Wp/isv/Panteon

Panteon jest drěvny rimsky hram i od 609 goda N.E. jest katoličska crkov imenujema Bazilika Svetoj Marije i mučenikov. Nahodi se v Rimu, Italija i jest, može byti, najvyše znana i vlivna na razvoj arhitektury rotonda.

Panteon byl sbudovany na městu veče rannjego hrama, ktory byl nakazan do budovanja Markusom Vipsaniusom Agrippoju v času vlady Avgusta (27 g. prěd N.E. - 14 g. N.E.). Poslě kak prvonačelny budynok izgorěl, tutčasny byl naručen do budovanja imperatorom Hadrijanom. Data jego budovanja ne jest izvěstna, ibo Hadrijan rěšil povtorno vpisati prvonačelnu datu budovanja Agrippoju.

Budynok imaje kruglu formu, za izključenjem portika s vysokymi granitnymi korintskymi kolonami pod frontonom. Premovugolno prěddverje sjedinjaje portik s rotondoju, ktora nahodi se pod betonnoju kesonnoju kupoloju s centralnym otvorom (okulusom), obračenym do neba. Vyše dvoh tyseč lět poslě budovanja, do tutogo momenta to jest največša vo světu kupola iz neusiljenogo betona. Vysota od dola do okulusa i diametr vnutrnogo kruga sut jednakove i izměrjajut se 43 metrami.

Panteon jest jedno iz najlěpje shranivših se drěvnerimskyh budovanij, mnogo blagodareče tomu, že jim bezprěryvno posluživali se na proteženju vsej jego historije. Dnes to jest popularny turističny objekt. V 2013 godu jego posětilo vyše šesti milionov ljudij.