Wp/ljp/Kabupatén Pesisir Barat
Kabupatén Pesisir Barat yakdolah salah sai kabupatén di Propinsi Lampung, Indonesia sai ibu kotani yakdolah Krui. Kabupatén sinji tisahko budasarko Undang-Undang Nomor 22 Tahun 2012 tettang Pembentukan Kabupatén Pesisir Barat Provinsi Lampung pada tanggal 25 Oktober 2012 lajuni tiresmiko pada tanggal 22 April 2013. Sehinggani, kabupatén sinji ngenjadi kabupatén paling ngura di Propinsi Lampung.
Taman Nasional Bukit Barisan Selatan ngedok di kabupatén sinji. Sedangko di wilayah baratni wat lawok jama pantai sai helau rik masih sikop gegoh Pantai Batu Tihang. Pepira pantai gegoh Tanjung Setia ngedok humbak sai langgar lajuni ngenjadi jengan lumba selancar internasional tahunan gegoh Krui Pro sai diadako World Surf League.
Ekonomi
[edit | edit source]Sektor midang ngerupako potensi andalan Kabupatén Pesisir Barat, inggal tahun ratusan najin ribuwan turis ratong mit Krui, guwai memidoran, buselancar, rik ngenikmati kehelauwan pantaini. Selain pantai, Krui ngedok ruwa pulau eksotis yakdolah Pulau Pisang rik Pulau Betuah, sai alami rik kehelauwanni mak kalah jama pulau-pulau barih, sangun kidang potensini mangkung dimanpaatko.
Akses perhubungan jak rik mit Krui, dacok nyirang darak, lawok, rik langit. Di Krui ngedok Bandar Udara Muhammad Taufiq Kiemas, Pelabuhan Kuala Stabas, rik Jalan nasional Lintas barat sai nyirang seunyinni wilayah Krui sai wat di garis pantai sekejung 200 kilometer lebih. Potensi hasil bumini ngerupako gitoh damar kualitas helau rik ngedok harga jual langgar, gegoh damar mata kucing sai ngerupako gitoh damar paling helau di duniya rik radu diakui internasional. Mangkung munih hasil bumi sai barihni gegoh cangkih, kupi, lada, rik coklat. Kabupatén Pesisir Barat munih ngerupako wilayah pertanian rususni di Kecamatan Pesisir Selatan sai ngedok ribuwan héktar sabah rik sistim siring penguwayan.