Wp/isv/Taksonomičny rang

Osnovne taksonomične rangy

V biosistematikě taksonomičny rang ili taksonomična kategorija jest uravenj v sistemě hierarhičnoj klasifikacije organizmov, sostavjenoj na osnově filogenetičnogo srodstva, i vključaje v sobě jedin ili veče taksonov. Vsaky takson sostoji iz oprěděljenoj grupy organizmov, ktora zajedno s drugymi grupami togože samogo uravnja naleži do taksona vysšego uravnja, i ktora vključaje jednu ili veče taksonov nizšego uravnja.

Napriklad, vsi němečski ovčari tvoret takson, ktory nalěži do vysšego taksona domašnjih psov. Psi, zajedno s lisicami, volkami, šakalami, kojotami i jenotami, naležet do vysšego taksona psovyh. Psovi, iz reda, naležet do ješče vysšego taksona mesojedov, zajedno s kotami, medvědami, hienami, tjulenjami i drugymi. Mesojedi naležet do taksona sosavcev, sosavci do taksona hrebetnyh, hrebetni do taksona životnyh, i tako dalje.

Osnovny taksonomičny rang jest vid. V nomenklaturě vsaky vid označaje se dvojnym («binominalnym») imenem: najprvo rod (genus), pisany velikoju bukvoju, a potom vid (species), pisany maloju bukvoju. Napriklad: domašnji kot oficialno nazyvaje se Felis catus, često skračeny kako F. catus. Kromě vida i roda glavnymi taksonomičnymi rangami sut: sěmejstvo (ili rodina) (familia), red (ordo), klasa (classis), tip (v botanikě: odděl (divisio)), carstvo (regnum) i domen (dominium). Zajedno sut osm glavnyh uravnjev:

Nazvy glavnyh taksonomičnyh rangov v slovjanskyh jezykah

Rang	Domen	Carstvo	Tip / Odděl*)	Klasa	Red	Sěmejstvo	Rod	Vid
	Dominium	Regnum	Phylum / Divisio*)	Classis	Ordo	Familia	Genus	Species
Russky	Домен	Царство	Тип / Отдел*)	Класс	Отряд / Порядок*)	Семейство	Род	Вид
Bělorussky	Дамен	Царства	Тып / Аддзел*)	Клас	Атрад / Парадак*)	Сямейства	Род	Вид
Ukrajinsky	Домен	Царство	Тип / Відділ*)	Клас	Ряд / Порядок*)	Родина	Рід	Вид
Rusinsky	Домена	Царьство	Тіп / Оддїл*)	Клас	Ряд	Родина	Рід	Вид
Poljsky	Domena	Królestwo	Typ / Gromada*)	Gromada / Klasa*)	Rząd	Rodzina	Rodzaj	Gatunek
Gornolučičsky	Domena	Swět	Kmjen / Wotrjad*)	Rjadownja	Rjad	Swójba	Ród	Družina
Češsky	Doména	Říše	Kmen / Oddělení*)	Třída	Řád	Čeleď	Rod	Druh
Slovačsky	Doména	Ríša	Kmeň / Oddelenie*)	Trieda	Rad	Čeľaď	Rod	Druh
Slovenečsky	Domena	Kraljestvo	Deblo / Oddelek*)	Razred	Red	Družina	Rod	Vrsta
Hrvatsky	Domena	Carstvo	Koljeno / Odjeljak*)	Razred	Red	Porodica	Rod	Vrsta
Srbsky	Домен	Царство	Тип / Раздео*)	Класа	Ред	Породица	Род	Врста
Makedonsky	Домен	Царство	Колено / Оддел*)	Класа	Ред	Семејство	Род	Вид
Bulgarsky	Империя	Царство	Тип / Отдел*)	Клас	Разред	Семейство	Род	Вид

^*) Prvo slovo koristaje se glavno v zoologiji, drugo v botanikě, mikologiji i t.d.

Pomočne rangy

Vsaky organizm obvezno naleži do vsih osmi glavnyh rangov. Jednakože izslědovatelji često koristajut dodatočne, posrědnje rangy, najčestěje označene prědstavkami (nad-, pod-, infra-), napr. podred, nadklasa, infracarstvo, i tako dalje. Kromě togo, sut takože druge kategorije, napr. odděl, legion i kohorta (medžu klasoju i redom), sekcija (medžu redom i sěmejstvom) i pleme (medžu sěmejstvom i rodom). Take kategorije sut opcionalne, čto znači, že mogut byti propuščene pri klasifikaciji organizma, i često koristajut se samo v oprěděljenyh naučnyh oblastah, napr. v zoologiji, botanikě, mikologiji, virologiji, ili daže za oprěděljene taksony, napr. motyljev ili žolvij. Dodatočno podčrkaje se, že zavisno od naučnoj oblasti, nazvy někojih rangov različajut se; napriklad, v virologiji domen nazyvaje se «realm», a v botanikě tip nazyvaje se «odděl». Vsego istnujut slědujuče rangy, vključno s neformalnymi:

