Wp/kjp/ယးဖၠါႋဓံင့်

From Wikimedia Incubator
< Wp‎ | kjpWp > kjp > ယးဖၠါႋဓံင့်
Jump to navigation Jump to search

လ်ုအ်ုဝီႋဍးမးအိုဝ် လ်ုၮံင်းဖါဍောဟ် လ်ုၮံင်းအ်ုဖုင်ၮှ် ယး၊ ခၠါ်၊ ဍေထိင်ထုံလ်ုဖးအှ်ကုံဝေ့ အးအာႋလှ်။ လ်ုယဝ်ၮှ် ဆ်ုခေါဝ်ႋစွးဝေ့တာႋ ၮံင်းဖါဍောဟ်ၮှ် ထီ့သါ်ဆာ့ဆေဝ်ႋလှ်။ ထံင်ႋၮှ် တ်ုဝါန့်ဖေါဟွသီး ဍးယးၮှ် မ်ုသာသါ်ခွိက်ၮံင်း လဝ်လိုတ်သာၯံင် လ်ုၮံင်းၰံင် မူႋနုက်ခဝ့် ထီ့ခၠေါတ်အှ်ၜုဂ် အ်ုခေါဟ်စံင် ၜုဂ်ၮေဝ်ႋမ်ုလံင်ႋကျင်း ဖါဍောဟ်ၯံင် ဆေဝ်လင်ဝေ့ လါင်ႋတိုင်ၮှ်လှ်။ ယးဂမၠိုင်ႋသီး သှ်ေယာ့ဝေ့ တ်ုဝါန့်ဖေါဟ် ဆေဝ်လင်လါင်ႋတိုင် မ်ုသာသါ် ၮံင်းၮှ်လ်ုၜၠင်တာႋ သာက္တဝ် အှ်ကံင်းလဝ်ထါင်လိုတ်သာလှ်။ ယးဖေါဟ်အွာ၊ ယးလူႋ၊ ယးဍံင်သီး ကုံးၜးၮင်မိင်လိုင်အေး၊ လေဝ်ဝေ့ လ်ုခၠါ်အှ်အိုဝ်လှ်။ ခၠါ်ဍေထိင်ထုံလ်ုဖး လဝ်ထင်းဝေ့ "မွာဲပ်ုၮှ် ၜးက္တဝ်အ်ုလင်ႋအှ်အေး၊ ၮံသင်းသါ်ခွိက်လာႋၮင့် ပ်ုလုဂ်လင်သာ လ်ုဖိတ်ပါပိုင်ဖင့်လးၮှ် ဆ်ုဍးပ်ုၮင်ႋ ၯာအေး၊ ၮှ်သီးက္တဝ်လင်သာၮှ် ကုံးဍးၮှ်သီးဝေ့ဆါ်" လဝ်ဖှ်ေဝေ့ ယးသီးၮှ်လှ်။ ယးဂမၠိုင်ႋ အှ်လ်ုသှ်ေလိုင် လေဝ်ကုံထါင်ဝေ့ လ်ုယးဖၠါႋဓံင့်အှ်အိုဝ်လ်ုၜၠင် ယးဖၠါႋဓံင့်လဝ်ဖှ်ေဝေ့ "က္တဝ်ဆ်ု ၮင်ႋမိင်လ်ုၰေဝ် ယ်ုကုံးၜးယုဂ်၊ တ်ုဝါန့်ဖေါဟ် ထင့်လင်လါင်ႋ အေသာထီ့ခိုတ် ယးလူႋ၊ ယးဍံင်လ်ုဖး စါင်းဝိင်ဝှးမိုဝ်သဝ့် ၮံင်းဖိုင်ၮှ်ဆါ်။ ယးဖေါဟ်ယးလီလ်ုဖး လေဝ်အှ်ခိုဝ်ဝယ် လုလါင်ႋခေါဟ်ထိုဝ် အိုဝ်ၯံင် ဆ်ုဍုင်းလင်လါင်ႋခိုတ် နုက်လင်ပျလါင်ႋဖိုင် ထါင်လင်ပျထီ့ လ်ုထီ့ခၠေါဟ်ဖိုင် အိုဝ်ဆါ်၊ ထီ့ၜုဂ်မ်ုသါ်ခိုတ် ယးလူႋ ယးဍံင်သီးနုက်လင်ပျလါင်ႋဖိုင် ယ်ုမ်ုဖူ့ထင်းခွိက်လဝ့်" လဝ်ဝေ့ ၜေ့ၮှ်သိုဝ်လှ်။ ယးဂမၠိုင်ႋလ်ုဖးၯိုင့် ယးဖၠါႋဓံင့်ဖှ်ေလင့်ဆ်ုကုံးၮှ် ၜးၮါႋမုက်သာ ကိုဝ်ၜိင်းဍေဆေဝ်ႋလှ်။ တ်ုဝါန့်ဖေါဟ် ထင့်လင်လါင်ႋယာဲၜိင်းၯံင် သာဝေ့ထီ့လ်ုၜၠင် ယးလူႋ ယးဍံင်လ်ုဖး ၰာင်းဝိင်ဝှးၮံင်းဖိုင် မိုဝ်တ်ုယှာႋ က်ုလုဂ်ၯင်းအာ ဆေဝ်ႋလှ်။ ယးဖေါဟ်ယးလီသီး ထါင်ပျထီ့ နုက်လင်လါင်ႋဖိုင် ဖံင်ခွိက်ဝေ့ ဆ်ုသီ့ဆေဝ်ႋလှ်။ တ်ုဝါန့်ဖေါဟ်ဆာ့လ်ုဖး ဍးယးမိုဝ်အး မုက်သုင်းမုက်သာစွး ယေါဝ်ႋၜုဂ် ယးဖေါဟ်ယးလီလိုင်အေး သာတ်ုယှာႋဝေ့ ထီ့ၮှ်ဆေဝ်ႋလှ်။ သာတ်ုယှာႋ သိင်သိင့်ၮီ သင်ႋသင့်ၮွလ်ုၜၠင် ထီ့လင်သါ်တ်ုယှာႋၮှ်တာႋ ယးဍံင်ဖူ့ဖးတ်ုမိုင့် ယးလူႋဖူ့ဖးတ်ုမိုင့်၊ ယာႋဖၠါႋဓံင့်သီး ဖူ့ဖးခွိက်တ်ုမိုင့်ၯံင် ထါင်လင်ဝေ့ လ်ုထီ့ခၠေါတ်ဖါဍောဟ်ဖိုင် လုက်ဆိင့်ၮှ်လှ်။ ၜးလ်ုကေမူႋၮါအ်ုခေါဟ်စံင် တ်ုဝါန့်ဖေါဟ်သီး လံင်ခၠုဂ်ၮင်ၜိင်းအေး။ သာသါ်ၮံင်း ထီ့သါ်လ်ုၜၠင် တ်ုဝါန့်ဖေါဟ်သီးစါင်းလင် ဖံင်းယးၮှ်တာႋ ဍးယး ၮင်ႋၜိင်းလိုင်အေး။ တၟေင့်ဆိုင်သာ ကိုဝ်ၯာဍေလှ်။ မာၮေဝ်ႋဖၠါင် လံင်ဆေဝ် ခၟုက်အူးဖင့်လးလ်ုၜၠင်တာႋ ၮေဝ်ႋအင်းသာ့ဝေ့ က်ုယာဲ ခၠါ်ဍေထိင်ထုံသီး လုက်ခၠါၮှ်လှ်။