Wp/lfn/Belau

From Wikimedia Incubator
< Wp‎ | lfnWp > lfn > Belau
Jump to: navigation, search
Republica de Belau
Beluu er a Belau
Flag of Palau.svg Seal of Palau.svg
Palau on the globe (Southeast Asia centered) (small islands magnified).svg
Informa jeneral
Capital: Ngerulmud
Lingua ofisial: Engles e belau
Dirije
Governa: Republica constitual presidental unida su democratia nonpartisan
- Xef de stato: Presidente Tommy Remengesau
- Xef de governa: Vispresidente Raynold Oilouch
Otras
Area: 465,55 km²
Popla: 20 918 (2013)
Densia: 38,6
PIB: 288 milion
Mone: Dolar de Statos Unida (USD)
Zona de ora: (UTC+9)
Numero de telefon: +680
Interede: .pw
States of Palau.jpg

Belau, ofisial la Republica de Belau (belau Beluu er a Belau[1]) es un pais locada en la Pasifica ueste. Lo es formida par 340 isolas, creante la cadena ueste de la isolas Carolina en Micronesia, e ave un area de 466 cilometres cuadrida[2]. La isola con la plu abitores es Koror. La capital, Ngerulmud, es locada sur la isola de Babeldaob, en la stato Melekeok. Belau ave fronteras maral con Indonesia, Pilipinas, e la Statos Federada de Micronesia.

Belau ia es colonida a 3000 anios ante aora, probable par migrores de Pilipinas. En la sentenio 18, mercatores engles ia deveni visitores importante, segueda par un influe espaniol en la sentenio 19. Pos sua defeta en la Gera Espaniol-American, Espania ia vende Belau e la Isolas Carolina a Deutxland en 1899. En 1914, la controla ia pasa a Japan e en la Gera Mundal Du ia es prendeda par la americanes pos la la Batalia de Peleliu entre 15 setembre e 25 novembre, con 2000 americanes e 10000 japanes matada. Junta a otra paises de la Pasifica, lo ia deveni un teritorio governada par Statos Unida en 1947. Pos vota contra la uni a la Statos Unida de Micronesia en 1979, Belau ia gania autonomia completa en 1994 como stato libre asosiada a la Statos Unida.

Political, Belau es un republica presidental en asosia libre con la Statos Unida, cual furni defende, suporta finansial e asede a servis sosial. La potia de legi es consentrada en la Congresa Nasional de Belau, un legeria con du salones. La economia de Belau es xef fundida en turisme, cultiva de susiste e pexa, con un parte importante de sua produi nasional bruta derivada de aida esterna. La pais usa la dolar de US como mone. La cultur de la isolas misca elementos micronesian, melanesian, asian e ueste. La palauanes etnical, la plu de la popla, es desendentes de un misca de micronesianes, melanesianes e austronesianes. Un parte peti de la popla es desendentes de niones e filipinos. La linguas major es Belau, linguas de la Pilipinas, engles e xines.

Etimolojia[edit]

La nom de la isolas, Belau, veni de beluu (la parola belau per "isola")[3] o de aibebelau ("responde nondireta"), relatada con un mito de crea[4].

Istoria[edit]

Istoria temprana[edit]

Belau ia es orijinal colonida entre la milenios 3 e 2 aec, la plu probable par persones de Austronesia o Indonesia[5].

La isolas ia ave un popla de pigmeos asta la sentenio 12, cuando otras ia sustitui. La popla polinesian moderna, si on considera sua lingua, ia veni cisa de la Isolas Sunda.

Sonsorol, un parte de la Isolas Sude-Ueste, un isola locada a 600 cilometres de la isola xef de Belau, ia es videda par la europeanes tan temprana como 1522, cuando la mision espaniol de la Trinidad, la barcon prima de la viaja de sirconaviga de Magellanes, ia vide du isolas a sirca la paralel norde 5, nominte los "San Juan"[6].

Mapa de 1888 mostrante la Indias Este Espaniol como parte de la isolas Belau (mapa sin Pilipinas).

