Wp/kjp/သှ်ေယာ့လင်သာ ဖၠုံယှင်ဖေါဟ်

From Wikimedia Incubator
< Wp‎ | kjpWp > kjp > သှ်ေယာ့လင်သာ ဖၠုံယှင်ဖေါဟ်
Jump to navigation Jump to search

လိက်ယောဝ်ႋဃှီ့လ်ုၜိင်းယိုဝ် မ်ုကေဝ်လင် ဆံင်းမံင်းဝယ် ယိက်မာယုဂ်ဆေဝ်ႋ။ လာၮင့်ၜိုဝ်သီး အ်ုဟှာင်အ်ုစံင်း လ်ုမိက်ဍုဂ်ပါင်ၜး အ်ုခေါဟ်ကျံင် အ်ုခါ့ယိုဝ်မ ကေဝ်ႋလင်ၜးဆေဝ်ႋလှ်။ လိက်ယိုဝ် မွာဲၜးဏှ်လယ့် ၜးလဝ်လင်ၜးယိုဝ်စာ်ၜိုင် ယ်ုလ်ုဟှာ လ်ုဖၠုံယှင်ဖေါဟ်အ်ုဖင့်ခေါဟ် ကါင်ဖါႋၜးလာလ်ုဃှေဝ်၊ အဲဆိုင့်ထာင်လာပ်ုဆိုဒ်ဖေါဟ်အ်ုဟှင် သာဆ်ုပ်ုယောဟ်အှ်၊ ဆ်ုမူ့လာအှ်ဍောဟ်အ်ုခေါဟ်ကျံင် လဝ်လင်ၜးၜေ့ယိုဝ်ဆေဝ်ႋလှ်။ ဆ်ုမူ့လာ ၜေ့ဖၠုံယှင်ဖေါဟ် မ်ုလင်ဆင့်၊ ၜေ့မ်ုဆာ့သာ အ်ုဟှင်ဏှ် မွာဲအေးလှ်။ ဍေဖၠုံယှင်ဖေါဟ် အ်ုဟှာင်အ်ုစံင်းယိုဝ် လ်ုဆ်ုသှ်ေပညာ့ဆာလ်ုဖးဏှ်သီး ကေဝ်ဏးသှ်ေလင် ဍေလိက်ယိုဝ် ဟ်ုဍးၜး၊ ပဝ်ႋၜးအးမာယုဂ်ဆေဝ်ႋယုဂ်။ လာဏင့်သီး အှ်ဍိင်အး ဍိင်ဟှေဝ်လဝ့် ဆံင့်မံင်ၜးအှ်ဏှ်သိုဝ် အ်ုခေါဟ်ကျံင် အ်ုမးအေအှ် လ်ုသှ်ေယာႋၜးသယ် အေအှ်ဆေဝ်ႋစာ်ၜိုဝ် ပၠယ်တဝ်ကဲလာဆာ်။ ပ်ုဖၠုံယှင်ဖေါဟ်သယ်ယိုဝ် လ်ုအ်ုဝီႋအိုဝ် အှ်ဝေ့ဍး ဃှူ့ဃှူ့ဃှင်ဃှင်၊အှ်ဝေ့ ယှူးယှူးၜါၜါ ကိုဝ်ဟှာဍေလှ်။ ဆ်ုသာဆာ့ လ်ုဖၠုံအ်ုဟှူ့ဟှာ အ်ုဖင့်ခေါဟ်သီး အှ်ဝေ့ဏင်ၜိင်အေး။ လာဏင့်ၜိုဝ်သီး အ်ုခါ့ဍးယိုဝ် ကါင်ဖါႋထင်းသာ၊ အှ်ထင်းထာင်ဍေဆ်ုဍုဂ်ဆ်ုယာ၊ ၜးဏှ်လယ့် ၜးကါင်ဖါႋလင်ဆင့်ဏှ် ဟ်ုၜးအင်းဃှူ့ဝေ့ အ်ုထိုဝ်အ်ုဏာ့၊ ဟ်ုၜးဏးသှ်ေထာင် က်ုလိုင်ဝေ့ဆေဝ်ႋလှ်။ ဖၠုံယှင်ဖေါဟ်ယိုဝ် အှ်အ်ုယုဂ်ၜးထၠိုင့်၊ သုင်းဟှေဝ်သာအွာထၠိုင့်ဏှ်သီး ဟ်ုလဝ်သှ်ေဆေဝ်ႋ၊ မ်ုမၞီႋအ်ုဟှူ့ဟှာ ဟှယ့်အင်းယူႋသီးစာ်ၜိုဝ် ယဝ့်မာဆေဝ်ႋလှ်။

