Jump to content

Wp/isv/Odnošenja medžu kotami i psami

From Wikimedia Incubator
< Wp | isv
Wp > isv > Odnošenja medžu kotami i psami

Koti i psi imajut različne vzajemodějan‍ja.[1] Prirodne instinkty oboh vidov sklanjajut do vražnogo poveden‍ja jednogo k drugomu, čto odbivaje se na razne kulturne izražen‍ja i frazeologizmy kako «žiti kako pes s kotom».[2] V občem zakladaje se, že koti i psi ne umějut mirno sužiti s soboju, osoblivo na maloj teritoriji. I zaisto bezdomni psi ubivajut bezdomnyh kotov.[3] Jednakože individualne životiny takože mogut iměti nevtralne ili daže prijateljske odnošen‍ja s soboju, osoblivo v uslovjah, kogda ljudi je vozpitali do neagresivnogo poveden‍ja i dobro dbajut za nje.[4]

Različne sistemy komunikacije

[edit | edit source]

Večinstvo životin imajut komunikacijne sistemy («jezyk životin»), sostoječe iz specialnyh socialnyh signalov, ktore mogut byti taktilne, hemične ili i ine (napr. pozy, dvižen‍ja, mimika). Te sistemy sut oprěděljene anatomičnymi osoblivostami i socialnoju organizacijeju životin, a takože fizičnymi i ekologičnymi uslovjami obsrědiny, v ktory one zarodili se.[5] Iz toj pričiny istnujut značne razliky medžu komunikacijnymi sistemami psov i kotov.

Kromě togo, razumne sposobnosti u kotovyh ne sut osnovane na socialnom intelektu, kako u stadnyh zvěrev, ale na smyslno-motoričnyh vlastnostah, potrěbnyh za pojedinno lovjen‍je.[6] V stadah psov jest hierarhična struktura s liderom stada. Koti v osnovnom lovet pojedinno. Ačekoli koti takože umějut tvoriti grupy, u njih nemaje sistemy osnovanoj na pokornosti v odnošen‍ju do lidera.[7]

Signaly i poveden‍ja, ktorymi koti i psi posluživajut se za komunikaciju medžu soboju, različajut se. To privodi k tomu, že jihne signaly agresije, straha, dominovan‍ja, družby i teritorialnoj prinaležnosti mogut mogut byti nepravilno razuměne drugymi vidami životin.[8] Lovečsky instinkt psov, a takože kotov, prinudžaje jih do prěslědovan‍ja malyh, izběgajučih životin.[9] Večinstvo kotov uběgaje od psov, ačekoli drugi syčet, nagybajut hrebet i zadavajut udary lapami s izpuščenymi nogtami.[9] Kako kot podrapaje ili gryze psa, poněkoji psi mogut v daljšem bojati se kotov.[10]

Jednakože koti i psi mogut iměti nevražne, a daže prijateljske odnošen‍ja s soboju. Kogda domašnje zvěri vozpitajut se zajedno od mladogo věka (ščeneta do jednogo goda, koteta do šesti měsecev), bystro razvivajut se medžu njimi prijateljske odnošen‍ja. Jihno poveden‍je stane fleksibilno, oni prisposobjajut se jedin k drugomu, i načinajut se učiti «inoživotny» jezyk.[11]

Iztočniky

[edit | edit source]
  1. ↑ Mikkel Becker (6 maja 2012). "Cats and dogs can live together — with some help". Today (na anglijskom). Data dostupa: 1 februara 2026.
  2. ↑ Aleksandra Kupras (22 septembra 2022). ""Żyć jak pies z kotem" - co oznacza to przysłowie?". wamiz.pl (na poljskom).
  3. ↑ Е.А. Ильинский; С.О. Ильинская (2006). "Собаки, как доминирующие хищники в экосистемах городов". Ветеринарная патология (na russkom) (2 (17)).
  4. ↑ Patrick Aquino (7 junija 2022). "Will My Cat and Dog Get Along?". Hartz (na anglijskom). Data dostupa: 1 februara 2026.
  5. ↑ В.А. Ясвин (12 aprilja 2004). "Межвидовая коммуникация Homo sapiens как предпосылка формирования субъективных отношений к различным животным". Этология.ру (na russkom). Data dostupa: 1 februara 2026.
  6. ↑ Михаил Петров. "Они все понимают. Как думают кошки, собаки и другие домашние животные". nauka.tass.ru (na russkom). Bylo arhivovano iz iztočnika 22 januara 2022. Data dostupa: 1 februara 2026.
  7. ↑ Екатерина Шутова (26 julija 2016). "Человек кошке не хозяин. Биолог о поведении кошек и собак". Газета.ру (na russkom). Data dostupa: 1 februara 2026.
  8. ↑ Stanley Coren (2 dekembra 2008). "17". Are Dogs and Cats Incompetable (na anglijskom). Simon and Schuster. str. 139–. ISBN 9781416593683.
  9. 1 2 Tracie Hotchner (3 novembra 2005). The Dog Bible: Everything Your Dog Wants You to Know (na anglijskom). Penguin Group US. str. 792–. ISBN 9781440623080.
  10. ↑ Pam Johnson-Bennett (27 novembra 2007). Starting from Scratch: How to Correct Behavior Problems in Your Adult Cat (na anglijskom). Penguin. str. 294–. ISBN 9781101201817.
  11. ↑ "Язык собак". Мир Животных. Data dostupa: 1 februara 2026.


Retrieved from "https://incubator.wikimedia.org/w/index.php?title=Wp/isv/Odnošenja_medžu_kotami_i_psami&oldid=6998678"