Pos la concista de Pilipinas en 1565 par la Impero Espaniol, la arcipelago de Belau ia deveni un parte de la teritorio de la Capitania Jeneral de Pilipinas, instituida en 1574 como parte de la Indias Este Espaniol con capital en Manila. An tal, la presentia espaniol comensa sola con la evanjelisme en la fini de la sentenio 17, e sua domina sola en la sentenio 18.

Pos la sentenio 16[edit]

La descovre de Belau ia aveni pos un sentenio, en 1697, cuando la barcon de un grupo de belaus ia es ruinada en la norde-ueste de la isola de Samar (Pilipinas). Los ia es intervisada par la misionor txesce Paul Klein en 28 desembre 1696. Klein ia desinia la mapa prima de Belau fundida sur la interprete de la belaus de sua isolas, cual los ia presenta par aranja 87 calculos sur la plaia. Klein ia reporta esta descovres a la Superior Jeneral de la Jesuitas en un letera enviada en junio 1697[7], cual es egal a la descovre de Belau.

Eda espaniol[edit]

Xefes koror en 1915.

Esta mapa e letera ia causa un interesa grande en la isolas nova. Un otra letera scriveda par Andrew Serrano ia es enviada a Europa en 1705, esensal copiante la informa donada par Klein. La leteras ia provoca tre atentas jesuita nonsusedosa de viaja a Belau de la Pilipinas espaniol en 1700, 1708 e 1709. La isolas ia es prima visitada par un mision jesuita gidada par Francisco Padilla a 30 novembre 1710. La mision ia fini con la encalia de la du pretes Jacques Du Beron e Joseph Cortyl, a la costa de Sonsorol, car la veculo madrin Santísima Trinidad ia es gidada par un tempesta a Mindanao. Un otra barcon ia es enviada de Guam en 1711 per salva los ma ia fa no plu ca inversa, causante la moris de tre plu jesuitas. La fali de esta misiones ia dona a Belau la nom orijinal espaniol de Islas Encantadas (Isolas Encantada)[8]. An con esta mal fortuna inisial, plu tarda la Impero Espaniol ia domina la isolas.

Eda colonial[edit]

Alta Comisionor de la Teritorio Fidusial de la Isolas Pasifica e empleadas, desenio de 1960

La mercatores brites ia deveni visitores importante de Belau en la sentenio 18, segueda par un influe espaniol cresente en la sentenio 19. Pos la defeta espaniol en la Gera Espaniol-American, Espania ia vende Belau e la Carolinas a la Impero Deutx en 1899 seguente la Trata Deutx-Espaniol (1899). En la Gera Mundal 1, la Impero Nion ia ajunta la isolas pos prende los de Deutxland en 194. Pos la Gera Mundal 1, la Alia de Nasiones ia pone la isolas su dirije nion como parte de la Autoria de la Pasifica Sude.

Eda american[edit]

En la Gera Mundal 2, la Statos Unida ia catura Belau de Nion en 1944 pos la Batalia de Peleliu, cuando plu ca 2 000 americanes e 10 000 niones ia mori. La isolas ia pasa a la Statos Unida con la suporta de la Nasiones Unida en 1947 como parte de la Teritorio Fidusial de la Isolas Pasifica, constituida seguente la Deside 21 de la Consilio de Securia.

Nondepende[edit]

Cuatro de la distritos de la Teritorio Fidusial ia uni forminte la Statos Federada de Micronesia en 1979, ma la distritos de Belau ia refusa partisipa. Belau, la grupo la plu ueste de la Carolinas, ia prefere un state autonom en 1978. Lo ia aproba un constituida nova e ia deveni la Republica de Belau en 1981[9]. Lo ia suscrive un Trata de Asosia Libre con la Statos Unida en 1982. Pos oto referendos e un cambia en la constituida belau, la Trata ia es validida en 1993. Lo ia comensa es aplicada en 1 otobre 1994[10], cambiante Belau a un pais autonom de jure, an si lo ia es autonom de facto de 25 maio 1994, cuando la fidusialia ia fini.

