Wp/lfn/Turcs e Caicos

From Wikimedia Incubator
< Wp‎ | lfnWp > lfn > Turcs e Caicos
Jump to: navigation, search
Turks and Caicos Islands
Flag of the Turks and Caicos Islands.svg Coat of arms of the Turks and Caicos Islands.svg
Imno: God Save the Queen
Turks and Caicos Islands in its region.svg

Turcs e Caicos es un teritorio ultramaral brites cual es composada de la Isolas Caicos, e la Isolas Turcs min grande, du grupos de isolas tropical en la Arcipelago Lucaias de la Mar Atlantica e la norde de la Indias Ueste. La isolas es conoseda xef per turisme e como un sentro estrateratorial de finansia. La cuantia de popla, en la anio 2012, es sirca 31 458 persones, 23 769 de ci abita Providenciales en la Isolas Caicos. La lingua major es engles.

Turcs e Caicos es a la sude-este de Mayaguana en Bahamas e a la norde de la isola de Ispaniola (cual conteni Aiti e la Republica Dominican) e otra isolas en la Antiles. Cockburn Town, cual ia es la site capital de pos 1766, es en la isola de Grand Turk, cual es sirca 1 042 cilometres a la este-sude-este de Miami en la Statos Unida de America. La area teral total de Turcs e Caicos es sirca 430 cilometres cuadrada.

La oserva prima rejistrada par europeans de la isolas cual es oji Turcs e Caicos ia es en 1512. En la sentenios seguente, la isolas ia es reclamada par alga potias european, e la Impero Brites ia ateni ultima controla. Per multe anios la isolas ia es governada nondireta par Bermuda, Bahamas e Jamaica. Cuando Bahamas ia autonomi en 1973, la isolas de Turcs e Caicos ia reseta un governor, e ia permane un teritorio ultramaral brites separada autonomi de alora. En agosto 2009, la Rena Unida ia suspende la autonomia de Turcs e Caicos seguente reportas de froda ministral. Autonomia ia es restorada en la isolas pos la vota de novembre 2012.

Etimolojia[edit]

La isolas Turcs e Caicos es nomida per la melocacto (ance conoseda en engles como la Turk's cap cactus, cual sinifia "cacto de fez"), e la terma taino caya hico, cual sinifia "cadena de isolas".

Jeografia[edit]

La du grupos de isolas es en la norde de la Mar Atlantica, a la sude-este de Bahamas, a la norde-ueste de Porto Rica, a la norde de Ispaniola, e sirca 1 000 cilometres de Miami en la SUA, a 21°45′norde 71°35′ueste. La teritorio es continuante jeografial a Bahamas, ambos de cual es parte de la Arcipelago Lucaias, ma es un teritorio political separada. La Isolas Caicos es separada de la isolas bahaman de Mayaguana e Inagua Grande par la Pasaje Caicos.

La oto isolas xef e plu ca 299 isolas plu peti ave un area teral intera de 616.3 cilometres cuadrida, e es composada xef de calcario plana e basa; los ave pantanes estendosa, pantanes erbosa de rizofora, e 332 cilometres cuadrida de plaia. La clima es frecuente solosa (on regarda comun ce la isolas reseti 350 dias de sol cada anio) e seca relativa, ma sufri frecuente siclones. La isolas ave recursos limitada de acua dulse; tances privata es usada per colie acua de pluve per bevi. La recursos natural xef es langosta, strombo e otra crustaseos e moluscos.

La Pasaje Isolas Turcs separa la du grupos de isolas.

Isolas Turcs[edit]

La isolas Turcs es separada de la Isolas Caicos par la Pasaje de Isolas Turcs, cual es plu profonda ca 2 200 metres. La isolas es un cadena cual estende de la norde a la sude. En 2012, la cuantia de abitores ia es sirca 4 939 en la du isolas xef, la sola isolas en la grupo cual es abitada:

  • Grand Turk (cual ave la capital de la teritorio, un area de 17.39 km2 e sirca 4831 abitores)
  • Salt Cay (cual ave un area de 6.74 km2 e sirca 108 abitores)

Esta du isolas, con isolas ambiente en Parador Turcs, formi du de la ses distritos dirijal de la teritorio cual es en la Isolas Turcs. Parador Turcs, cual es plu peti ca Parador Caicos, ave un area intera de sirca 324 km2.

Parador Mouchoir[edit]

La Parador Mouchoir es 25 cilometres a la este de la Isolas Turcs e separada de los par la Pasaje Mouchoir. An si lo ave no isoletas emerjinte, alga partes es multe nonprofonda e la acua rompe sur los. Parador Mouchoir es un parte de la Isolas Turcs e Caicos e es en la zona economial escluinte de los. Lo es sirca 960 cilometres cuadrida. Du paradores de arena a la este, Parador Silver e Parador Navidad, es jeografial un continua, ma parteni a la Republica Dominican.

Isolas Caicos[edit]

La isola la plu grande en la arcipelago Caicos es Caicos Media, cual es 144 cilometres cuadrida, ma ia ave sola 168 abitores en 2012. La isola la plu poplada es Providenciales, cual ia ave 23 769 abitores en 2012, e ave 122 cilometres cuadrida. Caicos Norde, cual ave 116 cilometres cuadrida, ia ave 1 312 abitores en 2012. Caicos Sude (21 cilometres cuadrida) ia ave 1 139 abitores en 2012, e Parrot Cay (6 cilometres cuadrida) ia ave 131 abitores en 2012. Caicos Este (cual es dirijeda como un parte de la distrito de Caicos Sude) es nonabitada, en cuando sola empleadas de vacanseria abita Caicos Ueste (cual es dirijeda como un parte de la distrito de Providenciales).


Antilies model
Paises autonom Aiti | Antigua e Barbuda | Bahamas | Barbados | Cuba | Dominica | Grenada | Guadelupe | Jamaica | Martinic | Porto Rica | San Kitts e Nevis | San Lusia | Trinidad e Tobago
Dependes Anguila | Antiles Nederlandes | Aruba | Bermuda | Isola Navasa | Isolas Caiman | Isolas Virjin | Montserat | Turcs e Caicos