Wp/kea/Dogecoin
Dogecoin (abreviason ISO 4217: XDG, sinblu: Ð) é un kriptumuéda peer-to-peer di kódigu abértu, kriadu inisialmenti kuma un "muéda pidja" na 06 di dizénbru di 2013, dezenvolvendu rapidamenti si própi kumunidadi na internéti, ti alkansa un kapitalizason di US$ 60 milion na janer di 2014. Es muéda ta uza kuma "maskóti/logutipu" memi "Doge", un kotxor di rasa Shiba Inu.
Dogecoin foi kriadu pa prugramadoris Billy Markus ku Jackson Palmer, ki ta speraba kria un kriptumuéda divertidu ki pudeba alkansa un públiku más anplu di ki Bitcoin. Len di es li, el tánbi ta kreba distansia si di stóra kuntruvérsa di otu kriptumuédas. Dispos di rasibi txeu mensons na Tuiter, Palmer kunpra dumíni dogecoin.com i djunta un téla inisial, ki ta mustra logutipu di muéda ku testu skrebedu ku létra Comic Sans. Markus staba kunetadu na un sala di bati-papu di IRC i disidi kria un muéda dispos di txiga na kunbérsu ku Palmer. Markus bazia Dogecoin na un kriptumuéda ki dja ta izistiba, Luckycoin, ki ta ofrese rakunpénsas aliatóri trabés di minerason di blókus, mas es konpurtamentu foi mudóde más tardi pa un rakunpénsa di blóku státiku na marsu di 2014.
Idéia orijinal pa redi di Dogecoin éra di pruduzi un tutal di 100 bilion di Dogecoins, ma dispos foi nunsiadu ki si redi ta pruduziba un kantidadi sin limiti di Dogecoins. Na kunparason ku otu kriptumuédas, Dogecoin prizenta un kirsimentu rápidu: el tenba 100 milion di muédas na sirkulason ti miadu di 2015, ku un disiunal di 5,256 bilion di muédas na kada anu dispos. Na 30 di junhu di 2015, 100 bilion di Dogecoins dja staba mineradu. Mésmu ku poku aplikasons kumersial tradisiunal, muéda ganha forsa kuma un sistéma di gurjétas na Internéti, na kol uzuáris di mídia susial ta daba gurjétas na Dogecoin pa otu uzuáris pa furnisi kuntiúdu nteresanti o diginu di nóta. Dogecoin ta kunxedu kuma un altcoin.
Elon Musk, CEO di Tesla ku SpaceX, éra un figura npurtanti na stóra di Dogecoin, pabia e ta mensiunaba frikuentimenti es kriptumuéda na si tuitis i diklarasons públiku. Biliunári ta txumaba Dogecoin kumó "kriptumuéda di pobu" i ta faseba txeu rafirénsa sobri kel muéda, nkluzivi memis ku frazis ngrasadu. Nfluénsa di Musk sobri Dogecoin (i sobri merkóde di kriptumuédas na jeral) é ton fórti ki un úniku tuiti di-sel ten putensial pa koza flutuason sinifikativu na balor di muéda.
Musk tánbi fasi diklarasons sobri uzus prátiku pusívis pa Dogecoin. Na 2021, el mensiuna ki el staba ta trabadja ku dzanvolvedoris di Dogecoin pa midjora ifisiénsa di si sistéma di tranzasons. SpaceX, un di kes munti nprézas di Musk, tánbi anunsia planu pa un mison txumadu "DOGE-1" pa lua, ki ta sérba finansiadu nteramenti ku Dogecoin.
Ligasons stérnu
[edit | edit source]