Wp/kjp/ဖူ့ကျာ်မိက်ခါ (ဖူ့နာဲပညာ)

ဖူ့ကျာ်မိက်ခါယိုဝ် ဖၠုံထီ့ခါန်ႋ၊ ဍုံခေါဟ်ထီး ထ်ုအင်ကၞင့်၊ အိက်ထုက်ခံင်လ်ုဝါခ်ုလုက်ဂယင်သူ ဟ်ုကိုဝ် အိင်ထုက်ဏာင်တ်ုဝါန့်အိုဝ်ဏှ် ၁၂၀၄ ဏိင်းခါ့ အံင်ထင်းဍေဝ်အှ်ဖၠဲဖာထင်းဝေ့လှ်။ အ်ုဝေ့ မောဝ်ႋဖာႋဏီ့ၯာဏှ်သီးဍဝ်ၯး မွာဲဝေ့မာန်နာဲညုက်ဍေၯာႋကောဝ်ဖၠောတ်ဏှ်လှ်။

ဖူ့ကျာ်မိက်ခါ နူႋတာ်ထၠာ့ထင်း ထိုင့်ဖူႋဝဲါအှ်ဝေ့(၈)ၯာလှ်၊ ဆ်ု(၈)ၯာသီးဏှ်ၯး - စဝ်မိက်ခါ(ဖူ့ကျာ်မိက်ခါ)၊ ဏင်ႋလျင်ႋသုဂ်၊ စဝ်အ်ုထိုဝ်း၊ စဝ်သုဂ်ပ်ုညုက်၊ စဝ်စ်ုၜယ်၊ ဏင်ဍောဟ်၊ စဝ်ကျာဖုံ့ ဍေဏင်ႋၰိုဲတဝ်သီးဏှ်လှ်။ စဝ်မိက်ခါယိုဝ် ထိုင့်ဖူႋဝဲါ ၰိုဝ်းၯာကၠာအိုဝ်ဏှ် မွာဲဝေ့ အ်ုဝဲါယှာႋထုက် ခိင်ႋၰီ့ယးအွာ ဖောဟ်ခွါ့လ်ုၯာဆေဝ်ႋလှ်။ လ်ုအ်ုဝေ့ၯင်ပေဝ့်ဍာ်ခါ့ ကဲထင်းတ်ုပိုဲ ဖာင်ႋထ္ၚာ့ လေဝ်မာလောဟ်လိက် လ်ုကၠုင်ဏာင်(ကါင်)ဘာႋအိုဝ်ဏှ်လှ်။

ထံင်ကၠုင်ဏာင်ဘာႋအိုဝ်ဏှ် ကဲတ်ုပိုဲ မာလောဟ်လိက် အ်ုခင်းထာ်လ်ုဖး သှ်ေထင်းခွိက်ၯံင် ရေင်ႋထင်းဝေ့ဍဝ် ၯယ့်ထာင်အှ်သာ့ လ်ုအ်ုဍေဝ်ၜံင်ခင်းထာ် မောဝ်ႋဖာႋလာယှူး ၯိင်းၰင့်အိုဝ်ဏှ်လှ်။ စဝ်မိက်ခါအ်ုယုက်ထင်းၜါ ဏီ့ဆီ့ၜၠဲခါ့ ဆာမိက်ဏေဝ်ႋဝေ့အ်ုမာ့ မိက်သမ္ဘာ (မိက်သံင့်ဘာႋ) ဍေဖၠုံဍုံလေင်ႋမူးလ်ုၯာ ဏှ်လှ်။ အ်ုသီးဏှ် တ်ုတွယ်စူးပံင်လောဟ်သာ ဖောဟ်ဟှူႋအးထင်း သိုင့်ၯာခါ့ အ်ုမာ့ခဝ့် အင်းလယ်အ်ုကျး ခၠိုဝ်ထဝ်ႋလင်ထာင် စဝ်မိက်ခါ ဍေအ်ုဖောဟ်သိုင့်ၯာဏှ်လှ်။

