Wp/ljp/Bandar Métro
Bandar Métro yakdolah bandar di Kegubernuran Lampung, Indonesia. Bandar sinji bujarak dihak 52 km anjak bandar negeri kegubernuran, yakdo Bandar Lampung, jama ngerupako bandar paling balak keruwa di kegubernuran Lampung.
Bandar Métro kuruk dilom daptar 10 bandar di Indonesia say biaya hurikni paling lunik ke-9 di Indonesia jama urutan keruwa di Pulaw Sumatra budasarko Surpei BPS tahun 2017.
Bandar Métro monéh ngerupako target cetak biru Kementerian Pekerjaan Umum Dan Perumahan Rakyat Republik Indonesia sebagay kawasan setrategis rik target pengembangan bandar metropolitan seradu Bandar Lampung.
Sejarah
[edit | edit source]Jaman Penjajahan
[edit | edit source]Sejarah kelahéran bandar Metro mulani jama dibangunni kolonisasi rik dibentukni induk pekon ampay say dikeni gelar Trimurjo. Semangkung tahun 1936, Trimurjo yakdolah bagian jak Onder Distrik Gunungsugih say ngerupako bagian jak Marga Nuban. Kawasan sinji yakdolah daérah say jawoh rik mak lamon ngena pengaruh jak penduduk pribumi Lampung. Lamun, adok awal tahun 1936 Pemerintah kolonial Belanda ngirimko migran jamma-jamma Jawa mit wilayah sinji guway ngurangi kepadokan penduduk di Pulaw Jawa rik ngeluwangi gawi para aktipis kemeradikaan. Kelompok pertama ratong adok tanggal 4 April 1936.
Adok tanggal 9 Juni 1937, gelar daérah sina tiganti jak Trimurjo mit Métro rik adok tahun say gegoh ceccok sebagay pusat pemerintahan Onder Distrik (setikkat kecamatan) jama Raden Mas Sudarto sebagay asistin kepala distrik (asisten demang) pertama. Onder Distrik dikepalai jama Asisten Demang, sedangko atasanni yakdolah Onder Afdeling say dikepalai jama Kontroller bukebangsaan Belanda.