Wp/isv/Polyglot Gathering

Polyglot Gathering
Tip sbora	Konferencija, festival za ljubiteljev jezykov i poliglotov.
Čestota	Dva raza v rok. Jedin raz na živo i jedin raz onlajn.
Websajt	https://www.polyglotgathering.com/

Polyglot Gathering jest každoročny sbor poliglotov i ljubiteljev jezykov so vsego světu, ktory prohodi onlajn i offlajn. Sbor obyčno prohodi jedin raz v rok na živo i jedin raz v rok v formatu onlajn. Polyglot Gathering kombinuje črty konferencije i festivala.

Sbor jest otvorjeny za vsih ljubiteljev jezykov, i bez obzira na nazvu, ne jest povinno byti poliglotom, aby učestvovati.

V hodu sbora na proteženju několikyh dnev prohodet lekcije, praktične lekcije, igry i pěvanja, ktore sut sfokusovane na učenju jezykov i medžunarodnoj komunikaciji.

Ob organizaciji

Založitelji i glavni organizatori prvyh trěh sborov v 2014-2016 rokah byli Judith Meyer, Chuck Smith i Martin Sawitzki. Potom Polyglot Gathering prěměstil se iz němečskogo Berlina do slovačskoj Bratislavy i od togo momenta ogranizuje se nekomercialnoj organizacijeju "Education@Internet" (E@I), v ktoroj Peter Baláž jest glavny organizator vo glavě posvečenoj družiny poliglotov.

"Education@Internet" (E@I) jest medžunarodna družina, ktora provodi onlajn projekty, počevša svoju aktivnost v 1999. V 2005 roku, na zakladu uměnij družiny E@I byla legalno osnovana kak politično nevtralna i nedržavna mladežna organizacija.

E@I hče viděti svět v harmoniji i miru, v ktorom vsi gradžani mogut komunikovati vsesvětno s legkostju i bystrostju. Aktivnosti organizacije provodet se v jedinstvu s tutym viděnjem i s pomočju medžunarodnoj grupy dobrovoljcev, napriměr pri provodženju i poddrživanju projektov, ktore razprostranjajut značimost i prigodnost medžunarodnoj komunikacije bez prěgrad.

Medžuslovjansky jezyk na Polyglot Gathering

V razne lěta, na Polyglot Gathering byli sdělane několiko lekcij na medžuslovjanskom i o medžuslovjanskom jezyku.

V 2020 roku Rafał Daraš je dal lekciju "Kak početi učenje naslědnogo slovjanskogo jezyka?" na medžuslovjanskom jezyku.

V 2022 roku Michael Patscheke je dal lekciju "Interslavic – common language for Slavs & gateway to Slavic languages?" na anglijskom jezyku.

V 2023 roku Michał Swat je dal lekciju "Medžuslovjansky Pomočny Jezyk" na medžuslovjanskom.

V 2024 roku Vojtěch Merunka je dal lekciju "How we created the Interslavic zonal constructed language" na medžuslovjanskom.

Websajt sbora byl prěvedeny na medžuslovjansky jezyk v 2025 roku.