စင်ၜိုဝ် ဟ်ုသုင်းသာဟှေဝ်သီးယိုဝ် လ်ုဟ်ုဖၠုံယှင် ဖင့်ခေါဟ် သုင်းသာဟှေဝ်၊ ဏယ်အင်း လုက်ဆိင့်သီး ၜးဏင်မိင်အေး။ လာဏင့်သီး လ်ုဖၠုံဆိုဒ် အ်ုဟှူ့ဟှာဏှ် သုဲးလ်ုမဝ့်မှ်၊ ဆိုဒ်ဆးလ်ုမဝ့်မှ် အ်ုခေါဟ်ကျံင် ဟ်ုဏယ်အင်းဝေ့ လုက်ခၠေသှ်ေအေးလှ်။ အ်ုခါ့ယိုဝ် ဖၠုံဆိုဒ်အ်ုဟှူ့ဟှာ ဟှယ့်အင်းယူႋလ်ုဏင်ယုဂ်သီး ဟ်ုလဝ်သှ်ေဆေဝ်ႋလှ်။ ၜးဏှ်လယ့်စာ်ၜိုဝ် ၜးကင်ဖါႋထင်းသာ၊ ၜးပၠီပၠာအ်ုခါ့ယိုဝ် ဟ်ုဍးၜးယုဂ်။ ယှာႋလဝ်ဆိုဝ်ဆ်ုခၠါင်လ်ုဖးသီး ဟ်ုၜးသှ်ေယာ့ ဟ်ုၜးဆံင်းမံင်း လင်သာ က်ုလိုင်ဆာ့မာဆေဝ်ႋလှ်။ ၯင်းခေါဟ်အင်းယူႋဆိုဒ်လ်ုလုဂ်၊ မၞီႋအင်းယူႋဆိုဒ်လုက်ထုက်၊ ၀ဝ်ႋၜိင်းလင်ဖါႋ ခေဝ့်အင်းစုဂ်ဋ္ဋ ဆ်ုလ်ုဖးဏှ် ဍေၜးကါင်ဖါႋထင်းသာသယ် အ်ုဟှာင်အ်ုစံင်းယိုဝ် ၜးဍံင်ဝေ့ဍောဟ်မာလှ်။ ၜးဆါင့် ဘာႋသင့်ခါ့ ဖၠုံဖေါဟ်သီးမွာဲအ်ုဟှေဝ်၊ ဖၠုံၜါယွာခဝ့်သီးမွာဲအ်ုဟှေဝ်၊ လယ်ကယ် တၠာခုင်ႋသီးခဝ့်မွာဲအ်ုဟှေဝ် ပ်ုဖၠုံယှင်ဖေါဟ်မဝ့်မှ်လဝ့် အ်ုခေါဟ်ကျံင် လ်ုဟှာဍေလ်ုဟှာ ၜးဏးသှ်ေလောဟ်သာ၊ ၜးပၠယ်တဝ်လောဟ်သာ၊ အေလ်ုၜးသယ် လ်ုမိင်မိင် အေအှ်ဆေဝ်ႋစာ်ၜိုဝ် ၜးလဝ်ပျက်လောဟ်သာ၊ ၜးထၟါလောဟ်သာ၊ ၜးအဲဆိုင့်လောဟ်သာ ကိုဝ်ဟှာဍေဆေဝ်ႋလှ်။ ထၠိုင့်ခွိက်ဆ်ုတ်ုဖၠသယ်၊ ဆ်ုအ်ုမးသယ်လ်ုစံင်းဏှ် မာဏေဝ်ႋထာင်ဆ်ုဏံင့်ယာ၊ မာဏေဝ်ႋထာင်အ်ုဍံင်ဟှံင် ဟ်ုၜးအှ်ထာင် ဃှူ့ဃှူ့ဃှင်ဃှင် ၜးအ်ုခါ့ဖဝ်ႋ။ ဆ်ုဃှူ့ဃှင် လ်ုအှ်ၜး ဟ်ုဆိုဒ်လ်ုဆိုဒ်ဏှ် ထင်းထဝ့်ဝေ့ကဲအေးလှ်။ လ်ုဟှာဍေလ်ုဟှာ ပၠီပၠာအေအး၊ ကင်ဖါႋအေအး ပ်ုဆိုဒ်သယ် ဍိင်ယိက်ဍိင်မ်ုလင်ဆင့်ဏှ် ဟ်ုလဝ်သှ်ေဝေ့ ထီ့ဆာလှ်။ ဟ်ုအေလဝ်ပၞာ့စာ်ၜိုဝ် ဆ်ုလ်ုဆ်ုဆိုင်ထီ့သီးယိုဝ် လ်ုဖၠုံးဏီ့ဖၠုံးဏှ် ကဲထင်းဝေ့ ထီ့လ်ုနုံ.