Wp/kea/Cesária Évora
Cesária Évora (Mindel, 27 di agostu di 1941 – Mindel, 17 di dizénbru di 2011) foi kel kantora ku más grandi rakunximente internasiunal na tudu stóra di muska pupular kabverdian. Nbóra el faseba susés na txeu jénerus muzikal, se distakis más npurtanti okore ku mórna, pa es mutivu el é pilidóde di 'rainha di mórna'. El tanbe éra kunxide kuma 'diva di pe skóls', pabia el ta gostaba di fase se prizentasons ku pe skóls. Muska di Cesária rasebe txeu prémius, nkluzivi un Grammy na 2004. El transforma na un nfluénsa pa munte múzikus di diáspura kabverdian, si kumó pa kantora pop stadunidensi Madonna.
Krióde na pobréza, Cesária kumesa se karera muzikal ku prizentasons na baris lukal kónde el tinha dzases ón (na 1957). Na óns siginti, el konsgi algun pupularidadi, mas el bandona palke kónde el pirsebi ki se karera ka tava ofrese-l rénda sufisienti pa susténtu di ses fidje. Apénas na 1985 el ta ben ratorna pa muska, trabés di partisipason na un koletáni di muska fimininu na Purtugal. La, el kunxe prudutor muzikal José Djô da Silva, ki kontrata-l pa se gravadora, txumóde Lusafrica. Se purmeru álbun foi La Diva Aux Pieds Nus, lansóde na 1988. El alkansa susés internasiunal dispos di lansamentu di ses álbun di nunbru kuóte i sinke: Miss Perfumado (1992) i Cesária (1995). Cesária dzanvolve prubulémas di saúdi na final di dékada 2000 i falise na 2011, vítima di nsufisiénsa raspiratóri i ipertenson artirial.
Diskugrafia
[edit | edit source]Cesária lansa ónzi albuns di stúdiu na se karera i un ote foi lansóde dispos di se mórti.
- La Diva aux Pieds Nus (1988)
- Distino di Belita (1990)
- Mar Azul (1991)
- Miss Perfumado (1992)
- Cesária Évora (1995)
- Cabo Verde (1997)
- Café Atlântico (1999)
- São Vicente di Longe (2001)
- Voz d'Amor (2003)
- Rogamar (2006)
- Nha Sentimento (2009)
- Mãe Carinhosa (álbun póstumu, 2013)