Wp/kea/Bubista (trenador)

Pedro Leitão Brito (Bubista, 6 di janer di 1970), más kunxide kumó Bubista, é un trenador di futibol kauberdianu ki atualmenti ta izersi funson di silesionador di sileson nasiunal di si país. Na si ténpe di djugador, el ta atuaba na puzison di diféza.

Karera di djugador

Karera di Bubista kuma djugador kumesa so na 1995, kónde el tenba 25 óns, na ikipa spanhol Badajoz, pa kol el djuga apénas dos bes. Dispos, el fika grandi parti di tenpurada 1996-1997 sin djuga, ti ki el sina ku ASA, di Angóla, undi e distaka más, sendu kanpion nasiunal angulanu na 2002. Inda diféza, el tivi un kurtu pasája na Estoril (purtugês) i nsera si karera na Falkons di Nórti, di Sonsente, na Kauberdi.

Nkuantu djugador, e difende tánbi sileson nasiunal na 28 partidas entri 1991 i 2005, nkluzivi na funson di kapiton.

Karera di trenador

Entri 2007 i 2013, Bubista foi trenador-adjunte di sileson di Kauberdi, tendu si purmeru spriénsa na kumandu di un ikipa na fin di es priúdu, na 2012, kantu e pasa ta trena Mindelens. Di 2014 pa dianti, el pasa pa kuóte otu ikipas: Prugrésu di Sanbizanga (2014), Akadémika di Mindel (na 2015 i dispos na 2017), Sporting di Praia (2015-2016) i Batuki (2018-2019).

Na janer di 2020, el foi anunsióde kumó nobu trenador di Tibarons Azul (pilidu dadu pa sileson nasiunal). Na ón siginti, es kunkista klasifikason pa Kópa Afrikanu di Nasons dispos di un vitória di 1-0, fóra di kasa, kóntra Mosanbiki, na últimu djogu di iliminatórias. Duranti kel Kópa, Bubista ka fika na kanpu na niun djogu, pabia el testa puzitivu pa KOVIDI-19, si kuma txeu djugadoris. Na 2023, e gia Kauberdi pa Kópa Afrikanu más un bes. Na el, es avansa ti kuartas di final.

Si fetu más famadu okore na 13 di otubru di 2025, kónde, ku un vitória di 3-0 sobri Isuatini na Stádiu Nasiunal di Kauberdi, el klasifika Kauberdi pa Kópa di Mundu FIFA di 2026. Ku is, e ta liba si país pa purmeru partipason di si stóra na kópas di mundu di futibol. Kauberdi ta ser sugundu más pikénu nason na disputa di un Kópa di Mundu, tras di Islándia, ki partisipa na 2018.

Na nuvénbru di 2025, Bubista foi iletu midjór Trenador di Ón di KAF na Futibol Maskulinu.