Wp/ljp/Kebupatiyan Pesisir Barat

Kebupatiyan Pesisir Barat yakdolah salah say kebupatiyan di Kegubernuran Lampung, Indonesia say ibu kotani yakdolah Kruy. Kebupatiyan sinji tisahko budasarko Undang-Undang Nomor 22 Tahun 2012 tettang Pembentukan Kebupatiyan Pesisir Barat Kegubernuran Lampung pada tanggal 25 Oktober 2012 lajuni tiresmiko pada tanggal 22 April 2013. Sehinggani, kebupatiyan sinji ngenjadi kebupatiyan paling ngura di Kegubernuran Lampung.

Taman Nasional Bukit Barisan Selatan ngedok di kebupatiyan sinji. Sedangko di wilayah baratni wat lawok jama pantay say helaw rik masih sikop gegoh Pantay Batu Tihang. Pepira pantay gegoh Tanjung Setia ngedok humbak say langgar lajuni ngenjadi jengan lumba selancar internasional tahunan gegoh Kruy Pro say diadako World Surf League.

Ekonomi

Sektor midang ngerupako potensi andalan Kebupatiyan Pesisir Barat, inggal tahun ratusan najin ribuwan turis ratong mit Kruy, guway memidoran, buselancar, rik ngenikmati kehelawwan pantayni. Selayn pantay, Kruy ngedok ruwa pulaw eksotis yakdolah Pulaw Pisang rik Pulaw Betuwah, say alami rik kehelawwanni mak kalah jama pulaw-pulaw barih, sangun kidang potensini mangkung dimanpaatko.

Akses perhubungan jak rik mit Kruy, dacok nyirang darak, lawok, rik langit. Di Kruy ngedok Bandar Udara Muhammad Tawfiq Kiemas, Pelabuhan Kuwala Stabas, rik Jalan nasional Lintas barat say nyirang seunyinni wilayah Kruy say wat di garis pantay sekejung 200 kilometer lebih. Potensi hasil bumini ngerupako gitoh damar kuwalitas helaw rik ngedok harga juwal langgar, gegoh damar mata kucing say ngerupako gitoh damar paling helaw di duniya rik radu diakuy internasional. Mangkung munih hasil bumi say barihni gegoh cangkih, kupi, lada, rik coklat. Kebupatiyan Pesisir Barat munih ngerupako wilayah pertanian rususni di Kecamatan Pesisir Selatan say ngedok ribuwan héktar sabah rik sistim siring penguwayan.