Wp/kiu/Weşiya Domanu
Wertê sarê ma de hurêndia domana(n) gırana. Zerrê çêi de hetê ware khewekerdene ser, wertê qomi de ki hetê qedır-qimeti ser, caê domana(n) zaf gırano. Zêrrê çêi de doman “az” name beno. Zerrê qomi de “masumo pak” name beno. Az, serê Herdê Dewrêşi de çiyo de zê jiargeo, bımbareko. Maneşiya aji, weşiya kokê xo ramıtena. Az, kokê xo sero rewino, az dano, beno khewe, beno pil.
Ma de dest nêerjino aji, xırabo. Azê vasê yabani bile qurfnayene, sıkıtene, çewtkerdene, cıpaynaine nêbena. Oncia, azê de lêe, azê de dare bırnaine, sıknaine xıraba. Qul çiyê nianêni qebul nêkeno. Çıke, az vezeno ra weşiya esl u cısnê xo rameno. To ke az cıra kerd, nêverdana khewe bo, dara yi kena husk. Doman ki na sevet ra az say beno. Çê de ma u pi ra beno, dolê yino(n), yine sero saybeno. Namê xo, pi u khalıkê xora cêno, mêrasê yine rameno. Rındiye ser, kotiye ser yine sero hasab beno. Dısmênaine de bile kes dest domano(n) ser niano.
Ma de vanê: Çêo ke domano sawi tey nêbi va o çê çine bo. Domano sawi gula zerrê çêiya. Jüo ke domanê xo çinê wucaşkoro. Jüo ke lacê xo bi vanê jü dara xo esta, şiye de se male mêle bena. Doman cigera ma u piya. Na seveb ra ki derdê cigere zaf zoro. Domano zêde derdo zêdewo. Serba aciye ser ki vanê va xêr bo, teke jü bo. Domanê zêdey mezelê jêdeê.
Warê pi de tek jü doman ke bi wertê qomi de qedır u qimetê yi tenêna gırano. Çı ke ware khewe-kerdene de xora o jü tek mendo. No jü tek ke lacêk bi, vanê “Jükek”. Maneşiya jükeki tenêna gırana. Qewşanê aşira(n) de bo, ê hukmati de bo, Owo ke gıno cı, xora ke zerrê çêi de jükeko, sero lawuki yimıskerdê ke kerdena nianêne, qom her waxt biaro xo vir ke reyna zerrê Heqi nêdazno. Qomi cara(n) kerdena nianêne rê zerre sa nêkerdo. Na xebera nianêne nê yena zerrê Heqi nê ki yena zerrê qomi. Çı ke, jükek ke gına cı sak beno warey sera, ware munıs beno. Zerrê çêi de hurêndia lacêki hurêndia çêneke ra na sevet ra ki tenê gırana. Çêneke sona zewecina, adırê sari kena we, lacêk adırê piyê xo keno we.
Doman wertê qomi de masumo pak yeno hasab kerdene. Çıke hetê kotibiyaine ra, hetê xırabine ra zerrê yi de thaba çino. O hona zure, xapnaine nêzano. Eke jianê de xo jü reso ki, vanê “Nêzanoşiye ra kerdo”. Kotiya domani nêbena. Rızqê zerrê çêi bırnaine, gula domana(n) jüp u jüa verdaine nêbena. Serba Domani meremet lazımo. Ma u piyê doman ki seveknaine lazıma. Çıke sey mendena domana(n) xebera de qotır kerdene niya. Kes nêwazeno ke zav u zêçê keşi düyara ver de bımano. Na sevet ra herkes weşiya domani wazeno. Kes nêwazeno ke doman nêwes bo.