Wp/kjp/ပညာ့

From Wikimedia Incubator
< Wp‎ | kjp
Wp > kjp > ပညာ့

ၜးဆာင့်ဍေပညာ့ဟှာင်ႋၜျာ လိက်သာထိင် ယိုဝ် လ်ုဏးသှ်ေၜး၊ ပဝ်ႋၜး၊ ထံင်ဏါင်းၜးလ်ုဆင့်ဏှ် မ်ုကေဝ်သှ်ေယာ့ၜး သာဆေဝ်ႋလှ်။ ကေဝ်လိက်ဆာႋ၊ ဍေပဝ်လိက်ဆာႋ အင်းဏင် ဆ်ုသှ်ေယာ့၊ ဆ်ုထံင်ဏါင်း လ်ုစယ်လ်ုခၠဲသီး ဟ်ုလဝ်သှ်ေဆေဝ်ႋ။ လ်ုမွဲာတၠာပညာ့ကေဝ်လိက်ဆာႋ (စာရေးဆရာ) ၜးအ်ုခေါဟ်စံင် ပၠယ်တဝ်ဏးသှ်ေဖှ်ေလာဆာ်။ ဆ်ုသှေ်ယာ့ဏာႋဟှိုင့်(အကြားအမြင် ဗဟုသုတ) သီးယိုဝ် လ်ုဟှာဍေလ်ုဟှာ ၜးဍံင်လောဟ်သာယဝ့်အေးလှ်။ ၜေ့ပဝ်လိက်ဆာႋ သှ်ေယာ့ထသိုဝ် ကေဝ်လိက်ဆာႋ လ်ုသှ်ေယာ့ၜးသီး မ်ုအှ်ဆေဝ်ႋ။ ၜေ့ကေဝ်လိက်ဆာႋသှ်ေယာ့သိုဝ် ပဝ်လိက်ဆာႋ လ်ုသှ်ေယာ့ၜးသီး မ်ုအှ်ကၠင်ဆေဝ်ႋလှ်။ စင်ၜိုဝ် ဆ်ုဍးစိုဝ်၊ ဆ်ုထံင်ဏါင်း အေလ်ုၜးဍံင်လောဟ်သ္ဘား အေအှ်ဆေဝ်ႋစာ်ၜိုဝ် ပၠယ်တဝ်ကဲလာဆာ်။ လိုဒ်ႋကာခေါဟ်ဍာယိုဝ် ၜးဆာင့်ဍေ ဆ်ုဖါန်ႋလုက်ဆိင့်ဏှ် ပညာ့မှ်ေယိုဝ် မွာဲဝေ့ဍး အ်ုဖါန်ႋထုက်လှ်။ ဆ်ုဖါန်ႋဏါင်း ပညာ့မှ်ေယိုဝ် ဟ်ုအင်းဃှူ့ဝေ့ ၜးလိုင်အေးလှ်။ စင်ၜိုဝ် ပညာ့ယိုဝ် အ်ုဟှာင်ႋအ်ုၜျာ ဆံင်းဖ်ုဘၠါက်လယ့်ဏှ် အ္စာတၠာပညာ့ဆာႋသယ် လ်ုအ်ုဝီႋအိုဝ် ခၠိုဝ်ထဝ်ႋထဝယ်ဝေ့ ဍေအ်ုဍီးအ်ုဍံင်၊ ဍေလ်ုဝါ်၊ လင်္ကာသယ် အ်ုဆင့်ဆင့်ဆေဝ်ႋလှ်။ မ်ုၜးမာလောဟ်အ်ုဟှင်ႋဏှ် မွာဲဝေ့ဍး ဏ်ုသယ်ပ်ုသယ် ဖေါဟ်ဍီပၠီးသယ်ကိုဝ်ဟှာ အ်ုတာဆေဝ်ႋလှ်။