La lege cual ia cambia Belau a un esente finansial estrateritorial ia es asetada par la Senato en 1998. En 2001, lo ia aseta sua regula prima de banco e leges contra la lava de mone.

Jeografia[edit]

Palau.PNG

La teritorio de Belau es composada de un arcipelago locada en la Mar Pasifica. Sua isolas la plu poplida es Angaur, Babeldaob, Koror e Peleliu. La tre ultimas es locada juntada en la mesma parador de coral, ma Angaur es un isola maral a alga cilometres a sude. Du tris de la popla abita sur Koror.

La atol de coral Kayangel es a norde de esta isolas, e la Isolas Roca nonabitada (alga 200) es a ueste de la grupo de isolas xef. Un grupo distante de ses isolas, conoseda como Isolas Sude-ueste, no min ca 604 cilometres de la isolas xef, composa la statos de Hatohobei e Sonsorol.

Clima[edit]

Belau ave un clima tropical de foresta pluvosa con un temperatur promedia anial de 28 °C.

Siclones es rara car Belau es locada estra la zona xef de siclones. La siclon la plu forte cual ia toca Belau ia es la Siclon Haiyan en 2013[11]. Un evacua urjente obligante ia es publicida par Kayangel. An cuando la abitores ia refusa evacua, no moris ia es reportada.

Ambiente[edit]

Isola de Roca en Belau.
Un vide aerial de isolas de calcario.

En cuando la plu de Belau resta libre de degrada ambiental, alga areas de conserna inclui la pexa nonlegal con dinamite, complesos nonsufisinte per desprende de dejetadas solida en Koror, e dragas estendosa de coral e arena en la lagon de Belau. Como con otra nasiones de la Pasifica, la asende de la nivel de mar presenta un menasa ambiental major. La inonda de areas basa menasa la plantas costal, la cultivas e un furni ja nonsufisinte de acua. La trata de acua de cloaca es un problem, como ance la maneja de dejetadas nosiva de fertilintes.

La crocodiles de acua salosa es nativa de Belau e vive en la rizoforas e an en partes de la Isolas Roca bela. An si on regarda esta spesies como estrema perilosa, sola un mori ia aveni par causa de los, en 1960. En Belau, la crocodil la plu grande mesurada ia ave 4,5 metres de longia.

La nasion es ance esposada a tremateras, ativia volcanal e tempestas tropical. Belau ave problemes con la furni nonsufisinte de acua nonsufisinte e la areas cultivable limitada per suporta sua abitores.

A 5 novembre 2005, la presidente Tommy E. Remengesau, Jr. ia comensa un inisia ambiental rejional nomida la Defia Micronesia, cual va conserva 30% de acuas costal e 20% de teras de foresta ante la fini de 2020. Seguente Belau, la Statos Federada de Micronesia, la isolas Majel, Guam e Marianas Norde ia uni a la inisia. Juntada, esta rejion representa cuasi 5% de la area maral de la Pasifica e un 7% de sua linia de costa.

Refuja[edit]

A 25 setembre 2009, Belau ia anunsia ce lo va crea la refuja prima de selacos de la mundo[12]. Belau ia proibi tota pexa comersial de selacos en la acuas de sua zona economial escluida. La refuja proteje 600 000 cilometres cuadrida de mar[13], un area simil a Frans[14][15][16]. Presidente Johnson Toribiong ia anunsia la refuja en un encontra de la Nasiones Unida[14][17][18]. El ia proposa un proibi mundal de pexa de selacos[14]. En 2012, Belau ia reseta la Premia de Politica Futur de la Consilio de Futur Mundal, car "Belau es un gidor global en la proteje de ecosistemes maral"[19].

Politica e governa[edit]

Capitolio de Belau, la seja de la governa.

Belau es un republica democrata multipartital. La Presidente de Belau es e la xef de stato e la xef de governa. La potia de esecuta es eserseda par la governa, ma la potia de legi es eserseda par ambos la governa e la Congresa Nasional de Belau. La juderia es autonom de la potia de esecuta e de legi. Belau ia adota un constituida en 1981.

