Wp/kjp/အဝ်သာ်သုရာ ဆ်ုဍယ်ၜါ

From Wikimedia Incubator
< Wp‎ | kjpWp > kjp > အဝ်သာ်သုရာ ဆ်ုဍယ်ၜါ
Jump to navigation Jump to search

လ်ုဝီႋဍးအိုဝ် အဲဍိုဝ်သာ် ဍုံဗေင်ႋက်ုသီ့စဃွှာၮှ် ဆ်ုဖါ်ဆ်ုယးလ်ုအှ်ၜး အင်းဝေ့မေဝ်ၮင်ႋဖိုင့်အေး၊ ထံင်အှ်ဝေ့ထီ့ခါန်ႋဖိုင်ၮှ်ဍဝ် အေထံင်လာသီ့၊ လာၰိုဲ၊ လာဍင်းဖါ (တ်ုစင်)မူႋၮီခါ့စာ်ၜိုဝ် မာသီ့အင်းဆာ့ၜးဆ်ုဖါ်ဆ်ုယးအေး၊ စင်ၜိုဝ် အှ်ဖိင့်ခၠးထာ် ဍံင်မေဝ်ဆာႋၮှ် ကာလလ်ုထံင်ဍာ်ၜး မူႋသိုင့်ၮီၮှ်အိုဝ် ၜးလေဝ် ၰိုဲ(ဃွှယ်)ၮေဝ်ႋဝယ် ဆ်ုဖါ်ဆ်ုယး လ်ုအ်ုယှဝ်ၮှ်လှ်။

လ်ုၮီမူႋ ဍံင်မေဝ်ဆာႋလ်ုၯာ သ္တာ်လင်ထံင်ႋ အှ်ကှ်ေဆ်ုဖါ်ဆ်ုယး လ်ုၜါ်ၜိုင်ၜး အ်ုခေါဟ်ကျံင် ထုဲးအင်းခွိက်ဆ်ုယး ၜးတံင်ၮံင်းဍဝ် ဍေမူႋဍောဟ်ၮှ်တာႋ ၰိုဲထာင်ဆ်ုယး လ်ုၮေဝ်ႋလိုင် ဍးခံင်ၜးဆ်ုကး လေဝ်အင်းကိင်ဝေ့ဆ်ုမာၜိုဝ် လ်ုၮင်ႋခယ်ဃွှာ (ဂၞကျာ်)အှ်အိုဝ်လှ်။

ၮင်ႋခယ်ဃွှာခဝ့် ဆံင့်မံင်းဝေ့ "စဃွှာယိုဝ် အဲအ်ုဖေါဟ်ခွါ့ဍောဟ်မာႋ" စင်ႋၜိုဝ် က်ုယိုင့်ထင်းအ်ုဖေါဟ်ခွါ့ ဍေဆ်ုကံင်သိုဝ် လေဝ်ဖ်ုအောဝ်လင်ဝေ့ လ်ုစဃွှာဝီ့လဖိုင်အိုဝ်လှ်။ ဖဝ်ႋစဃွှာအဲၯာႋ အ်ုဖေါဟ်ခွါ့ခါ့ၮှ် ဍံင်မေဝ်ဆာႋလ်ုၯာ လေဝ်သီ့ကၠီ ဍုဂ်အင်းဝေ့ စဃွှာမေဝ်ၮှ်လှ်။ စဃွှာၮှ် သာ်ခၠုက်ၜါ်ထင်း ယောဝ်ႋလင်ဆးအင်းကၠာ လ်ုဍး ဆ်ုဖါ်ဆ်ုယးၜးၮှ်တာႋ သာဖၠီႋထင်းဆ်ု အိင်ၯာင်ဝေ့ ဆ်ုဍံင်မေဝ်ဆာႋၮှ်လှ်။

ဍံင်မေဝ်ဆာႋခဝ့် ပ္တိင့်ထင်းဝေ့ "ၜးတံင်ၮံင်းသာ ဍေမူႋဍောဟ်အ်ုခေါဟ်ကျံင် လေဝ်ၰိုဲဆ်ုဖါ်ဆ်ုယး လ်ုၮေဝ်ႋလိုင်ၜးလှ် က်ုဆာႋဃွှာ" စဃွှာခဝ့် သာဖၠီႋထင်းဆ်ုမေံသးဝဝ်စှ် ခၠာင်ထင်းဝေ့အ်ုလူႋဆံင်း "ယ်ုကဲစဃွှာဖုက်ဖယ် ဆ်ုၜေၮှ်သိုဝ်သီး ၮ်ုသီးအင်းၰူ့ဖှ်ေယ်ု ၮေဝ်ႋအေးၯး" ဖံင်းၮေဝ်ႋထာင်အ်ုဖေါဟ်ခွါ့ လ်ုဝီ့လဖိုင်ၮှ်တာႋ ၜၠိုဝ်ခါႋခွိက်ဝေ့ခေါတ်ၜံင် ခွိက်သုံ့စိုဝ်ဖှ်ေလင့် ဍံင်မေဝ်ဆာႋအှ် အင်းမိုင့်ဍံင်ထင်းဝေ့ သိုင့်ၮှ်လှ်။ ဆ်ုလ်ုၮီၮှ် စဃွှာအင်းဝေ့မေဝ် ဍေသိုင့်မၞီဟ်ယးၮှ်ၯံင် မီ့မး ၯယ့်ထုင်းထင်းထာင် လ်ုကေၯဝ်ခါ့ သာ်ၜၠာခွိက်ယုဂ်အ်ုခေါဟ်ကျံင် အင်းစာပြိုင့်ထင်းဝေ့ အ်ုဖေါဟ်ခွါ့ၮှ်လှ်။

ၮင်ႋခယ်ဃွှာခဝ့် ဍေၯင်းဍေယိုဝ် ပ္တိင့်ပျဖှ်ေထာင်ဝေ့ ဆ်ုကဲထင်းသာလ်ုယာ့လ်ုၮီ အ်ုၯာင်ႋအ်ုဖၠံင်ၮှ်လှ်။ ထံင်ၮှ်လ်ုၜၠင် စဃွှာၮှ် သာမဲထင်းဆ်ု ဝါထောတ်ထိုင့်ၯာသာ့ၯံင် ၜးပါသာ ဍေဆ်ုအဝ်သာ် ကဲထင်းဆ်ုဍယ်ၜါၮှ်အိုဝ် သှ်ေယာ့ၜးဝေ့ မေံသးထာ်ယုဂ်ၮှ်တာႋ - ၯင်းကာ်မေံထီ့ ၮေဝ်ႋဆ်ုၮံင့်ယာႋလ်ုထုက်လိုင် ပ္တံင်ထင်းၮေဝ်ႋ ထံင်မူႋလ်ုၮီၮှ် လ်ုအဝ်ဝေ့သာ်လိုင် ဍူးယှံင့်ဝေင်ႋပွယ်ခွိက်မိင်သာ ထံင်ႋအ်ုၮေဝ်ႋဆ်ုၯေဝ် လ်ုဆင့်ၮှ်လှ်။