Wp/jax/Taman Nasional Berbak

Taman Nasional Berbak (TNB) atau yang dikenal sebagai Amazon Jambi adolah taman nasional yang paling luas di Asia Tenggara dan belom tejamah samo eksploitasi manusio. Luasnyo dewek sekitar 142.570 hektar dan taman nasional iko berado di Provinsi Jambi, tepatnyo di daerah Kabupaten Tanjung Jabung.. Keunikan dari Taman Nasional Berbak ko adolah gabungan dari duo jenis hutan rawa, yaitu hutan rawa gambut dan jugo hutan rawa air tawar yang tebentang di peseser timor Sumatra.

Batas wilayah

Sebelah timur : Laut Cino Selatan

Sebelah utara : Selat Berhala

Sebelah barat : Sungai Berbak dari hulu

Sebelah Selatan :batas antaro Maga Djeboes samo Marga Berbak, dan jugo Sungai Benu

Flora dan Fauna

Taman Nasional Berbak temasok dalam kawasan lindung nasional dan internasional jugo, dan sudah ditetapin dalam Konservasi RAMSAR di tahon 1992. Penetapan ini tentu be idak serta-merta, karno dunio nengok kalau taman nasional ko besak nian dan jugo punyo banyak tanaman samo hewan.

Diketahui dari beberapo penelitian kalo taman nasional ko punyo seidaknyo 261 jenis tumbuhan yang tediri dari 73 famili. Idak itu bae, ado jugo sekitar 28 jenis mamalia, 224 jenis borong dari 49 famili, 39 jenis reptil dari 12 famili, 35 jenis ikan dan jugo kodok. Nah kalo datang ke taman nasional iko bakalan biso nengok deretan pohon palem yang berjejer rapi di kiri samo kanan sungai.

Bahkan para pengunjung jugo biso nengok dengan jelas jenis palem hias yang masok dalam kategori langka, adolah palem daun payung (Johanesteijmannia altifrons) dan jugo jenis palem yang baru adolah Lepidonia kingii (Lorantaceae). [1] Idak itu bae, pengunjung jugo biso secaro langsong ketemu samo buayo yang sedang bejemor dan idak jarang jugo kadang speedboat yang dipakek nabrak buayo.

Rute ke lokasi

Taman nasional ko teletak lumayan jaoh dari Kota Jambi. Kalau mau ke sano dari Jambi, harus naek speedboat dan melewati sungai Batanghari. Setelah itu, harus jugo melewati sungai Aek Itam Dalam selamo kurang lebej 2,5 - 3 jam atau biso jugo ke Nipah dengan waktu sekitar 4-5 jam. Dari Nipah Panjang ko, pengunjung harus melanjutkan perjalanannyo ke Desa Air Hitam laut selamo 5 - 8 jam dan jugo ngelewati Laut Cino Selatan. Tapi, untuk perjalanan iko harus nengok tingkat ombak yang ado, karno ombak Laut Cino Selatan ko tekenal keganasannyo. Setelah itu, pengunjung biso langsong masok ke bagian depan taman nasional.