လ်ုပ်ုဋ္ဌာ်(ပါဋ္ဌိ)လိက်ဖိုင်ဏှ်သီး ၜးဆာင့်ဍေပညာ့အ်ုဟှာင်ႋအ်ုစံင်းဏှ် အင်းသံင်းထဝယ် အးအးဏှ် ဟ်ုဍးၜးထီ့ဆာလှ်။ ပြညာ သဘာ အာဘာ နတ္ထိ ပြညာ့မှ်ေဖါန်ႋယိုဝ် လိုဒ်ႋကာခေါဟ်ဍာ မ်ုတုဂ်ဍံင် ဍေဆ်ုဖါန်ႋ အှ်ဏင်မိင်အေးၮဝ်ႋ အင်းသံင်းလဝ်ထဝေ့ ၜေ့ဏှ်သိုဝ်ဆေဝ်ႋလှ်။ ဟ်ုယောဝ်ထါင် လ်ုမေံထာ်ခါ့ ပ်ုဖၠုံဖေါဟ်၊ ယှင်ဖေါဟ် ဖေါဟ်ဍီပၠီးသယ်လ်ုဖး ၜေ့ပညာ့မ်ုအှ်သိုဝ် လိက်ပညာ့ဏှ် မာလောဟ်ၜးလာႋ၊ ကျုင်းလာႋလ်ုဃှေဝ်၊ အေလ်ုသှ်ေလိက်ၜးဏှ် ပ်ုမေံမ်ုဘၠဟ်၊ ဆ်ုမ်ုအင်းကှ်ဟ်ု၊ လ်ုဂမၠိုင်ႋမှ်ေယာ့ မ်ုၜးကးသာ၊ အေလ်ုသှ်ေလိက်စာ်ၜိုဝ် လေဝ်ဖၠံင့်ဟှးဆ်ု အှ်ဏင်မိင်အေးဏှ် ဖၠုံအ္စာတၠာပညာ့ဆာႋသယ် ဍးစိုဝ်ဝေ့ အ်ုခေါဟ်စံင် ခၠိုဝ်ထဝ်ႋထဝယ် ဍေ လ်ုဝါ်လင်္ကာသယ်ဏှ်ဆေဝ်ႋလှ်။

လ်ုဝါ်လင်္ကာလ်ုဖးသယ်ဏှ် ဟ်ုအေအင်းဃှူ့ထါင် အ်ုဝီႋခၞါ အ်ုခဝ့်ပ်ုယဝ့် လ်ုအ်ုအိင်းခဝ့်စာ်ၜိုဝ် ဆ်ုလ်ုပညာ့သီးယိုဝ် ဟ်ုမၞီႋအ်ုကျးဖိုင်သာ အ်ုဟှင်ႋ မ်ုၜးပါဍောဟ်၊ မ်ုၜးအှ်ကှ်ေထ ၜေ့သိုဝ်စူးဖံင်သိုဝ်၊ ၜေ့ဆြာ့သိုဝ်ဏှ် မွာဲလ်ုမိင်၊ အေသှ်ေလိက်ဏှ် မ်ုဏေဝ်ႋဆ်ုဟှေဝ်၊ လ်ုသှ်ေလိက်ဏှ် မ်ုဍးခံင်ဆ်ုကး၊ ဆ်ုဒဒုက်တၟာႋ ၜေ့ဏှ်သိုဝ်လ်ုမိင် ဟ်ုဏးသှ်ေၜးဆေဝ်ႋလှ်။ လေဝ်ဆ်ုဖၠံင့်၊ ထာင်ဆ်ုဖၠံင့်၊ ဟှးခါန်ႋ၊ ဟှးလိုဒ်ႋကာဏှ် မွာဲဝေ့ဍး ပညာ့ဟှာင်ႋထၞာႋလှ်။ ဟ်ုအေယောဝ်ႋထာင် IT ပညာ့ထင်းထဝ့်ခီႋ (Information and Technology) အ်ုခါ့ဍးယိုဝ်စာ်ၜိုဝ် လ်ုအ်ုဝီႋဍးအိုဝ် ဟ်ုမၞီႋလ်ုဆံင့်မံင်းၜး ဏင်ဖိုင့်၊ လ်ုလာႋပုင်းဖိုင်၊ လ်ုဂြိုဒ်လိုဒ်ႋကာဖိုင်(ဂြိုဟ်ကမ္ဘာ)ဏှ် ထံင်ထာင်အ်ုခါ့ယိုဝ် ဍေပညာ့အ်ုဟှာင်ႋဏှ် ထံင်ၜးဝေ့ ဃှိင်ဃှိင်ဆေဝ်ႋလှ်။ အေဟှံင်ဍဝ် က္ၜင်ယူႋ၊ ကံင်ပျုတာ၊ ဆ်ုဟှင်မိုင့် ဟ်ုစာ်ထံင်လုက်ဆိင့် ဟ်ုမၞီႋအ်ုဟှင်ႋ အင်းတာင်ထး ဆ်ုလ်ုဖးဏှ်သီး မွာဲဝေ့ဍး ပညာ့ဟှာင်ႋထၞာႋလှ်။ စင်ၜိုဝ် ၜေ့မ်ုခၠုဂ် ခီႋပညာ့သိုဝ် ဏ်ုဏ်ုယ်ုယ်ု လ်ုယာ့အ်ုဟှင်ႋ ၜေ့မ်ုထင်းထဝ့်သိုဝ် အင်းယာဟှုက်လောဟ်သာ ကိုဝ်ဟှာဍေဆေဝ်ႋလှ်။ ပ်ုဖၠုံဖေါဟ်ယှင်ဖေါဟ်သီး မွာဲဝေ့ ဟ်ုမၞီႋလ်ုဟှာလဝ့် အ်ုခေါဟ်စံင် ၜေ့မၞီႋအ်ုဟှူ့ဟှာသှ်ေသိုဝ် ပ်ုသီးမ်ုၜးသှ်ေ၊ ၜးအှ်ကှ်ေလင်သာ ၜေ့ဏှ်သိုဝ်ဆေဝ်ႋလှ်။ ဍေပညာ့အ်ုဟှင်ႋ ဆ်ုမူ့လာႋ ဆ်ုဏာ့ဟှာႋ ၜးအှ်ကှ်ေလင်သာ ဍောဟ်ဍောဟ်လေံဆေဝ်ႋလှ်။ အေလ်ုအှ်ၜေ့ဏှ်သိုဝ်ၜးစာ်ၜိုဝ် မ်ုဖၠံင့်ဟှးဏှ် ယဝ့်အေးဆေဝ်ႋလှ်။ ပ်ုအေယောဝ်ႋထာင် လ်ုဟ်ုမၞီႋပညာ့ဆာႋလ်ုဖးသီးစာ်ၜိုဝ် အ်ုသီးဝေ့ ၜေ့မ်ုသှ်ေပညာ့၊ မ်ုဏေဝ်ႋပညာ့လ်ုမိင်မိင်ဏှ် က်ုဏင်က်ုဏင် ၜးအင်းလယ်လင်ဝေ့ ဍေအ်ုသီးသာမိုင့်ဏှ်လှ်။ အေဖၠံင့်ဟှးဏေဝ်ႋ ကၠ်ုဖးဏေဝ်ႋလ်ုၜၠင်စာ်ၜိုဝ် ဟ်ုမၞီႋ ထိုင့်ကောဝ်ကြင်သာ့ ထ်ုယဝ်ႋပြာထာ့ဆိုင်ဝေ့ဆေဝ်ႋလှ်။ မိင်ဟှေဝ်လ်ုဖၠုံးသီး အှ်ထဝ်ထာင်ဝေ့ ထံင်ကဝ်တူႋလ်ုဆင့်ဆေဝ်ႋလှ်။ စင်ၜိုဝ် ဟှယ့်ထါင်လ်ုခါင့် ဖေါဟ်ဍီပၠီးသယ်လ်ုဖး ပညာ့အ်ုဟှင်ဏှ် ၜးအှ်ကှ်ေလင်သာ ဍေဆ်ုပ်ုယောတ်ဍောဟ်ဍောဟ်လေံကိုဝ်ဟှာဍေဆေဝ်ႋလှ်။

