Wp/kea/Monero

Monero (XMR) é un kriptumuéda prujetóde pa furnese tranzasons dijital siguru, privadu i non rastriávi di fórma padron. Konstruídu riba protokolu CryptoNote, Monero ta diferensia di txeu otu kriptumuédas, pamodi el ta sukundi ditalis di tranzason, suma ramitenti, rasibidor i muntanti, na si bloktxein; asi e ta omenta anonimidadi di uzuári i konfidensialidadi finanser.

Kes karaterístika prinsipal di Monero foi prizentóde pa un pisoa supostamenti anónimu, Nicholas van Saberhagen, na 17 di otubru di 2013, ku publikason di White Paper CryptoNote 2.0. Kriptumuéda Monero foi lansóde na 18 di Abril di 2014. Se nómi orijinal era Bitmonero, mas el foi logo kurtadu pa Monero, ki ta signifika “muéda” na língua artifisial Esperanto.

Monero ta funsuna ku un mikanismu di kunsénsu di próba di trabadju i ta uza alguritmu di minerason RandomX, ki é otimizóde pa unidadis sentral di prusesamentu di kunputadoris di kaza, ku obujetivu di prumovi disentralizason. Es prusésu di kriason di muédas, o “minerason”, é diferenti di kel di Bitcoin, ki ta iziji grandis sentral di kunputadoris, di tipu fábrika, ku hardware spisializadu. Otu diferénsa é ki Bitcoin ten un suprimentu másimu di 21 milion di muédas, nkuantu Monero ta ser jeróde pa senpri, o paluménu nkuantu si bloktxein kuntinua ta funsuna, ku 0,6 XMR nobu jeróde na kada blóku pa kes pisoas ki ta furnese más puder di kunputason.

Kes funson di privasidadi di Monero ta dipendi di un konbinason di téknika kriptugráfiku, nkluzivi sinaturas di anel (ring signatures, na inglês) pa sukundi ramitentis di tranzasons, nderésus disimulóde (stealth addresses) pa ivita rautilizason di nderésu i pruteje rasibidoris, i tranzasons konfidensial di anel (Ring Confidential Transactions — RingCT) pa sukundi muntanti di tranzasons, nkuantu ta manti pusibilidadi di birifikason. Kes funson é ativóde pa padron, u-ki ta torna tudu privadu otomatikamenti. Ku ifetu, Monero é kunsideróde altamenti funjívi, pamodi unidadis ndividual ka pode ser distingidu o listadu ku bazi na si stória di tranzasons. Es li ta fasi Monero similianti ku un nóta di banku, pamodi ningen ka sabe izatamenti modi ki el foi uzóde antis.

Monero ta ser uzóde pa pagamentu ku pruteson di privasidadi, duasons konfidensial i tranzasons finanser na anbientis nundi razisténsa kóntra sensura é dizejóde. Kuntudu, kes fórtis mikanismu di privasidadi di Monero tánbi txuma atenson di órgons di aplikason di lei, ki sta prakupóde ku putensial ki el tene pa uzu na atividadis ilísitu, kumó brankiamentu di kapital. Bendidoris di dróga na kel parti di internéti txumóde redi obuskuru (darknet, na inglês) kumesa seta Monero na lugar di Bitcoin i, sugundu un ralatóri di Organizason di Nasons Unidu di 2024, grupu terurista Stadu Slámiku kumesa pidi duasons na Monero. Kes prakupason legal liba bárius bolsa di kriptumuéda ratira Monero di ses platafórma. Entritantu, Monero atinji un nobu rakórdi di présu, kantu el txiga na kasa di 800 dólar merkanu, na janer di 2026.

Ligasons stérnu

• Site ofisial (na purtugês)