Wp/kjp/ဖၠုံဏါ့ဍိင်
ဖၠုံၮာဍိင်ယိုဝ် ယိုဝ်ပျထာခေါဟ် အေဍိင်ထင်းၮှ် ဟ်ုဆံင့်ၮးဝေ့ကိုဝ်ၯာဍေလှ်။ ၮါဍိင်ယိုဝ် မွာဲဆ်ုဖေါတ်ဆ်ုအူး လ်ုအ်ုယူႋထုက်လ်ုမိင် ဟ်ုလဝ်ကဲဝေ့လှ်။ ဖၠုံၮါဍိင်ယိုဝ် မွာဲဖေါဟ်သးဖၠဲါသီး စါင်းကိုဲလ်ုကေမူႋၮါ စါင်းဆေါတ်ဍိင်ပျဝေ့ တူရိယာလ်ုမိင်ၮှ်လှ်။ အေ ၯိုင့်ၜးၮါႋဍိင်သဝ့် ဖိုင်ဖင့်မူႋ ကေမူႋၮါၮှ် ယူႋဝေ့စွးမာႋလှ်။
ဖၠုံၮာဍိင်ယိုဝ် ဍေမျေန်မာၮာႋဍိင်ၮှ် ၜးဍံင်လိုတ်သာအေး ဖၠုံၮာဍိင်ယိုဝ် အ်ုဖၠီအှ်ဝေ့ယာဲၜံင်၊ ၰူ့ၜံင်လှ်။ မျေန်မာၮါႋဍိင်ၮှ် အ်ုဖၠီအှ်ဝေ့ လ်ုဆီ့သိုင့်ၜံင်ၮှ်လှ်။ ဖၠုံၮါႋဍိင်ယိုဝ် အ်ုဖၠီအးထုက် အှ်ဝေ့ နိုဲ့ၜံင်လှ်။
ဖၠုံၮါႋဍိင်ယိုဝ် အ်ုမောဝ်ႋယှာႋၮှ် တါင်ဝေ့သိင်းလ်ုမိင်၊ အှ်ၜံင်ကါင်းၮှ်သိင်းလှ်မိင်။ အ်ုၮါႋဝိက်ႋၮှ်သီး တါင်ဝေ့သိုင်းလှ်မိင်ဆေဝ်ႋလှ်။ ၮါႋဍိင်မေဝ်ႋယှာႋၮှ် ၜုင်းၮေဝ်ႋဝေ့ ဍေအ်ုဖိုင်ၯံင် ထင့်ထင်းဝေ့ အ်ုၜံင်ကါင်းၮှ်လှ်။ ၮါႋဍိင်ၮှ်ဍဝ် ယှာႋလ်ုဖၠုံ လ်ုအ်ုဝီႋအိုဝ် ဍာဝေ့ဍေထ်ုရဲာဖါ်၊ ခေဝ့်ၜင်မောဝ်ႋဖါ်ၮှ်လှ်။ ၮါႋဍိင်ဖၠီၮှ် ထင့်ထင်းဝေ့ ဍေသိင်းၰုဲးသီးၮှ်လှ်။ ၮါႋဍိင်မောဝ်ႋၰာႋအ်ုပးၮှ် မာဖၠံင့်ဝေ့လ်ုဖိုင်ၮှ် ကိုဝ်ဖၠုံးဍေဆေဝ်ႋလှ်။
ဖၠုံၮါႋဍိင် ၜိုဝ်ၮါင်းယိုဝ်ၮှ်ဍဝ် ဍာဝေ့အ်ုဍာဍေ သၠါ်ပး၊ ထာပးသီးၮှ်လှ်။ ၮါႋဍိင်ဖၠီၮှ်သီး ထင့်ထင်းဝေ့ဍေ ဖၠီထံင်ႋသီးၮှ်အ်ုခေါဟ်စံင် အ်ုလူႋသဝ့်ဆာ့ အ်ုလူႋသဝ့်ဖၠိုဝ်ယာင်ဝေ့ ဆေဝ်ႋလှ်။
ၮါႋဍိင်ယိုဝ်ဍဝ်၊ "ၮါႋဍိင်ၜးကိုင်"၊ "ၮါႋဍိင်ယူႋသီ့"၊ ၮါႋဍိင်ကၠယ်သီး အှ်ဝေ့အးမိင် ဆေဝ်ႋလှ်။ ၮါႋဍိင်ယူႋသီ့ၮှ် မွာဲဝေ့တါင်ၜးကးၯယ် ၮါႋဍိင်လ်ုမိင်လှ်။ အေၯိုင့်ၜး ၮါႋဍိင်ယူႋသီ့အ်ုလူႋၮှ် အှ်ကဲၮင်ႋၯာလိုင်အေး။ ၜးၯယ့်ဆံင့်ၮးဆိုင် ကိုဝ်ၯာဍေလှ်။ အေၯိုင့်ၜး ၮါႋဍိင်လူႋၮှ် ယူႋသုင်းယူႋသာ လုက်ခၠါလှ်။
ၮါႋဍိင်လ်ုၮင်ၮှ် တါင်ၯံင်ယုဂ်သီး လ်ုထင့်ၜးအ်ုဖၠီဍာ်ၜးအ်ုခါ့ၮှ် အှ်ကှ်ေဝေ့ ထံင်ႋမိင်လကၠာၮှ်လှ်။ ကေမူႋၮါဆ်ုခါ်လင်ၮှ် ၯယ့်ပၠုဂ့်လင် ၮါဍိင်သာ ဍေဖဝ့်ဝီႋလး နိုဲ့ၜိင်းၯံင် ထင့်ထင်းၮါႋဍိင်ဖၠီ ၯယ့်ထါင်ဍိင်သာ့ဝေ့လှ်။ လ်ုအ်ုတါင်ၮါႋဍိင် အ်ုထင်ႋဖိုင်ၮှ် တ်ုဝါန့်ဖေါဟ်သီး သီ့ထေံၮေဝ်ႋၜးအေး။ ၮါႋဍိင်အ်ုဝေ့ၮှ် မွာဲဝေ့ ၮါႋဍိင်ၜးကိုင် ၮှ်လှ်။
ၮါႋဍိင် လ်ုမိင်ၯေဝ်လ်ုမိင်ၯေဝ် ယိုဝ်ပျထာခေါဟ် ဍိင်ပျၮါႋဍိင်လူႋအေၜးၮှ် ဆံင့်ၮးမုက်ဝေ့ ကိုဝ်ၯာဍေၮှ်လှ်။