Wp/kjp/ဖၠုံဏိင်းထင်းသင့်
ကေါဝ်ကြင်ဖိုင် မၞီႋသီးလ်ုဖး လ်ုၯာဆိုဒ် အှ်ဍးဍေ အ်ုၮိင်းထင်းသင့်ၮှ်ဆေဝ်ႋလှ်။ ခေါဝ်ႋလာအွာသီး ၮိင်းထင်းသင့်ၮှ် မွာဲဝေ့ ဇန္နဝါရီလာယောတ်လ်ုသင့်ၮှ်လှ်။ မျေန်မာၮိင်းထင်းသင့်ၮှ် မွာဲဝေ့ လာတာဖိုင်ၮှ်လှ်။ တ်ုရုဂ်ၮိင်းထင်းသင့်ၮှ် မွာဲဝေ့ထါင့်ခုက်ဖါဍောဟ် ယေါတ်ထင်းလ်ုသင့်ၮှ်လှ်။ ဖၠုံဆိုဒ်ဖေါဟ်သီး ၮိင်းထင်းသင့်ၮှ်ဍဝ် မွာဲဝေ့ထါင့်ခုက်ဖေါဟ် ယေါတ်ထင်းလ်ုသင့်မူႋၮီၮှ်ဆေဝ်ႋလှ်။
ဖၠုံဆိုဒ်ဖေါဟ်ၮိင်းထင်းသင့် ၯယ့်ကဲထင်းယိုဝ် ယိက်ဍာ်အေး၊ ထံင်ႋခေါဝ်လာအွာပိုင်မျေန်မာခါန်ႋ (၁၉၁၄)ၮိင်းခါ့ဍးအိုဝ် ပါလီမိုင်အ်ုမတ် စဝ်ဂျံင်ဆေန်ဍီဖိုဝ်းမေန်းသီး အင်းကိင်ၮေဝ်ႋဝေ့ ဖၠုံဆိုဒ်ဖေါဟ်ၮိင်းထင်းသင့် (၂၆၇၇)ၮိင်း ပ္တံင်လင်ၮေဝ်ႋဝေ့ ၮိင်းသာထါ်ၮှ် မွာဲဝေ့ဖၠုံဆိုဒ်ဖေါဟ် ထံင်လင်ခါန်ႋမျေန်မာဖိုင် အ်ုခင်းထါ်ၮှ် ၮးၮေဝ်ႋထါင်ဝေ့ဍးဆေဝ်ႋလှ်။
ဖၠုံဆိုဒ်ဖေါဟ်ၮိင်းထင်းသင့်ၮှ် ထံင်ထါင်(၁၉၃၇)ၮိင်းၮှ် ၜးကါၜါ်ခွိက်ရုံႋလုက်ခၠါ၊ ၜးပါဍောဟ် ယုဂ်ယါန်းဆိုင် ဖၠုံဆိုဒ်ဖေါဟ်ၮိင်းထင်းသင့်ၮှ်လှ်။
ဖၠုံဆိုဒ်ဖေါဟ်ၮိင်းထင်းသင့် လါထါင့်ခုက်ဖေါဟ် ယေါတ်ထင်း(၁)သင့်ၮှ် အေထံင်ဖဝ်ႋစါ်ၜိုဝ် ဆ်ုဖါန်ထင်းသင့် မူႋမေံအ်ုယံင့်ဝဝ် ဆင်ခူးလင်စွး လ်ုကေၯဝ်ၮှ် ယုဂ်ယါန်းထင်း အ်ုဆိုဒ်ဖေါဟ်အ်ုလေင်ႋၯံင် မောဝ်ႋဍောဟ်မာန်ထဝ့်လ်ုဖး လဝ်လင်အင်းသံင်းဆ်ုခၠါင် ဆံင့်ၮးဆိုင် ကိုဝ်ၯာဍေလှ်။ လဝ်လင်ဆ်ုၯံင် ပ်ုကျာမေဝ်၊ အင်းမေဝ်၊ အင်းထီ့၊ လေါတ်ကိုဲပါမုက် ထုင်းလီႋတုံႋ သိင်ႋၮီခၠံင်ၮှ်လှ်။
ဖၠုံဆိုဒ်ဖေါဟ်ၯယ့် မူးမူးခွါ့ခွါ့လ်ုဖး ကံင်ထင်းဝေ့ ဖၠုံဆိုဒ်ဖေါဟ် ကံင်သိုဝ်ဖါ်ၜိင်း ကိုဝ်ၯာဍေလှ်။ သုင်းၰုဲ့သာယဝ့် မုက်သုင်းမုက်သာ ကိုဝ်ၯာဍေၯံင် ယောဝ်ႋဖိုင်တုံႋ ဆ်ုထုင်းလီႋ ဍေလ္ကံင်ႋသီးၮှ်လှ်။ ဖၠုံဆိုဒ်ဖေါဟ်ၮိင်းထင်းသင့်ၮှ် ၜိုဝ်ၮါင်းယိုဝ် ဖၠုံဆိုဒ်ဖေါဟ်သီး မာကုံဝေ့ အးထင်းယုဂ်။ စူးယာ့ခိုတ်ခဝ့် ကိုဝ်တ်ုဝါန့်ဍေ မ်ုမာဖၠုံဆိုဒ်ဖေါဟ်ၮိင်းထင်းသင့် မာၜုံးမာၜါ မ်ုဍးၜးဝေ့ဍာ်လှ်။ ဖၠုံဆိုဒ်ဖေါဟ် ၮိင်းထင်းသင့်ယိုဝ် စူးယာ့ကေခါင့်ခိုတ် ဍိင်ယိက်ဍိင်မ်ုဍောဟ်ယှာႋ ထင်းထဝ့်ဝေ့ဍာ်လှ်။