Wp/kjp/ဖၠုံလိက်ထါ်ၜံင်
လ်ုအ်ုဝီႋ ဍုံသုဓမ်ဖိုင်ၮှ် ယောဝ်ၜးဃွှာ(မကုဋ) ပိုင်ဝေ့ဍုံဌာန့်လှ်။ အှ်ဃွှာခင်းထါ် ဟ်ုဍောဟ်ဟ်ုမူႋ ဖါႋဍောဟ်လ်ုဖး အ်ုဖိုင်ၮှ် ဖၠုံဟ်ုဍောဟ်ဟ်ုမူႋဖါဍောဟ် ဖူ့ဍာ်ကဝ် ဟ်ုစါ်တၠါဥာၮ်ႋ အှ်ဝေ့လ်ုၯာလှ်။ ဖၠုံဟ်ုဍောဟ်ဟ်ုမူႋဖါဍောဟ် ဖူ့ဍာ်ကဝ်ၮှ် အင်းတါင်ပ္တံင် ထင်းၮေဝ်ႋဝေ့ ဖၠုံလိက်မောဝ်ႋဖၠုံးလိက်က်ုယိုင့်သီးၮှ်လှ်။
ဖၠုံတၠာဥာၮ်ႋဖူ့ဍာ်ကဝ်ၮှ် အင်းတါင်ပ္တံင်ထင်းၮေဝ်ႋဝေ့ ဖၠုံလိက်ခင်းထါ်ၯံင် ဆူ့ကေဝ်ဝေ့ ဖၠုံလိက်လာဲၮှ်လှ်။ လိက်ပိဋကတ်သိုင့်ပုံၮှ်သီး ခၠယ့်က်ုဍာ ဆူ့ကေဝ်ထါင်ဝေ့ လ်ုဖၠုံဆ်ုခၠါင်ခဝ့် ၯံင်ဝေ့လုက်ဆိင့်ဆေဝ်ႋလှ်။ ဖၠုံဆိုဒ်ဖေါဟ်အှ်ဍုံသုဓမ်ဖိုင်လ်ုဖး မုက်သုင်းမုက်သာ မာလေါဟ်ၮေဝ်ႋဝေ့ ကိုဝ်ၯာဍေဆေဝ်ႋလှ်။
ၮိင်းသာထါ်(၄၁၉)ၮိင်း သာသၞါ့ၮိင်းသာထါ်(၁၆၁၁)ၮိင်းၮှ် အနိရုန္ဓ ပ်ုကင်(ပုဂံ)စဃွှာ ၯယ့်လင်ဍုဂ်ဝေ့ ဍုံသုဓမ်ၮှ်တာႋ ဖၠုံဟ်ုဍောဟ်ဟ်ုမူႋဖါဍောဟ်ဖူ့ဍာ်ကဝ်ၮှ် ဆူ့ကေဝ်ဝယ်ၯံင် လိက်ရုက်လးထူ့လ်ုဖးၮှ်အိုဝ် ၜံင်းထင်းၯေဝ်အွာၯံင် ဍေအ်ုပိုင်ၰံင်ႋ ဖၠုံဆိုဒ်ဖေါဟ်လီသီးလ်ုဖး ယိုဝ်ထင်းၮေဝ်ႋလိက်ထူ့စါင်းၯာ့သူးဝေ့ လ်ုကေမူႋၮာၮှ်ယုဂ်။ ပ်ုကင်(ပုဂံ)စဃွှာ အနိရုန္ဓၮှ် ဍုဂ်ၮေဝ်ႋဍုံသုဓမ်ၯံင် အင်းမာၮေဝ်ႋဝေ့လိက်ပိဋကတ် အ်ုထူ့သိုင့်ဆီ့၊ ဖ္ဍိုဒ်ထင်းဝေ့ လ်ုက်ုဆင့် သိုင့်ဆီ့ၮီ့ဍူၮှ်လှ်။ ယောဝ်စဃွှာ "မကုဋ"ၯံင် "မနူဟာ"သီးဆ်ုကိုဝ်ဝေ့ဆေဝ်ႋလှ်။ စဃွှာအနိရုန္ဓၮှ် ထါင်ကိုဝ်ပျဝေ့ သင့်ဂၟီ့(၃၀၀၀) ဍေဍုံဖေါဟ်ဂမၠိုင်ႋ စူးသှ်ေခင်းမာအ်ုၯာ (၃၀၀၀)ၮှ်လှ်။
ဖၠုံဟ်ုဍောဟ်ဟ်ုမူႋဖါဍောဟ် အ္စာတၠါဥာၮ်ႋ ဖူ့ဍာ်ကဝ်ၮှ် ဍေမၞီႋအ်ုၯာ(၄၀)ၯာၮေဝ်ႋစါင်းၮေဝ်ႋဝေ့ ဖၠုံလိက်ထူ့ၮှ်လှ်။ လေဝ်ထင်းၯာဝေ့ လ်ုမိင်လးကၠါ လ်ုထဝ်ၜးလ်ုထဝ် ထံင်ထင်းမိင်ဝေ့ ခါန်ႋဆိုင့်ဌာန့်ဝဖိုင်အိုဝ်လှ်။ ဖူ့ဍာ်ကဝ်ၮှ် အှ်မိင်ဝေ့ လ်ုဌာန့်ဝဖိုင် မာလေါဟ်ၮဲလောဟ်ဖှ်ေထါင် ဖၠုံလိက်လာဲသီးၮှ်လှ်။
ဖူ့ဍာ်ကဝ် လ်ုအ်ှလိုင်ၜးလ်ုခါင့်ယိုဝ် ဖၠုံလိက်လာဲသီး ဆ်ုမာလေါဟ်ယှာလင်ထါင်ဝေ့ အ်ုထဝ်ထဝ်ၮှ်လှ်။ လာႋၮင့်သီး လင်ဆိုဒ်ဖေါဟ် လင်ဆိုဒ်လီ မာလောဟ်ၮေဝ်ႋထါင်ဝေ့ ဖၠုံလိက်လာဲၮှ်ဍာ်လှ်။ ယေါဝ်စဃွှာ ဍေပ်ုကင်(ပုဂံ)စဃွှာလ်ုဖး လေဝ်ထင်းဍုဂ်သါင့် ၜးဖိုက်သာအ်ုခေါဟ်စံင် ၜးစါင်းၜးၯာအးဖိုင့်အးၜၠင် ဖၠုံလိက်လာဲခင်းထါ်ၮှ် လင်မာႋဆိင်းပၠါခွိက်ဝေ့ဍးလှ်။ ၜိုဝ်ၮါင်းယိုဝ် အ်ုထိုဝ်အ်ုမေံ အှ်ဍာ်ၮှ် ဖၠုံဆိုဒ်ဖေါဟ်သီး အင်းတါင်ပ္တံင်ဆိုင်ထါင် ဖၠုံလိက်ခင်းထါ် အှ်ထဝ်ႋထါင်ထီ့ဆာဝေ့လှ်။