Wp/kea/Moskou

Bandera di Moskou

Moskou (na rusu Москва, prununsiadu Moskvà), é kapital i sidadi más pupulozu di Rúsia; si rijon mitrupulitanu sta entri kes ária más pupulozu di Orópa. Si tiritóri é nteramenti rudióde pa pruvínsia di Moskou, I el ta fika na parti sentruésti di planísi oropeu di Rúsia, entri riu Oka i riu Volga. Moskou ta izersi grandi npaktu na pulítika, finansas, kultura, siénsa i idukason di Rúsia i tudu Orázia.

Sidadi di Moskou ta abriga sédi na gubérnu fideral di Rúsia, nkluzivi Palós di Kremlin, tidu kuma sinblu tradisiunal di puder rusu désdi séklu XIV. El sta situóde na margi di riu Moskvà, ki ta kruza si tiritóri i da nóm pa sidadi. Ku un pupulason di más di 13 milion di abitantis distribuídu na un ária di téra di 2 500 km², Moskou é sidadi más densamenti puvuadu di Rúsia. Ku sérka di 200 lingas diferenti flóde na si tiritóri, Moskou é sidadi ku más grandi diversidadi linguístiku di kontinenti oraziátiku.

Arkipélagu urbánu di Moskou fika puvuadu désdi pri-stória, ma sidadi ta ofisialmenti fundóde na 1147, pa prínsipi Yuri Daulgorúki di Rússia Kíev, kuma un puvuadu fortifikadu na marji di riu Moskvà. Es sidadi kumesa sê kapital di Grandi Prinsipadu di Moskou na séklu XIV; ku isu, el pasa ta ser séntru pulítiku i ralijozu di tudu Rúsia. El tivi si status di kapital nterunpidu ku fundason di Sanpitisburgu na 1712 pa Pedru Grandi, pamodi el ta kreba prusima Rúsia ku Orópa Osidental. Mas Moskou bolta ta ser kapital di Rúsia Suviétiku na 1918 baxu Ravuluson Rusu di 1917. Désdi antan, Moskou sa-ta manti sima kapital di es país, gósi txumóde Fiderason Rusu.

Un bes ki es sidadi sta situóde na un pontu stratéjiku pa kumunikason entri Orópa i Ázia, Moskou torna ikunumikamenti prósperu na séklus XIX i XX, markadu ku prizénsa di txeu merkador, indústria pisadu i setor finanser avansadu. Konsakuentimenti, Moskou funsuna kuma osti di Djogus Olínpiku di 1980, i ta sigi un di sidadis más nfluenti di séklu XXI na planu pulítiku, kultural i teknulójiku. Ku skasês di rakuisu natural na si tiritóri imediatu, si ikunumia ta orentadu pa setor di sirbisus avansadu, ku fóku kirsenti na finansas, turismu i teknulujia. Ta izisti un kumunidadi kunsiderávi di imigrantis ki ta bai pa Moskou pa buska bida midjór, ku distaki pa txeu algen di paízis di Ázia Sentral I di rijon di Kókazu.