Wp/isv/Realnost (Jacek Malčevsky)
 | |
|---|---|
| Artist | Jacek Malčevsky |
| God | 1908 |
| Sposob | Olej na platnu |
| Dviženje | Simbolizm |
| Razměr | 115 cm × 209 cm |
Realnost (Poljskyː Rzeczywistość) jest maljevany olejem obraz poljskogo maljara-simbolista Jaceka Malčevskogo. Obraz byl dovršeny v 1908 godu i mněvaje se jednoju iz najznačimějših tvorb maljara.[1]
Opis
[edit | edit source]Maljevanok razměrom 115 na 209 cm[2] izobražaje scenu narodženja Hrista (takože znanu v različnyh jezykah kako jasli, jasličky, vrtěp ili šopka) v ktoroj sut prisutne Bogorodica (Sveta Marija), Děte Isus, tri angeli, tri poljski povstanci 19-go stolětja, ktori reprezentujut tri pokolenja poljakov, a takože pridvorny pajac poljskyh i litovskyh kraljev Stanjčik i sam Malčevsky. V kompoziciji prěvladyvajut jarke kolory.
Historija i analiza
[edit | edit source]Obraz byl namaljevany Malčevskym v 1908. V 1910 tutoj obraz byl vključeny v albom tvorb Malčevskogo, ktory byl izdany Salonom Poljskyh Maljarev v Krakovu, čto svědči o rannjem priznanju i važnosti tutoj tvorby. V 1914 godu obraz ¨Realnost¨ byl prědstavjeny v vsaksedmičnoj gazetě «Tygodnik Illustrowany».[3] Prěd svojim poslědnjim pojavjenjem na aukcionu v 2021 godu, tutoj rysovanok byl prědstavjeny publično v 1926 godu na ekspoziciji vo Ljvovu.[4]
Priblizno stolětje jejno naslědno městonahodženje bylo neizvěstno. V 2021 godu obraz byl snova najdeny v privatnoj kolekciji poljskoj i němečskoj umětnosti i byl kupovan aukcijnym domom DESA Unicum. Vračenje obraza mněvajut značimym sobytjem v historiji poljskoj umětnosti, pokoliko ¨Realnost¨ razgledajut srěd najznačimějših simboličnyh tvorb Malčevskogo, v ktoryh maljar dotykal se do tem prizvanja maljara, patriotičnoj rolje umětnosti, a takože mitov romantičnyh i narodnyh, podobno jegovym Zabludnomu krugu i Melanholiji.[3]
Obraz možno interpretovati kak silno simbolično viděnje historije Poljsky poslě razděla. Kompozicija vključaje učestnikov poljskyh nardonyh povstanij 19-go stolětja, prědstavjajučih tri pokolěnja poljskyh povstancev. Oni simbolizujut mučeničstvo naroda pod inozemnoju vladoju. Na obrazu Malčevsky rěšil izobraziti kraljevskogo pajaca Stanjčika, držečego kaducej i s glubokym sustradanjem gledajučego na povstavših. S lěvoj strany maljar izobrazil samogo sebe v zamysljenom stanju i s proročskym pogledom. Nazva raboty dělaje aluziju na ekstrasensornu realnost maljevatelja, na vnutrny svět jego nadohnenja, proizhodeči od romantičnogo světopogleda, glubokoj religioznosti i ličnoj privezanosti do patriotičnyh mitov.[3]
Simbolika v maljevanku
[edit | edit source]Špatla i maljarska ščetka
[edit | edit source]
Maljar osoblivo podčrkyvaje tute dva atributy svojej raboty v dvoh dlanjah svojego avtoportreta. Ščetka na dolgoj rukojeti prěsěkaje kraj platna. Na špatlě vidimo zelenu fleku, ktoru maljar ostavil kak by od nehtěnja, privlěkajuči pozornost gledača na realnost maljevanka.
Prstenj
[edit | edit source]Vnimanje gledača prikovyvaje prstenj s zelenym dragocěnnym kamenjem na lěvoj dlani maljara. Malčevsky izkoristal tuto ukrašenje za stvorenje ekstravagantnogo obraza svojego heroja. V tutom slučaju v prstenj, věrojetno, vstavili kamenj tjurkiz, simbolika ktorogo odnosi se k iskrenosti, kreativnosti i oddanosti dělu.
Platno
[edit | edit source]Malčevsky v lěvom kraju kompozicije prědstavil fragment platna-osnovy, na ktorom on tvori svoju novu tvorbu. Simbolično, že tuto izmysljeno platno odražaje scenu, ktora děje se za vzadu za jego hrebtom. Malčevsky igraje s gledačem, zadavajuči jemu pytanjeː čto jest realno, a čto jest namaljevano? On až postavil svoj podpis na tutom ¨izmysljenom¨ platnu.
Okovy
[edit | edit source]Simbolizujuče nevolju, v tvorčestvu Malčevskogo one vsegda odnoset se k porabjenju Poljsky v 19-om stolětju. Podobno kak grube, kožene pojasa s zakovicami simbolizujut natisk okupacijnoj vlady na političny život, tak i razmknute okovy angela sut simbol věry v vozvračenje poljskoj nezavisnosti.
Grabje
[edit | edit source]
Grabje sut najtajenstvenějši simbol v obrazu. Dva angeli držet jih za rukojet, a zubce sut vidime medžu glavami centralnogo vojina i tretjego angela. Jih universalna simbolika odnosi se do žetvy i trudu člověčskyh ruk. Tut one dělajut vpečatljenje begovogo puta, po ktoromu idut obědvě děvčiny. Može byti, to jest sposob Malčevskogo izraziti odnošenje poljskogo spoločenstva, ktoro pasivno prěživaje v razděljenoj državě i buduje svoju budučnost upornoju rabotoju.
Angeli
[edit | edit source]V maljarskoj ikonografiji ¨Poklon Treh Kraljev¨ (v něktoryh slovjanskyh jezykah — Poklon volhvov, Poklon mudrcov, Poklon magov) angeli vsegda suprovodžajut narodženje Hrista. Lica malyh děvče-angelov pohodet na črtky dočery artista, Julije Malčevskoj. Oblačene v bluzky i pyšne suknje, one takože sut ukrašene krilami s perami. Jednakože maljar nadal každomu angelu unikalny harakter, variujuči intensivne kolory jihnyh kostjumov i kril.
Vněšnje linky
[edit | edit source]- ↑ Kamieniarz, Klaudia (25 novembra 2022). "Niewidziany od stu lat obraz Malczewskiego miał pobić rekord. Ale w domu aukcyjnym zjawili się śledczy". tvn24.pl (na poljskom).
- ↑ "Warsaw. "Reality", a painting by Jacek Malczewski, went on sale. Investigators showed up at the auction house". polishnews.co.uk (na anglijskom).
- 1 2 3 Szkup, Agata. "Rzeczywistość Jacka Malczewskiego". desa.pl (na poljskom).
- ↑ Lawson Tancred, Jo (2 dekembra 2022). "This Symbolist Masterpiece Was Expected to Be the Priciest Painting Ever Sold in Poland. Now, Police Are Trying (and Failing) to Seize It". news.artnet.com (na anglijskom).
Iztočniky
[edit | edit source]- Tutoj članok imaje prěvod iz članka «Reality (Jacek Malczewski)» na anglijskom (spis avtorov; dozvoljeńje CC BY-SA 4.0).