La governa de la Statos Unida e Belau[20] ia conclui un Acorda de Asosia Libre en 1986, simil a la acordas cual la Statos Unida ia suscrive con la Statos Federada de Micronesia e con la Republica de la Isolas Majel[21]. La acorda ia es aplicada a 1 otobre 1994, fininte la cambia de Belau de fidusialia a autonomia[21] como la parte ultima de la Teritorio Fidusial de la Isolas Pasifica cual ia securi sua autonomia seguente la Deside 956 de la Consilio de Securia.

La Acorda de Asosia Libre entre la Statos Unida e Belau[22] ia defini la asosia libre e nonobligante de sua governa. Lo foca xef a la relatas de governa, economia, defende e securia[23]. La acorda permete ce la armada de SUA asede la isolas per 50 anios. La rol de la marina es minima, limitada a alga injeniores de construi. La Gardacosta de SUA patrulia la acuas nasional.

Relatas esterna[edit]

Como un nasion autonom, Belau gida sua propre relatas esterna[21]. Pos sua autonomi, Belau ia institui relatas diplomata con alga nasiones, incluinte multe de sua visinas de la Pasifica, como Micronesia e Pilipinas. A 29 novembre 1994, la Consilio de Securia de la Nasiones Unida ia aproba la Deside 963, recomendante la entra de Belau a la Nasiones Unida. La Asembla Jeneral de la Nasiones Unida ia aproba la entra de Belau seguente la Deside 49/63 a 15 desembre 1994[24]. De alora, Belau ia uni otra organizas internasional. En setembre 2006, Belau ia ospita la Confere prima de Taiuan e Aliadas Pasifica. Sua presidente ia fa visitas ofisial a otra paises de la Pasifica, incluinte la Republica de Xina.

La Statos Unida manteni un delega diplomata e un ambasada en Belau, ma la plu aspetas de la relatas de ambos paises conserna la projetas finansiada par la Acorda. La Ofisia de Consernas Isolal de la Departe de Internas de la SUA es la encargada de esta relatas[25].

En la politica internasional, Belau vota frecuente con la Statos Unida en relata a la desides de la Asembla Jeneral de la Nasiones Unida[26].

Belau es un membro de la Acorda de Nauero[27].

En 1981, Belau ia vota per la constituida nonnucleal prima de mundo. Esta constituida ia proibi la usa, reserva e dejeta de armas nucleal, biolojial, e de gas e cimicales nosiva, sin es aprobada par un majoria de ¾ en un referendo. Esta proibi ia pospone la cambia de Belau a autonomia, car en negosia la Acorda, la SUA ia insiste per la posible de opera barcos de propulsa nucleal e de reserva armas nucleal en la teritorio, provocante campanias per autonomi e desnucleali. A pos, alga referendos cual ia fali ateni un majoria de ¾, la popla de Belau ia aproba la Acorda en 1994.

En junio 2009, Belau ia anunsia ce lo va aseta 17 uigures cual ia es detenida par la armada de la SUA en Baia Guantanamo, con alga compensa american per la costa de manteni los.

Sola un de la uigures ia aseta move, ma a fini de otobre, 6 de la 17 ia es moveda a Belau. Un acorda de aida con la SUA, finida en janero 2010, ia es reportada como nonrelatada con la acorda de la uigures.

Divides manejal[edit]

The sixteen states of Palau.

Belau es divideda en 16 statos (nomida munisipas asta 1984). Estas es listada a su, con sua areas e cuantia de abitores de 2012:

Stato Area (km2) Abitores (2012)
Flag of Aimeliik.svg Aimeliik 44 281
Flag of Airai State.png Airai 59 2537
Flag of Angaur State.png Angaur 8.06 130
Flag of Hatohobei.svg Hatohobei 0.9 10
Flag of Kayangel State.png Kayangel 1.7 76
Flag of Koror State.png Koror 60.52 11670
Flag of Melekeok.png Melekeok 26 300
Flag of Ngaraard State.svg Ngaraard 34 453
Flag of Ngarchelong.svg Ngarchelong 11.2 281
Flag of Ngardmau State.png Ngardmau 34 195
Flag of Ngeremlengui State.png Ngaremlengui 68 310
Flag of Ngatpang State.png Ngatpang 33 257
Flag of Ngchesar State.png Ngchesar 43 287
Flag of Ngiwal State.png Ngiwal 17 226
Flag of Peleliu State.png Peleliu 22.3 510
Flag of Sonsorol.svg Sonsorol 3.1 42

Istorial, la Isolas Roca es un parte de la Stato de Koror.