• Domen / Realm^V: naddomen, domen, poddomen
• Carstvo: hipercarstvo, nadcarstvo, carstvo, podcarstvo, infracarstvo, parvocarstvo
• Tip / Odděl^R: nadtip, tip, podtip, infratip, parvtip
• Klasa: nadklasa, klasa, podklasa, infraklasa, *subterklasa, parvoklasa
• Odděl^Z: nadodděl, odděl, pododděl, infraodděl
• Legion^Z: nadlegion, legion, podlegion, infralegion
• Kohorta^Z: megakohorta, nadkohorta, kohorta, podkohorta, infrakohorta
• Red: gigared^R, magnored, nadred, serija^I, podserija^I, grandred, mirred, red, podred, infrared, parvored
• Sekcija^Z: sekcija, podsekcija
• Sěmejstvo: gigasěmejstvo, megasěmejstvo, grandsěmejstvo, hipersěmejstvo, nadsěmejstvo, episěmejstvo^Z, serija^L, grupa^L, sěmejstvo, podsěmejstvo, infrasěmejstvo^Z
• Pleme: nadpleme, pleme, podpleme, infrapleme^Z
• Rod: rod, podrod
• Sekcija^R: sekcija, podsekcija
• Serija^R: serija, podserija
• Vid: kompleks vidov, vid, podvid, patovar^B
• Varietet^R: varietet, podvarietet
• Forma^R: forma, podforma
• Rasa: rasa, podrasa

^B Upotrěbjajemy v bakteriologiji

^I Upotrěbjajemy v ihtiologiji

^L Upotrěbjajemy v lepidopterologiji

^R Upotrěbjajemy v botanikě

^V Upotrěbjajemy v virologiji

^Z Upotrěbjajemy v zoologiji

Kladistika

V staroj linnejevskoj sistemě naučniki postojanno byli iznudženi izmysljati nove nazvy za rangov, ibo "standartny" spis (domen, carstvo, tip, klasa, red, sěmejstvo, rod, vid) byl nedostatočno gluboky, da by opisati vsu komplikovanost života.

Ako li někto izjavjal větvu medžu sěmejstvom i rodom, jemu bylo potrěbno izmysliti novo podsěmejstvo. Ako li v tom podsěmejstvu bylo dodatno razděljenje, togda bylo potrěbno izmysliti pleme, potom podpleme, i tako dalje. Kladistika rěšaje tutu problemu bezrangovostju. Vměsto izmysljenja oddělnogo imennika za každy uravenj hierarhije, naučniki mogut prosto posluživati se imenom samoj grupy. Odrěkši se od trěbovanja ranga, naučnikam ne jest potrěbno každy raz stvorjati novu nazvu kategorije pri izjavjenju novogo evolucijnogo razděla.

Nomenklatura

Nazvy taksonov na vysšem uravnju od roda obyčno možno jest razpoznavati po standardnomu sufiksu, ktory zavisi od carstva, ili poněkogda od tipa ili klasy. V botanikě i mikologiji nazvy na uravnju sěmejstva i nizše osnovajut se na nazvě roda i imajut standardno zakončenje. Napriklad nazva sěmejstva roz (Rosaceae) jest osnovana na roda rozy (Rosa) s sufiksom -aceae, ktory označaje sěmejstvo. Nazvy vysših rangov takože formujut se od generičnoj nazvy, a takože mogut byti opisne. V slučaju životin standardny sufiksy samo istnujut za taksony do uravnja nadsěmejstva.

Rank	Virus|	Bakterije i arheje	Rastliny	Algy	Griby	Životiny
Realm	-viria
Podrealm	-vira
Carstvo	-virae	-ati
Podcarstvo	-viretes
Odděl/tip	-viricota	-ota	-ophyta		-mycota
Pododděl/podtip	-viricotina		-phytina		-mycotina
Klasa	-viricetes	-ia	-opsida	-phyceae	-mycetes
Podklasa	-viricetidae	-idae		-phycidae	-mycetidae
Nadred			-anae
Red	-virales	-ales				-ida ili -iformes
Podred	-virineae	-ineae
Infrared			-aria
Nadsěmejstvo			-acea			-oidea
Episěmejstvo						-oidae
Sěmejstvo	-viridae	-aceae				-idae
Podsěmejstvo	-virineae		-oideae			-inae
Infrasěmejstvo						-odd
Pleme		-eae				-ini
Podpleme		-inae				-ina
Infrapleme						-ad
Rod	-virus
Podrod

Iztočniky