Wp/kea/Kriptumuéda

Logutipu di bárius kriptumuéda, ku distaki pa Bitcoin

Un kriptumuéda é un muéda dijital prujetóde pa funsuna trabés di un redi di kunputadoris ki ka ta dipendi di nun orotidadi sentral, suma un gubérnu o un banku, pa sustenta-l o manti-l. Entritantu, ta izisti un tipu di kriptumuéda stábi ki pode dipendi di ason gubernamental o di lijislason pa ta manti stabilidadi di si balor.

Tudu rajistus individual di prupiadadi di muédas é armazenóde na un libru razon dijital o na un kadia di blókus, o bloktxein, (blockchain, na inglês), ki é un banku di dadus kunputadorizadu ki ta uza un mikanismu di kunsénsu pa pruteje rajistus di tranzasons, fiskaliza kriason di muédas disiunal i tánbi pa birifika transfirénsas di prupiadadi di muédas. Kes dos mikanismu di kunsénsu más kumun é próba di trabadju ma próba di partisipason.

Kriptumuéda é un palabra ki pasa ser uzadu pa ta diskrebe txeu tokens funjívi ki ten sidu kriadu. Nbóra el tene palabra muéda na si nómi, kriptumuédas ka é kunsideróde un muédas na sintidu tradisiunal, i es ta rasebi diferenti tratamentus legal na divérsus djurisdison, u-ki ta nklui situasons na kas es é klasifikóde kumó kumóditis, baloris mubiliári (titlu finanser) i muédas. Na bardadi, kriptumuédas é ntendedu kuma un klasi di ativus distintu.