Republica de Belau.

Enforsa de la lege maral[edit]

Belau emplea 18 ofisiores de polisia maral per patrulia la 600 000 cilometres cuadrida de zona economial escluinte. Lo usa un barco de patrulia donada par Australia, la Remeliik, per xerca xasores nonlegal e pexores nonlisensada. Du barcos peti de plastica de vitro es usada per operas costal. Sua xeferia es locada sur Koror.

Demografia[edit]

La cuantia de abitores de Belau es sirca 21 000, de cual 70% es belaus etnical, de desende melanesian e autronesian. On ave multe comunias asian en Belau. La filipinos es la grupo asian la plu grande e la etnica du de la plu grandes en la pais. On ave un cuantia grande de xineses e coreanes. On ave un cuanta plu peti de belaus desendente de niones o miscada con niones. On pote trova grupos an plu peti de laborores de Nepal e Bangladex e sua desendentes ci ia vade a fini de la sentenio 1900. La plu de la asianes ia veni a fini de la sentenio 1900 como laborores noninstruida. On ave ance un cuantia peti de europeanes e americanes.

Viletanes de Tobi.

Linguas[edit]

La linguas ofisial de Belau es belau e engles, estra en du statos (Sonsorol e Hatohobei) do la linguas local, sonsoroles e tobian, en junta con belau, es ofisial. Japanes es parlada par alga belaus vea e es un lingua ofisial en la stato de Angaur[28][29]. Incluinte parlores de lingua du, Belau ave plu parlores de engles ca de belau.

Relijio[edit]

La invades deutx e japanes de Belau ia dona suporta finansial a misionores seguente la espanioles. Tre cuatris de la popla es cristian (xef catolica e protestante), ma Modekngei (un misca de cristianisme, relijio tradisional belau e clarvidentia) e la relijio belau vea e frecuente segueda. La governa nion ia trae budisme e xinto a Belau, cual ia es la relijios xef entre la colonistes nion. An tal, pos la defeta de Nion en la Gera Mundal 2, la plu de la niones restante ia converti a cristianisme e la otras ia continua segue budisme, ma ia sesa pratica la rituos xinto. On ave ance 400 muslimes bangla en Belau, e on ia permete ce alga uigures detenida en Baia Guantanamo vade a la nasion isolal.

Seguente un conta de abitores de 2005[30], 49,4% de la popla es catolica, 21,3% es protestante e 8,7% segue Modekngei. Sola 1% de la popla ia es budiste en 2010, e la comunia xines pratica ance la relijio tradisional xines[31].

Economia[edit]

Ponte entre Koror e Babeldaob.

La economia de Belau es xef composada de turisme, cultiva sustal e pexa. La ativia de turisme foca a la tufa con airador o autorespirador en la ambiente maral rica de la isolas, incluinte la paradores de coral e la barcones abandonada de la Gera Mundal 2. La governa es la empleor xef, multe dependente de aida finansial de la SUA.

La revenu promedia de la popla es la duple de lo de Micronesia.

La servi avional ia es debil a veses. Palau Micronesia Air, Asian Spirit e Pacific Flier ia furni servis a la Pilipinas e otra destinas en la anios 2000, ma tota ia es suspendeda[32]. United Airlines furni un servi cuasi dial a Guam, e un servi semanal a Yap. Ance Delta Air Lines vade a tre veses per semana a Tocio.

En novembre 2006, la Palau Saving Bank ia anunsia sua bancarotia ofisial.

La imposta de revenu ave tre categorias con tasos progresante de 9,3%, 15% e 19,6%. La imposta de corpora es 4%, e la imposta de vende es zero. On ave no impostas de imobila.