လ်ုအေန်တာနက်ဖိုင်အိုဝ် ပ်ုအေယောဝ်ထါင်စာ်ၜိုဝ် ၜးဆါင့်လ်ု ပ်ုဖၠုံယှင်ဖေါဟ် သင့်ဂၞီသယ် တွဝ့်ထးဓဝ်ႋ လ်ုဖး ဍးၜးကၠါင်အေးဆေဝ်ႋလှ်။ ပ်ုဖၠုံယှင်ဖေါဟ် သင့်ဂၞီ တွဝ့်ဓဝ်ႋသှ်ေ၊ အ်ုမိင်ဍောဟ်သယ် အှ်ဍးသာလှ်။ လာဏင့်ၜိုဝ်သီး ဆ်ုပ္ကုံဍုဂ်လင်ဏေဝ်ႋလ်ုအေန်တာနက်ဖိုင် ဍးၜးကၠါင်အေးသီး ဟ်ုလဝ်သှ်ေဆေဝ်ႋလှ်။

လ်ုဒကာဂမၠိုင်သယ်ခဝ့်သီး ဆ်ုသာပ်ုယောတ်အှ်သီးမွာဲဆေဝ်ႋ၊ လ်ုဟှးထီ့ခါန်ႋအ်ုယာင်သယ်လ်ုဖး လ်ုဖၠုံသင့်ဂၞီတွဝ့်ထးဓဝ်ႋပြေသယ်လ်ုဖး မ်ုဟှုင့်ၜး၊ မ်ုဆံင့်ဏးၜးသီး လ်ုယဝ့်ၜးသီးခဝ့်မွာဲဆေဝ်ႋ၊ ၜေ့သိုဝ် ဆ်ုကးဆ်ုဟှယ်သယ်လ်ုဖး ဏေဝ်ႋၜးလာႋ၊ ဆံင့်ဏးၜးလာႋ ဖၠုံဓဝ်ႋသယ် ဆ်ုမူ့လာႋအှ်ဆေဝ်ႋ အ်ုခေါဟ်ကျံင် အင်းတာင်ပ္ကုံ၊ ဍုဂ်လင်ၜး ဖၠုံသင့်ဂၞီဓဝ်ႋသယ် လ်ုအေန်တာနက်ဖိုင်ယိုဝ်ဆေဝ်ႋလှ်။