Wp/kac/Duhkra Ladaw

From Wikimedia Incubator
< Wp‎ | kac
Wp > kac > Duhkra Ladaw

Jiwa ni tsun ai Duhkra ladaw(Jinghpaw Duhkra Ladaw)

Ndai gingding aga gaw din din rai nga ai nga ai hte măren,Kălang ta jan mai htawng hkra ai lam n bung nga ai.Mungkan chyen mi de jan mai htawng hkra nhtoi rai nga ai aten hta ,măga chyen mi de gaw nsin rai taw nga ai.Jan hte ni ai, tsan ai hta hkan nah mung kătsi kăhtet shai wa nga ai.Mungkan a dingdung măga de ajan du hkawm nga ai aten hta,Mungkan dingda măga de gaw kăshung ta rai nga ai.Mungkan dingda magah de jan bai du  nga jang,mungkan dingdung măga de kăshung ta aten bai rai nga ai re.Dai hta n gah, Nammukdara panglai hte ni ai tsan ai hta hkan nah mung, duhkra lădaw kătsi kăhtet gaw bai shai chye nga ai.

        Ningre ai lam ni a măjaw,mungkan nah Dan lăngai hte lăngai a lăning mi ting nah duhkra lădaw măsat shămying ai lam ni mung shai shăjang nga ai.Anhte Munghpawm Myanma ,Jinghpaw mung e gaw,lăning mi lăman e duhkra lădaw myu masum nga ai ngu măsat shămying dah ma ai.Dai gaw , Ginhtawng ,Lanam hte N shung lădaw ni,nga nna shamying tawn dah ma ai.Sinna ga Uropa dan, Amerika dan de rai jang gaw , laning mi laman e duhkra ladaw myu mali nga ai hku, bai măsat dah ma ai.Dai gaw ,Ginhtawng , Nshung ,Lănam hte Nlum lădaw ngu myu mali nga ai hku shămying dah ma ai.

             Ningrai nga shara hta hkan nna ,duhkra ladaw amyu myu măsat shamying dah ai lam gaw tinang ni nga shara ginra ,panglai hte ni ai tsan ai,Dan dam gaba ai ,Bum tsaw gaba ni nga ai, ginding aga a dingdung daw de nga ai,Dingda daw de nga ai,re ai ni hta hkan nna byin pru wa ai lam masa ni a măjaw,shara hte shara shămying ai ni shai shăjang wa ai lam ni rai nga ai.

          Dai rai yang, moi prat hta Wunpawng Jinghpaw sha ni mung ,Găra hku tsun  shămying shăga lai wa măsai kun?

          Wunpawng Jinghpaw sha ni tsun hkai hkrat wa ai labau hte măren,Wunpawng Jinghpaw sha ni gaw ,htaw măjoi shingra gah kaw n nah ginru ginsa sa yu hkrat wa ai ni re,nga n nah hkai shăjang nga ma ai.Ningrai n nah yu hkrat wa ai aten hta,Majoi mi hte majoi mi,ginra mi hte ginra mi hta hkringsa ,hkyen lu hkyen sha ,hkailu hkaisha ra ai măjaw ,gara ten e gaw hkai ra ai,gara ten e gaw mu sha ra ai, ngu ai duhkra ladaw katsi kahtet hpe mung , maram masam masat matsing chye dah ra wa manu ai.Dai gaw, shingra maka dakkasu e sharin dat ya ai hpaji rai nga ai.Gara hku sharin masat matsing gun shamying lang wa masa ta?

             

        Anhte a Jiwoi Jiwa ni gaw,laning mi nah aten lădaw hpe , ntsa lam hku nnah daw lahkawng sha  garan tsun shamying dah ma ai.Bumring bumga e  galaw lu galaw sha ,hkailu hkaisha ai lam hta hkan n nah duhkra ladaw hpe shamying dah ai lam rai nga malu ai.Dai gaw:Ginnhtawng ladaw hte Lanam ladaw sha rai nga ai.Tsum mayu ai gaw, laning mi laman Ginhtawng ladaw hte Lanam ladaw sha nga ai hku masat tsun shamying ai lam rai nga ai.

           Bai ,dai Ginhtawng ladaw hte Lanam ladaw lahkawng hpe ,Shata hku nna madun dan ga nga yang ;Ginhtawng ladaw gaw Kala ta kaw nna Wut ta(Octoba kaw nna March) du hkra laman rai nga ai.Yi sun hkauna e hkai tawn ai, nsi naisi hkai nmai ni ngai myin wa nna shu lah ai,dan lah ai aten kaw nna,Hpang shaning  nah matu bai hkai  dah ra ai aten du hkra na ladaw laman rai nga ai.

           Lanam aten gaw,Shala ta kaw nna Guptumg ta(April nna September)du hkra aten ladaw laman rai nga ai.Hkai nmai , nli ni hpe hkai dah ai ten, nli jahkrat dah ai ten kaw n nah bai ngai wa ai aten laman rai nga ai.