သှ်ေအေးလှ်။ ဟ်ုအေပ်ုကုံႋဏေဝ်အေအး ဆ်ုဆိုင်ထီ့အေအးဖၠုံးစာ်ၜိုဝ် ထီ့မာ့ဆၞာ်၊ထီ့ပင်းလာဲသီး ကဲထင်းဝေ့သှ်ေဆေဝ်ႋလှ်။ အေဟှံင်ဍဝ် ဆ်ုလ်ု ဍိင်းခၠီ့သီးယိုဝ် လ်ုဖၠုံးဏီ့ဖၠုံးဏှ် ကဲထင်းဝေ့ ဍိင်းသောဟ်ထီ့ ကဲအေးလှ်။ ဟ်ုအေပ်ုကုံႋဏေဝ် အေအးစာ်ၜိုဝ် မ်ုကဲထင်းဝေ့ ဍိင်းသောဟ်ထီ့ဟှံင် ဟ်ုမ်ုအင်းဝေ့သှ်ေဆေဝ်ႋလှ်။ ၜေ့ဏှ်သိုဝ်ဆေဝ်ႋ ပ်ုဖၠုံဖေါဟ်ယှင်ဖေါဟ်ယိုဝ် အေကါင်ဖါႋထင်းသာဏှ် မ်ုထင်းထဝ့်ဝေ့ လ်ုယဝ့်လိုင်ႋအ်ုခေါဟ်စံင် ၜေ့သိုဝ် ဆ်ုဆိုင်ထီ့၊ ဍိင်းသးဖၠုံးသိုဝ် ပ်ုကုံႋထင်းသာအေအးစာ်ၜိုဝ် မူႋလ်ုဏီႋမ်ုထံင်ဖဝ့်တိုင်ႋထီ့ဆာလှ်။ ပြုႋအေဃှူ့ဃှင် ဍောဟ်ယှာႋကိုဝ်ႋၜၠင် ဆ်ုလဝ်သိုဝ် လ်ုဟှာဍေလ်ုဟှာ ပ်ုအေ ဖံင်းထးစူး ခၠိင့်ခၠိင့်ဏံင်ဏံင်စာ်ၜိုဝ် ဟ်ုဆိုဒ်ဆ၊ လိက်လာဲ၊ ဆ်ုဃှီ့လာသယ်လ်ုဖး မ်ုထင်းထဝ့်ဝေ့ ထီ့ဆာႋလှ်။

အေဟှံင်ဍဝ် လ်ုဟှာဍေလ်ုဟှာ အင်းကှ်ေလင်သာ (မာန)ဍောဟ်သီးဟှေဝ်အေးလှ်။ ဟ်ုအင်းကှ်ေလင်သာ (မာန)ယိုဝ်သီး မွာဲဝေ့ဍး ဆ်ုကါင်ဖါႋလ်ုမိင်ဆေဝ်ႋလှ်။ က်ုဏင်က်ုဏင်သီး အှ်ကှ်ေလင်သာ ၜေ့ၮ်ုမ်ုသှ်ေပညာ့သိုဝ်၊ ယ်ုသီးသှ်ေဆေဝ်ႋ၊ ၜေ့ၮ်ုအာဏာ့၊ ပါဝ့ါ(power)အှ်သိုဝ် ယ်ုသီးအှ်ဆေဝ်ႋ၊ ၜေ့ၮ်ုမာဏေဝ်ႋသိုဝ် ယ်ုသီးမာဏေဝ်ဆေဝ်ႋ ၜေ့ဏှ်သိုဝ် အေအှ်ကှ်ေလင်သာဆေဝ်ႋစာ်ၜိုဝ် လ်ုဟှာဍေလ်ုဟှာ ထံင်ခဝ့်လယ့် ဖဝ့်တိုင်မ်ုဏေဝ်ႋ၊ ဆ်ုဃှူ့ဃှင်မ်ုအှ်၊ ထံင်းခဝ့်လယ့် ဖံင်းစုဂ်ထးစူးမ်ုခိုင့်၊ စင်ၜိုဝ် အေအှ်ကှ်ေလင်သာၜေ့ဏှ်သီး မွာဲဝေ့ဍး ဆ်ုကါင်ဖါႋလ်ုမိင်ဆေဝ်ႋလှ်။ အေဟှံင်ဍဝ် ဟ်ုဖၠုံယှင်ဖေါဟ်ယိုဝ် ၜးဆာင့်ဍေပညာ့အ်ုဟှာင်ခဝ့်သီး အှ်ယှာႋၮါင်း ဆိုဒ်အ်ုဟှူ့ဟှာဍာ်ဏှ် ဟ်ုလဝ်သှ်ေဆေဝ်ႋလှ်။ စင်ၜိုဝ် ဟှယ့်ထာင်လ်ုခါင့် ဖေါဟ်ဍီပၠီးသယ်လ်ုဖး မာလောဟ်လိက်ဏှ် အေအး၊ အဲလင်ဆိုင့်ထာင်လာဆိုဒ်ၜေ့မ်ုသှ်ေသိုဝ်၊ ၜေ့လ်ုကျုင်းၜးသာသိုဝ် လ်ုဆ်ုသှ်ေယာ့ပညာ့ဆာလ်ုဖးသီး အ်ုတာအှ်ဝေ့ ကိုဝ်ဟှာဍေဆေဝ်ႋလှ်။ ပညာ့သီးယိုဝ် မွာဲဝေ့ဍး မ်ုလေဝ်အ်ုကျးဖိုင်သာ မှ်ေတိုင်(ဆ်ုဖါန်ႋ)လ်ုမိင်ဆေဝ်ႋလှ်။ ဟ်ုပညာ့အေလ်ုအှ်ၜး ဟ်ုမၞီႋဟှာဏှ် ဟ်ုဖၠုံဟှူ့ဟှာ အင်းလိင့်ဟ်ုယဝ့်၊ ဆ်ုမ်ုအင်းယူႋဟ်ုဆိုဒ်သီး ယဝ့်ဆေဝ်ႋလှ်။ ဆ်ုသှ်ေယာ့လ်ုအှ်ၜး၊ ပညာ့လ်ုအှ်ၜး မၞီႋလ်ုဟှာဏှ်ၜေ့ဆ်ုအင်းမိုင့်သိုဝ် ၜးမာဖှ်ေလုက်ဆိင့်ဆေဝ်ႋလှ်။ လ်ုလိက်အင်းသံင်းဖိုင်ဏှ် ကေဝ်ထဝ်ႋလင်ဝေ့အှ် ထီ့ဆာယုဂ်။ ဟှေး ဖၠုံဖေါဟ် ဟှေး ဖၠုံဖေါဟ် လိက်ဏှ် ၜးလယ့်လ်ုမာလောဟ်၊ စှ်ၮ်ုသာ စှ်ၮ်ုသာ လ်ုသှ်ေလိက် မှ်ေၜၠဟ်လုက်ခၠာ ဟှေး ဍးၜိုဒ် ဟှေး ဍးၜိုဒ် အဲလာၮ်ုလိက်ဍေၮ်ုဆိုဒ်၊ ဆ်ုဟှယ့်ဖိုဒ်၊ ဆ်ုဟှယ့်ဖိုဒ်၊ သၞဝ့်ဃှူ့ဃှင် ဟ်ုၜးတိုဒ် ၜေ့ဏှ်သိုဝ်ဆေဝ်ႋလှ်။ လ်ုဟ်ုမၞီႋအ်ုခေါဟ်ထီး၊ ဟ်ုမၞီႋအ်ုခေါဟ်ကၠိုင်လ်ုဟှာ မ်ုကဲၜးသာသီး ဟ်ုကဲဝေ့ဍး ယဝ့်အေးဆေဝ်လှ်။ စင်ၜိုဝ် မ်ုကဲၜးသာ မၞီႋဍောဟ်ယှာႋစီကၠာထင်းထဝ့်လ်ုဟှာစာ်ၜိုဝ် ဟ်ုၜးကၠေစိုဒ်ဝေ့ လိက်ပညာ့ဏှ်လှ်။ အေဟှံင်ဍဝ် က်ုဏင်က်ုဏင် ကဲလာဏင့်ဖၠုံယှင်ဖေါဟ်သီး ဖၠုံဆိုဒ်လိက်လာဲသယ်အ်ုဟှာင်အ်ုစံင်း ဏးလ်ုသှ်ေၜး၊ လ်ုသှ်ေယာ့လင်ၜးသားသီး အှ်အးမာဍာ်။ ဏးသှ်ေလာဏင့်သီး မ်ုၜးမာလောဟ်၊ မ်ုၜးပဝ်လိက်လာဲဏှ် ပဝ်ဝေ့၊ ကေဝ်ဝေ့ လ်ုကဲၜး ဟ်ုဖၠုံဖေါဟ်သီး ဟ်ုဍးၜး၊ ခံင်ၜးအးမာဆေဝ်ႋလှ်။ အ်ုယိုဝ်ဏှ် မွာဲဝေ့ဍး လ်ုယ်ုဍးၜး၊ ခံင်ၜး လ်ုယ်ုခင်းထာ် လ်ုကါင်လ်ုခဝ့်ဍာ်လဝ့်၊ လ်ုဟှူ့ဟှာသီး မ်ုအှ်ဍာ်အးမာဆေဝ်ႋဟှးဏှ် သှ်ေယာ့လုက်ဍာ်အေး။ စင်ၜိုဝ် ဟ်ုမၞီႋအေအှ်ၜးဏှ်သိုဝ်ဆေဝ်ႋအိုဝ် ဖၠုံဆိုဒ်အ်ုဟှူ့ဟှာ အေအင်းလိင့်၊ အေဍာနုက်လင် လ်ုဆိုဒ်အ်ုဟှူ့ဟှာခဝ့်သီး နုက်လင်ဝေ့ယဝ့်ဆေဝ်ႋလှ်။

စင်ၜိုဝ် ကဲထင်းမၞီႋလ်ုဟှာ ဟ်ုဆိုဒ်အ်ုဟှာင်အ်ုကျံင်းဏှ် ဟ်ုလ်ုသှ်ေယာ့ၜးဆါ်ၜိုဝ် မွာဲပၞံင့်ဍာ်အေးလှ်။ လ်ုပ်ုမျေင်စိင်ႋဖိုင်ဏှ် ၜေ့သိုဝ် မိင်ဟှေဝ်မ်ုအှ်ထဝ်သိုဝ် လ်ုကှ်မာကဲ မာနိုင်လ်ုဖးဏှ်ၜးမာဍးဆ်ုလှ်။ ဖၠုံယှင်ဖေါဟ် အေဃှူ့ဃှင်စာ်ၜိုဝ် ဖဝ့်တိုင်ဏှ် အှ်ဝေ့ထံင်ဟ်ုခင်းထာ်ယိုဝ်လှ်။ အေဟှံင်ဍဝ် ဟ်ုသှ်ေယာ့ၜး ဖၠုံယှင်ဖေါဟ် သှ်ေပညာ့၊ ခၠုဂ်ခီခါင့် ၜူးလင်သာ ဍေပညာ့သယ်အှ်အးဍာ် အ်ုခေါဟ်စံင် သုင်းမုက်သာလိုင် သာထောဟ်ခေဝ် ဖာ့ဍောဟ်မာလဝ့်။ လ်ုဖၠုံယှင်ဖေါဟ်ဖင့်ခေါဟ် ၜးသာအှ်ဃှူ့ဃှင်၊ မူ့လာဆိုဒ်ထင်းထဝ့်ဍးဝေ့ၜေ့ဆိုဒ်အ်ုဟှူ့ဟှာသိုဝ် သာအှ်ၜးဆေဝ်ႋဏှ် ကေဝ်လင် ဍုဂ်သှ်ေယာ့ၜးဍေလိက်သာထင်ႋယိုဝ်ဆေဝ်ႋလှ်။ ယ်ုဝေ့ မွာဲဖၠုံသှ်ေပညာ့ဆာလ်ုဟှာ မွာဲဍာ်အေး။ လ်ုဆ်ုပဝ်ႋလိက်ဆာ အ်ုသာဖိုင် အေဏေဝ်ႋၜး (ဗဟုသုတ)လ်ုစယ်လ်ုမွာဲသီး ယ်ုသာမုက်ယုက်ဆေဝ်ႋလှ်။ စင်ၜိုဝ် ဖၠုံၜါသင်ခါ့သီး မွာဲအ်ုဟှေဝ်၊ ဖၠုံၜါယွာသီး မွာဲအ်ုဟှေဝ်၊ လုက်ဆိင့်လုက်ဆိင့်ဖၠုံယှင်ဖေါဟ်သယ်ကိုဝ်ဟှာဍေ လ်ုဟှာဍေလ်ုဟှာ မာနုံ့မာဏာလောဟ်သာလ်ုဃှေဝ်.၊ဆင်းလင်ၜိုင်ႋလောဟ်သာလ်ုဃှေဝ်ႋ၊ အဲဆိုင့်ထာင်လောဟ်သာ၊ လ်ုဖၠုံယှင်ဖေါဟ် ဖဝ့်တိုင်အိုဝ် ဃှူ့ဃှူ့ဃှင်ဃှင် တ်ုတွယ်ထင်းစူး လေဝ်ႋလာဖၠေဖၠေးကဲလာဆာ်။