo storico-politico della lingua e della letteratura ladina dolomitica (Studi ladini XIX), ediz. “Il Calamo”, Roma 1994. S. 70.
  • Chiocchetti Nadia: Nosta Jent. Persones y personalités dla Ladinia. Union Generela di Ladins dles Dolomites. Fotolito Longo, tesć per ladin, talian y tudësch, ISBN 88-901703-4-4. P. 144-146 e 265-266.

Liams

Leteratura ladina

Wikidata

d:Q1668841