Wp/jax/Brengkes
Setiap daerah tu punyo caro dewek muat ngolah tempoyak. Di Jambi misalnyo, tempoyak biso dibuat jadi Brengkes. Makanan has ko biasonyo pake ikan patin, tempoyak, samo bumbu rempah yang lengkap nian. Makanan ko sering ado pas acara penting macam pesta nikahan atau perayaan hari besak.
Brengkes tempoyak ko populer jugo di Palembang samo Sumatera Selatan. Walaupun biasonyo pake ikan patin, kito biso jugo nemu variasi brengkes pake ikan lais, baung sungai, atau jenis ikan aek tawar lainnyo.
Raso gurih, manis, pedas, samo asam yang has tu datang dari campuran tempoyak samo racikan bumbu. Bumbu yang dipake biasonyo bawang putih, bawang merah, cabai merah samo rawit, kunyit, lengkuas, samo garam.
Tempoyak samo bumbu ko ditumis dulu sampai harum, baru dioles ke potongan ikan. Sudah dibungkus pake daun pisang, brengkes tadi dikukus sampai masak.
Namo brengkes dewek berasal dari Bahaso Jawo yang artinyo samo bae dengan pepes, yaitunyo caro masak bahan makanan yang dibungkus daun pisang terus dikukus samo bumbu. Kalo tempoyak tu hasil fermentasi durian yang sudah disimpan kiro-kiro 5-7 hari, dan biasonyo dipake buat penyedap raso di macam-macam masakan.