Transporta[edit]

La airoporto internasional de Belau furni un scema de volas direta a Guam, Manila, Seoul e Taipei e, de desembre 2010, a Tocio-Narita. En ajunta, la statos de Angaur e Peleliu ave un scema de servis a destinas internasional.

Barcones de carga, soldatos e turi para frecuente en la porto de Malakal, a la isola Malakal prosima a Koror. La pais no ave ferovias, e de la 61 cilometres de autovias, sola 36 es paveda. On gida veculos a la lado destra e la limita de rapidia es 40 km/h. Taxis es disponable en Koror. Sola Koror ave un servi de bus. La transporta entre isolas depende de barcos privata e servis avional. An tal, alga statos opera barcos entre isolas como un alternativa plu barata.

Cultur[edit]

Un cabana tradisional de Belau (2012).

La sosia de Belau segue un sistem matrilinial multe restrinjente. La praticas matrilinial es videda en cada aspeta de la tradisiones belau, spesial en la funera, la sposi, la erita e la pasa de titulos tradisional.

La sistem de governa tradisional influe ancora la consernas de la nasion, tal ce la governa federal ia atenta limita sua potia. Multe de acel atentas ia ave la forma de cambias a la constituida cual ia es suportada par la companias per proteje la zonas sur cual los ia opina ce los debe es economial libre.

Governa tradisional[edit]

La governa "tradisional" belau de oji es un continua de sua asendente, composada de praticas de miles de anios. Tradisional, Belau es organizada con forma ierarcial. La nivel la plu basa es la vileta, segueda par la xefia (oji nomida un stato) e final la alias de xefias. En tempos antica, multe federas ia divide la potia, ma a la introdui de fusiles par la engleses, un la potia ia deveni desecuilibrada.

Belau ia deveni divideda en federas norde e sude. La norde ia es gidada par la reklai e la ebilreklai, la xef alta mas e xef alta fema de la clan governante de la stato Melekeok. Los es comun nomida la re e rea de la Federa Norde. Esta federa norde es composada de la statos de Kayangel, Ngerchelong, Ngardmau, Ngiwal, Ngaraard, Ngatpang, Ngeremlengui, Melekok, Aimeliik, Ngchesar e Airai.

La Federa Sude es ance representada par la xefes alta mas e fema de la governores de la clan idid de la stato Koror. Esta federa conteni la statos de Koror, Peleliu e Angaur. An tal, min belaus segue la conseta de federa, e la terma es lenta morinte. La federas ia es constituida per securi statos e viletas noncorporada cual ia comparti interesas economial, sosial e political, ma pos la ariva de la governa federal, la securia es min importante. Ma lo es notable ce, en la relatas esterna, la re de Belau es sinonim de la ibedul de Koror. Esta es car Koror es la capital industrial de la nasion, elevante la prestijia de la re supra la Reklai de Melekeok.

Lo es un malconseti ce la re e rea de Belau (o cualce xefes mas e fema) es sposida. La gidores tradisional ia es sempre relatada e nonsposida (sposi relatadas ia es un tabu tradisional). Comun, un xef e sua corespondente fema es frate e sore, o cusines prosima, e ave sua propre sposes.

Sporte[edit]

Basebal es un sporte popular en Belau pos sua introdui par la niones en la desenio 1920. La ecipo nasional de basebal de Belau ia gania la medalia de oro en la Juas Micronesian en 1990, 1998 e 2010, como ance en la Juas de la Pasifica de 2007.

Belau ave ance un ecipo de futbal nasional organizada par la Asosia de Futbal de Belau, ma no es un membro de la FIFA. La Asosia organiza ance la Alia de Futbal de Belau.

Educa[edit]

Educa prima es obligante asta la anio 16. La scolas inclui instituidas e publica e privada, como ance alga campos de studia disponable en la Scola de Comunia de Belau. Per studia en universias, la belaus vade estra la pais. Elejes popular es la Universia de Stato de San Diego, la Universia de la Pasifica Sude, la Universia de Guam e la Universia de Hawaii.

