Wp/krl/Steel pan

Steel pan ili pannu on melodini lyöntäšoitin, kumpani on kehitetty Trinidadissa, Karibijalla.

Šoittimen istorijašta

Trinidadissa imehniset keräyvyttih yhteh kuottelomah, mitein erimoiset metalliset šäilijöt ta keittijövälinehet šoitetah. Patoja ta pannuja, pisketti- ta mualipurkkija, ruhkakorija, autojen ošija ta öljypuččija käytettih enšiksi šemmosenah lyöntäšoittimina. 1930-luvulla huomattih, jotta metallirumpujen pohjašša olijan kumuran piitämän voit virittyä erimoisilla šävelkorkevukšilla, min tähen oli mahto šoittua tunnuštettavija melodijoja. Näin rotiuvuttih enšimmäiset teräšpannut.

Pannut tänäpiänä

Nykysen luatusekši šoitin oli kehittyn 1955 vuoteh šuaten. Šoittimie luajitah piäasiešša öljypuččiloista. Pannun metallipinnalla lyötylöistä piitämistä jokahini tuottau erimoisen šoitannan šen paikan ta kovon mukah. Pannuja šoitetah lyömällä piitämijä kahella puutikulla, kumpasen n’okka on piälyššetty kumilla.

Steel band

Steel bandan ili steel pan -orkesterin iänialoveh kattau pianon iänialan; šentäh šiinä pitäis olla ainaki 6-7 šoittajua. Yhteh šoittimeh kuuluu 1-6 pannua, ta jokahisella šoittimella šoittau vain yksi imehnini. Orkesterissa on eri-iänitašosie pannuja sopranošta bassoh. Yheššä šoittimešša voit olla šävelie noin viiještätoista (altti- ta kitarapannut) kolmehkymmenehki šuaten (violi- ta sopranopannut). Šoittimen kovošta šuattau piätellä šen iänitašon: mitä šuurempi šoitin, šitä matalampi iäni.

Šoittajat

Pannuorkesteriloissa šoitettih alušta alkuan vain miehet; naiset ruvettih šoittamah pannuja vašta 1970-80-luvulla. Trinidadilaisten pannuorkesterien šoitanta ulkomualaisilla festivaliloilla alko hil'l'an vällän levitä muajilman eri puolilla. Nykyjäh pannuorkesterit ruatah kaikissa muanošissa.

Lähtehet

1. https://artsandculture.google.com/story/the-origins-of-steel-pan-notting-hill-carnival/AAWBxQd4TKb21w?hl=en
2. https://www.bbc.com/news/magazine-18903131
3. https://www.panonthenet.com/world/global/associations/index.htm
4. https://sites.google.com/site/steelpanorg/soitinesittely/pannujen-historia
5. https://sites.google.com/site/steelpanorg/soitinesittely
6. https://www.steelpan-steeldrums-information.com/steel-pan-history.html

#vienankarjalakši