             Ndai Ginhtawng hte Lanam ladaw lahkawng hpe ,galang mi bai kahtap garan ginhka dat ga  nga yang,Ginhtawng aten ladaw hta :

   

(a)   Mangai ta           -        Ndai aten gaw,Hkai tawn  dah ai naimam ,Hkainu,Kumgyin re ai ni kung myin,ngai wa ai aten ladaw rai n nah,Jinghpaw bumga e pyaw ai aten ladaw langai mi rai nga ai.Inglik shata hte madun dan ga nga yang,Octoba hte November laman rai nga ai.Ndai aten gaw, Yi  yinwa de mam ni gum ra wa sai,Myin htoi wa sai,mu ,dan, shu lah ra ai aten rai nga ai.Nam Wadu,Watsa, hkrudu ,ubyit , uzwi ni hpe gawn ra sin ra ai ahkying rai nga ai.Myin wa magang ai mam ni hpe mu lah,dan lah,Shingjin lah ra ai.Masha kaba,ma  gaji nnga yawng hte wa,nrau la ai aten rai nga ai.Dai majaw ,Jinghpaw ga malai pyi gaw, ``Hpundu hpe pyi lata shatut ya na zawn,"nga tsun chye ma ai.Lanam ta e,Hku hku hpang gara  nga ai ni,lu luq,lu shah wa ai ten rai nga ai.

(b)    Kashung ta.     -       Grai kashung katsi ai ten rai nga ai.Ingalik shata hte ka madun ga nga yang ,December hte January shata laman rai nga ai.Jinghpaw Bumga shara shagu ,Byin, Chyinghtawng, Htingra pu ni pu tsawm nga ai ahkying aten rai nga ai. Nampu nampan ni hpe u numji numjoi ni  pyen chyuq garu gashai nga ai aten rai nga ai.Mu, dan ,gabyeq dah ai nai mam ni hpe, nta de gun shagyin lah ai aten mung rai nga ai.

(c)     Htawngga ta.      -       Hkun hkraw nga sai aten rai nna, Inglik shata gaw, February hte March shata laman rai nga ai.Nu num ni gaw rida maka , nhpye , nba ni daq ai ten , la ni gaw ashu ashan gap , nga hkwi , nta galaw , htaning nah matu Yi yu,Yi hkyen  ra ai aten rai nga ai.

       N dai gaw, Ginhtawng ladaw bai kahtap garan shamying  dan ai lam rai nga ai.

               

       Bai , Lanam aten ladaw hpe bai kahtap garan dan ga nga yang;

(a)   Nlum ta         -            Ndai aten gaw, garai hkun hkrawq kahtet la ai Wala ginhtawng  ten nan rai nga ai.Ingalik shata   hte madun ga  nga yang ,April hte May shata kaang du hkra ladaw laman rai nga ai.Dai aten hta ,Hkungran poi, Dingshawn poi , Makoi mayang poi re ai ni hpe galaw ma ai.Hkyen tawn dah ai yi yinwa ni hpe , marang garai n dip yang nat tawn dah ra nga ai.

(b)   Htingra ta.      -           Htaning na matu hkyen tawn dah ai Yi ni hpe nat tawn dah ai aten rai nna ,Inglik shata May kaang kaw nna June ladaw laman rai nga ai.Htingra Yi de hkran sawm ra ai,Yi nhpan ni kum ra ai, Yiwa ni gap ra ai,Naimam, Hkainu , hkum kumgyin nli tum ni jahkrat hkai dah ra sai.Mam ting ra sai aten rai nga ai.N dai ladaw lai ai hpang , hkai ai nli ni gaw , tu tim , asi nsi , asi n ja sai,nga ma ai.

  (c)    Mayu ta.         -            Yi de hkai tawn dah ai nai mam ni hpe ,mayu yi magang ra ai, Tsing  magang ra ai aten mung rai nga ai. Tsing magang dang yang she naimam gaja  na rai nga ai.   Inglik shata hku July hte September du hkra ladaw laman rai nga ai.Shada da, Mam gade rai sata, nga san hkat nna ,Uri ugan lim gaw rai sai ,nga htai hkat chye ma ai.Dai kaw nna tsut tsut kaba wa ai naimam ni gaw , myi kadup wa sai, jabawng wa sai,pru wa sai, marawng ra sai,gum ra sai ,myin htoi wa sai nga nna  tsun let kabu shajang nga ai aten ladaw rai nga ai.

                    Ndai aten hta mung ,Jinghpaw bumga nah yi sun hkauna galaw sha ai ni a matu gaw ,tinang ni hkai tawn dah ai nai mam nsi naisi ni myin ngai kaba wa ai hpe mu mada lu ai majaw,grai kabu myitpyaw shajang nga ai aten  nan e

rai nga ai.

     

                   Ndai gaw ,Moi Wunpawng Jinghpaw bumga e hkyen lu hkyen sha,Hkailu hkaisha lam ni hta hkan n nah, laning mi nah du hkra ladaw hpe  Ginhtawng ladaw, Lanam ladaw ngu nna ladaw lahkawng sha masat tsun shamying dah ai lam rai nga ai.

     Ginhtawng ladaw ten hpe-

               (a)  Mangai ta

               (b)  Kashung ta

               (c)   Htawngga ta

       Lanam ladaw hpe-

                (a)  Nlum ta

                (b)  Htingra ta

                (c)   Mayu ta nga n nah bai gran shamying dah ma ai.Ndai lam ni hpe ndai prat nah Jinghpaw Bumga hte tsan gang ai shara e she shangai kaba wa ai ni hte , grai n na ga ai ni a matu , Jinghpaw htunghking lailen ni hpe hkah jah matsing lah lu mu gaq ngu ka tang dan ai rai.

Refrence:      Hpaji  Ginra(Htunghking Maka) ,

                 

     (Ndai ka ngau gaw Hpaji Ginra (Htunghkring Maka) ngu ai laika buk kasha kaw na ``Jiwoi Jiwa Ni Tsun Shamying    Ai Duhkra Ladaw ´´  ngu ai ka ngau hpe la dah ai re.Ka ngau Madu hpe Hkungga let.!)