Wp/kjp/ထ်ုအင်ကၞင့် ရုပ်ကျာ်အှ်ထိုင့်လ်ုဖး

From Wikimedia Incubator
< Wp‎ | kjp
Wp > kjp > ထ်ုအင်ကၞင့် ရုပ်ကျာ်အှ်ထိုင့်လ်ုဖး

ထ်ုအင်ကၞင့် ရုပ်ကျာ်အှ်ထိုင့်လ်ုဖးဏှ် အှ်ဝေ့ ထိုင့်ကောဝ်ခံင်ႋ၊ ထိုင့်အာ်သာ်က်ုလာင့်၊ ထိုင့်ဖါ့ပုဂ်၊ ထိုင့်ၜေန်ဂျီ၊ ထိုင့်ဍင်ကျာ်၊ ထိုင့်မိက်တြင့်၊ ထိုင့်ဖျိုင့်၊ ထိုင့်သာယာယှိုဲ့ဂူ၊ ထိုင့်(ဝဲပျံ)၊ ထိုင့်မိက်စင်ကောဝ်ကူႋ၊ ထိုင့်ဝိက်၊ ထိုင့်က်ုဝေ့၊ ထိုင့်မာ့ခၟါ်၊ ထိုင့်ပ္တါင်၊ ထိုင့်ကၠာ၊ ထိုင့်ခၠုဂ်ထိုင့်၊ ထိုင့်ကောဝ်က်ုသံင့်သီးဏှ်လှ်။

ထံင်ထိုင့်လ်ုဖးကၠာအိုဝ်ဏှ် အ်ုမိင်ဍောဟ်ဖၠဟ်ဝေ့စွး ထိုင့်လ်ုဖးဏှ်ၯး မွာဲဝေ့ ထိုင့်ကောဝ်ခံင်ႋ၊ ထိုင့်ၜေန်ဂျီ၊ ထိုင့်(ဝဲပျံ)၊ ထိုင့်မာခၟါ်၊ ထိုင့်ကောဝ်က်ုသံင့်ယာဲဖၠုံးသီးဏှ်လှ်။ ထိုင့်ကောဝ်ခံင်ႋဏှ် ရုပ်ကျာ်အှ်ကဲအ်ုအးထုက်လှ်။ အ်ုဏိင်းယိက်ထုက် ထ်ုယဝ်ႋပြာထာ့ ၰိင်ႋကောဝ်ကြင် လ်ုဏိင်းလ်ုၜၠင် သင့်ခၠင်လင်ထၠိုင့်သိုင့်သင့်ဏှ် ၜုံးအ်ုဘေင်ႋအှ်ဝေ့ ကိုဝ်ဏိင်းဍေလှ်။

ထိုင့်ၜေန်ဂျီဏှ်ဍဝ် ကၠံင်ဖေါဟ်အှ်အးၯံင် လာင့်ခင်းထာ်ဏှ် ဏံင်းထီ့ခေါဝ်ႋ အှ်ဝေ့တာႋ ဆ်ုလေဝ်အင်းလူႋထီ့ခေါဝ်ႋအှ်အးလှ်။ အေလေဝ်အင်းလူႋၜးထီ့ခေါဝ်ႋဏှ် ဆ်ုယှဝ့်၊ ဆ်ုၰ, ဆ်ုဆာ့လံင်သာသယ် ၜၠးဝေ့လုက်ခၠါလှ်။ ထ်ုယဝ်ႋပြထာ့စွး ဆ်ုလေဝ်ဝေ့အးဆေဝ်ႋလှ်။ လ်ုဏိင်းလ်ုၜၠင် လာထာင့်ခုက်ဖါဍောဟ်ဏှ် အ်ုဘေင်ႋအှ်ဝေ့ ကိုဝ်ဏိင်းဍေလှ်။

ယှိုဲ့ကံင်ႋဖင့်ခေါဟ် ကၟဝ့်ယှောဟ်မူႋနုက်ခဝ့် ထိုင့်ဝဲပျံ (ဝဲါပျာင့်)ဏှ်ဍဝ် ရုပ်ကျာ်အှ်အးဝေ့လှ်။ ထိုင့်အ်ုထုက်ဏှ် အှ်ဍေထီ့ကၟာ့သယ် ဆ်ုလေဝ်ၜါပူဇဲအး အ်ုမိင်ဖၠဟ်စွးဝေ့ ဆေဝ်ႋလှ်။ လ်ုဏိင်းလ်ုၜၠင် သင့်ခၠင်ထာင်ထင်းလ်ုဏီဏှ် ၜုံးအ်ုဘေင်ႋအှ်ဝေ့ ကိုဝ်ဏိင်းဍေလှ်။ ထိုင့်မာခၟါ်ဏှ်ဍဝ် ထိုင့်ဖၠံင့်ခေါဟ်ခါင့် ရုပ်ကျာ်ဖါဍောဟ် အီသီ့နံင်ႋ, က်ုဆင့်အွာဖိုင်, ဟ်ုလၟးတ်ုပူဖိုင်သယ် လုံႋအှ်ၜးဍံင်ဏှ်တာႋ ဆ်ုလေဝ်ၜါပူဇဲအး အ်ုမိင်ဖၠဟ်စွးဝေ့လှ်။ လ်ုဏိင်းလ်ုၜၠင် သင့်ခၠင်လင်အ်ုကၠာလ်ုဏီဏှ် ၜုံးအ်ုဘေင်ႋ အှ်ဝေ့ကိုဝ်ဏိင်းဍေလှ်။

ထိုင့်ကောဝ်က်ုသံင့်ဏှ်ဍဝ် ရုပ်ကျာ်အှ်ယှာလာႋဏင့် ထိုင့်ဖံင့်ထိုဝ်ဏှ် ဆ်ုၰာင်းဝိင်ဝကိုဲ ဝင်ဂပဝ် (ယင်ႋက်ုပဝ်) အှ်ဝေ့ဏှ်တာႋ ဆ်ုလေဝ်ပူဇဲၜါအးလှ်။ လ်ုဏိင်းလ်ုၜၠင် ဏိင်းထင်းသင့် (သင့်ခၠင်) ၯံင်ဏှ် ၜုံးအ်ုဘေင်ႋအှ်ဝေ့ကိုဝ်ဏိင်းဍေလှ်။