Wp/kea/Sex Pistols
Sex Pistols é un banda inglês di panki róki, furmóde na Londris na 1975. Nbóra si karera inisial ten duradu so dos anu i mei, es torna nfluenti na kultura di muska pupular. Es banda kumesa un muvimentu panki na Renu Unidu i, dispos, pasa ta inspira mutu múzikus di panki, pós-panki i róki alternativu. Sis rupa i pentióde torna un nfluénsa inórmi na imáji inisial di panki.
Purmeru furmason di Sex Pistols ta kunsistiba na vukalista Johnny Rotten (naxidu John Lydon), gitarista Steve Jones, batarista Paul Cook ku baxista Glen Matlock. Matlock foi subistituídu pa Sid Vicious (naxidu John Richie) na kumésu di 1977. Baxu jiston di Malcolm McLaren, banda staba ta ganha atenson anplu di inprénsa britániku dispos ki es prununsia txeu palabrons na un ntrivista na dirétu na tilivizon, na dizénbru di 1976. Si muska di divulgason di maiu di 1977, "God Save the Queen", ki ta diskrebeba munarkia kuma un "rijimi fasista", foi lansadu pa koinsidi ku silebrason nasiunal di Jubileu di Prata di Rainha. Es muska foi rapidamenti pruibibu di ser tukadu pa BBC i kuazi tudu stason di rádi ndipendenti na Gran-Britanha, u-ki transfurma-l na disku más sensuradu di stóra britániku.
Úniku álbun di stúdiu di sa banda, Never Mind the Bollocks, Here's the Sex Pistols (1977), foi nunbru un na Renu Unidu i é kunsideróde siminal na dzanvolvimentu di panki róki. Na janer di 1978, na últimu xou di un turnê difísi i mutu midiatizadu pa Stadus Unidu di Mérka, Rotten anunsia siparason di banda na palku, na dirétu. Na mezis siginti, tres ménbru restanti graba muska pa filmi di McLaren sobri stóra di Sex Pistols, The Great Rock 'n' Roll Swindle. Vicious more di subusdózi di eruína na febreru di 1979, dispos di si prizon pa supostu sasinóte di si kretxeu, Nancy Spungen. Rotten, Jones, Cook i Matlock djunta di nobu na 1996 pa un turnê di susésu. Otu prizentasons úniku i turnês kurtu sigi na dékada siginti. Na 2024, Jones, Cook, Matlock i vukalista kunvidadu Frank Carter raforma Sex Pistols pa fasi un séri di xou na kel anu, ku otu datas dja markóde pa 2025.
Sex Pistols foi rakunxedu kumó un banda mutu nfluenti. Na 2006, es foi ntruduzidu na Salon di Fama di Rokinrol, nbóra, fiel na si imáji, es rakuza partisipason na sirimónia, i Rotten rafiri kel Salon, ki é un muzeu, kuma "un mantxa di xixi".[3]