Wp/liv/Mõtsā-Pūol mō

From Wikimedia Incubator
< Wp‎ | livWp > liv > Mõtsā-Pūol mō
Jump to navigation Jump to search

Mõtsā-Pūol mō agā Metsepole um Vidumō līvlizt mōjõd sūrd mõtsādõks mōgõnd Piškīz-Mier mōgõr rāndas. Mõtsā-pūol mōstõ lekš lebbõ ikš tǟdzi mōriek jedālstõ pūoj-pēďõn. Mõtsā-pūol mōstõ jedāls vȯltõ Lēdurga livlizt mōd. Vel jeddõpēḑõn vȯltõ Turaida mō. Sīestõ mōgõr pūol vȯltõ Idumej, Immõr joug mō ja Tālava leţgāld mōd. Pūojs pīliz ēstlizt mōgõnd Sakala. Mõtsā-Pūol mō pūojlimiz nīn (1226 nimtõd Castrum Mezepol) pāika äb ūo tieudtõb, kilāb Skulte, Liepupe agā Limbaž ležgõl. Paldīž um Mõtsā-pūol jag Limbaž mōgõndõst. Sūŗimi jag sīe mōšti pīlõb tämpizpǟvan Leţmō teritōrijs Āinaž, Kuiviž ja Salāts joug-sū ležgõl. Sīe pūoj-tutkām Treimani ja Ikla ležgõl mōdõb Ēstimōlõ, kus Mõtsā-Pūol mōgõnd ovkõks um nimtõd ka Metsapoole kilā.

Istōrij[edit]

  • 1206 Prīestõr Aleksander lekš jellõm Mõtsā-Pūol mōlõ, rištīz sǟl kūožpēļiži līvliži ja īrgiz eitõm pivākuoddõ.
  • 1207 Nimtõd Mõtsā-Pūol mōl rištlizt pivākuoddõ.
  • 1207 Koiva līvlizt at-tuļtõ Rīgõ bīskop jūodimizõks Mõtsā-Pūol mōlõ. 1210 Tallõ lebbõ Mõtsõ-pūol rištlizt vägūd immardīztõ ēstlizt Sontaganā nīnõ. Pierrõ siedā ēstlizt rovd sadīztõ pǟlõ Mõtsā-Pūol mōlõ, kus ēstlizt suodāvägūd plīndartiztõ mōgõnds.
  • 1211 Ēstlizt vägūd ūtstõ plīndartiztõ Mõtsõ-pūol mōdõ. Pierrõ suodā īrgiz sūr teb, mis pierāst pǟgiņ līvliži kūoliztõ.