ထံင်ဏှ်လ်ုဖိုင့် စဝ်မိက်ခါ ဍေအ်ုဖောဟ်သီးဏှ် အှ်ထာင်ဝေ့ထိုဲ့ၜးထိုဲ့ၜးယိက်ထင်းလ်ုၜၠင် အ်ုဖောဟ်သယ်ဏှ် ၯယ့်သွာ့ထင်း ၯယ်ဆ်ုမာသှ်ေ အှ်ဘာႋမာလောဟ်ဏေဝ်ႋလိက်သီး သှ်ယေုဂ်လှ်။ စဝ်မိက်ခါဏှ် အ်ုမာ့လ်ုအှ်လိုင်ၜး လာႋဏင့်သီး လ်ုခါင့်ယိုဝ် ဆာမိက်ဏေဝ်ႋ ထာင်ဝေ့အ်ုမာ့သင့် ဏင်ၯာလိုင်အေးလှ်။ အ်ုဖောဟ်သိုင့်ၯာဏှ်အိုဝ် ဖ်ုအောဝ်ထာင်ဝေ့ ဍေအ်ုသီး ဖီ့ဖူ့မောဝ်ႋမင်သယ်ၯံင် ၁၂၄၀ ဏိင်း၊ စဝ်မိက်ခါ အ်ုယုက်ထင်းၜါ (၃၆) ဏိင်းခါ့ဏှ် အင်းကိင်ဏေဝ်ႋဆ်ုပၠယ်တဝ် လ်ုမောဝ်ႋဖာႋသီးအှ် လေဝ်ထင်းထာင်နာဲ လ်ုယောဝ်တ်ုဝါန့် ကောဝ်ယက္ခဘာႋအိုဝ်ဏှ်လှ်။

စဝ်မိက်ခါ နုက်လင်ထာင်သာသၞာ့ဖိုင်ၯံင် လေဝ်က်ုညာအှ် လ်ုဘာႋဍာ်တ်ုရိုဝ်အိုဝ် (၃) ဏိင်းဍေတၟိုဝ်က်ုစိင်ဘာႋ ဣသိ (အာ်သာ်)ခါ့ဏှ် ဆူ့ကေဝ်ဝေ့ ဖၠုံလိက်ထူ့လီသယ်သီး အးအးလေံဏှ်လှ်။ ၁၂၄၇ ဏိင်းခါ့ဏှ် မျးပေတ်ုဝါန့် ဣသိ (အာ်သာ်) ဘာႋခေါဟ်လံင်။ ၁၂၆၀ ဏိင်းခါ့ဏှ်ဍဝ် ဘာႋလုင်ႋဏာင်။ ၁၂၆၄ ဏိင်းခါ့ဏှ် လေဝ်က်ုညာ ဒၟံင်ႋအှ်ထာင်ဝေ့ လ်ုခၞိင်ႋဍိုဝ်တ်ုဝါန့် ဘာႋထီ့ဏာင် (ဘာႋသွးခေါဟ်)အိုဝ်သီးဏှ် ဆူ့ကေဝ်လိက်ခဝ့်ခဝ့် ကၟဝ့်ပျမိင်ဍေဓဝ်ႋဏှ်လှ်။

ဖၠုံအ္စာလ်ုဝါ် ဖူ့ကျာ်မိက်ခါ(နာဲပညာ)ဆူ့ကေဝ်လဴဝယ် လိက်ဓဝ်ႋထူ့လ်ုဖးဏှ်ဍဝ်ၯး

၁။ မူႋလာမူ့လီ (၁၂၄၃)
၂။ လောကသင်္ဂဟ (၁၂၄၃)
၃။ သၟိင့်နာဲမိက် (၁၂၄၄)
၄။ ၯာဖၠိုဝ်လီႋမိင် (၁၂၄၄)
၅။ သၟိင့်ရာမ်ႋ (၁၂၄၅)
၆။ ဒွတ္တိံသကာယဂတာသတိ (၁၂၄၉)
၇။ ရုပ်ကၠံင်ဒစန် (၁၂၅၀)
၈။ ဓဝ်ႋသူ့ကာယာ (၁၂၆၂)
၉။ လ္ၚီဂါထာ (ဝီသန္တဝ်) (၁၂၆၇)
သယ်ဏှ်လှ်။

ဖူ့ကျာ်မိက်ခါ (နာဲပညာ)ယိုဝ် ဆိုဒ်ဆ၊ ဘာႋသာ့ ဍေသာသၞာ့အ်ုၯင်ႋ ကုက်ကၠေစိုဒ်ဝေ့ အးအးလေံၯံင် ထံင်ထာင် ၁၂၇၉ ဏိင်းအ်ုခါ့ဏှ် အ်ုယုက်အုဂ်ပဝ်ထၠိုင့်ခွိက်ဝေ့လှ်။