Wp/kea/Birokrasia

Birokrasia, o burokrasia, é un fórma di organizason diministrativu bazióde na un ierarkia ben difinidu, spisializason funsional, nórmas formal i kumunikason pridominantimenti skritu. Es térmu é uzóde pa sistémas diministrativu di setor públiku si kumó di setor privadu, i el ta karatiriza institusons ku funsons spisializóde, kargus okupadu sugundu kritéris tékniku, prusedimentus orientóde pa ragulamentus kodifikadu.

Ku frikuénsa, es térmu é npregadu di manera dipresiativu pa diskrebe kes diministrasons markóde pa isésu di formalismu, lentidon disizóri, multiplikason di instánsas ierárkiku i un sistéma ki ta difikulta rasponsabilizason ndividual di ajentis.

Oxi in dia, birokrasia é kel sistéma diministrativu duminanti na institusons públiku i privadu. Struturas ierarkizadu kuma kes di diministrason públiku, nprézas, partidus pulítiku, susiasons prufisional, i tánbi di tudu ospital, ta opera sugundu prinsípis birokrátiku.