Cosini[edit]

Belau ave sua propre cosini, pd un deser nomida tama. La cosini belau inclui comedas como manioca, taro, niama, patata, pex e porco. La cosini ueste es favoreda par la belaus joven.

Filma e televisa[edit]

Alga programes de televisa e filmas ia es filmada en Belau. Esemplos inclui la program de realia Survivor: Palau e la filma de 1968 Hell in the Pacific con Lee Marvin[33]. Un documental de televisa sur Belau nomida Strategic Trust: The Making of Nuclear-free Palau ia es narada par Joanne Woodward e ia apare en la SUA en 1984[34].

Referes[edit]

  1. Constitution of Palau. (PDF). palauembassy.com. Retrieved 1 June 2013.
  2. "Statistical Yearbook 2015". Republic of Palau Bureau of Budget and Planning Ministry of Finance.
  3. Culture of Palau – Every Culture. Retrieved 25 May 2012.
  4. The Bais of Belau – Underwater Colours. Retrieved 25 May 2012.
  5. Palau – Historical Boys' Clothing. Retrieved 25 May 2012.
  6. Palau – Foreign Ships in Micronesia. Retrieved 25 May 2012.
  7. Serrano, Andres (1707). Los siete principes de los Angeles: validos del Rey del cielo. Misioneros, y protectores de la Tierra, con la practica de su deuocion, por Francisco Foppens, pp. 132–.
  8. Francis X. Hezel, SJ , Catholic Missions in the Carolines and Marshall Islands. Micsem.org. Retraeda en 12 setembre 2015.
  9. Template:Wp/lfn/Cite news
  10. Template:Cite news
  11. "Histogram of Typhoons Within 1 Degree of Koror." Digital Typhoon. Nuoroda tikrinta 25 January 2015.
  12. "Palau creates world's first shark haven." The Philippine Star. 26 September 2009. Nuoroda tikrinta 28 September 2009.
  13. Richard Black (25 September 2009). Palau pioneers 'shark sanctuary'. BBC News.
  14. 14.0 14.1 14.2 Template:Cite news
  15. Template:Cite news
  16. Template:Cite web
  17. "Palau creates shark sanctuary to protect tourism and prevent overfishing." Radio New Zealand: 27 September 2009. Nuoroda tikrinta 28 September 2009.
  18. Template:Cite news
  19. "Tiny Nation of Palau Proves Sharks Worth More Alive Than Dead." Jakarta Globe. 22 October 2012.
  20. Compact of Free Association Between the Government of the United States of America and the government of Palau, preamble
  21. 21.0 21.1 21.2 Template:Cite journal
  22. Compact of Free Association Between the Government of the United States of America and the government of Palau, preamble
  23. Compact of Free Association Between the Government of the United States of America and the government of Palau, Table of Contents
  24. United Nations General Assembly Resolution 49/63, ''Admission of the Republic of Palau to Membership in the United Nations'', adopted 15 December 1994. Un.org. Retrieved on 12 September 2015.
  25. Responsibilities and Authorities. USDOI Office of Insular Affairs. doi.gov
  26. General Assembly – Overall Votes – Comparison with U.S. vote lists Palau as in the country with the third high coincidence of votes. Palau has always been in the top three.
  27. Template:Wp/lfn/cite news
  28. "CIA – The World Factbook – Field Listing :: Languages." Central Intelligence Agency. Nuoroda tikrinta 17 February 2010.
  29. Paul M. Lewis (ed) (2009). "Languages of Palau." SIL International. Nuoroda tikrinta 17 February 2010.
  30. Office of Planning and Statistics, Republic of Palau: Census of Population and Housing, Table 59. Retrieved 1 March 2007
  31. "The Association of Religion Data Archives | National Profiles." Thearda.com. Nuoroda tikrinta 3 June 2013.
  32. Ghim-Lay Yeo. "Palau's PacificFlier relooks business plan after suspension." Flightglobal. Nuoroda tikrinta 13 September 2011.
  33. 'Pirates of Palau' crea un problem
  34. Template:Wp/lfn/Cite news

Lias esterna[edit]