Wp/isv/Mongolsky črvjak smrti
Mongolsky črvjak smrti (mon.: олгой-хорхой) jest legendarny ogromny črvjak, ktory suglasno poněkojim žive v pustynji Gobi v Mongoliji. Stvor byl opisany kako tolsty črvjak, črveny kako krov, s dolžinoju 0,6 do 1,2 metra, ktory žive i dvigaje se pod pěskom. Městna nazva, olgoj-horhoj znači «velikojelitny črvjak», ibo govori se, že on izgledaje kako kravje jelito. Sut oprěděljene osoblive harakteristiky, ktore městni Mongoli mu pripisyvajut – na priklad, že uměje pljuvati žoltym jadom, ktory pri kontaktu jest smrtonosny, i že uměje ubiti od dalja.[1] V občem jednako stvor jest uvažany kriptozoologičnoju bytostju, a věsti o njim sut sporne ili nepotvrdžene.
V folkloru
Životinu prvy raz opisal amerikansky paleontolog Roy Chapman Andrews v knigě On the Trail of Ancient Man (1926 g.) na osnově informacije dobytoj od mongolskogo premier-ministra Damdinbazara, ktory tvrdil, že znaje někogo, ktory go uviděl. Andrews napisal, že
Nikto iz prisutnyh nikogda ne uviděl toj stvor, ale vsi silno věrili v jegovo istnovanje i opisali go podrobno. On imaje oblik kolbasy okolo dvoh stop dolžiny, ne imaje ni glavu ni nogy, a jest tako jadovity, že samo dotknutje uže znači momentalnu smrt. On žive v najbolje opustošenyh čestah pustynji Gobi, kamo my jesmo putovali.[2]
Pozdněje, rosijsky paleontolog i pisatelj fantastiky Ivan Jefremov i češsky kriptozoolog Ivan Mackerle organizovali ekspedicije do Mongolije, ale nikogda go ne našli, ačekoli uslyšeli od raznyh ljudij, že znajut někogo, ktory go uviděl. Sam Andrews ne věril, že istnuje, tvrdeči, že «za Mongolov on jest to, čto drakon jest za Kitajcev».[3] Možno zaključiti, že nemaje naučno věrodostojnyh dokazov na istnovanje mongolskogo črvjaka smrti. Někoji myslet, že on s obzirom na suhy klimat v istinnosti jest gad – može zmija ili beznogy jaščer.[4]
V popularnoj kulturě
Mongolsky črvjak smrti byl inspiracija za razne tvorby popularnoj kultury. Na njim sut bazovane graboidy v filmu Tremors («stresenja») (1990 g.), film Mongolian Death Worm (2010 g.) i ogromny črvjak v japonskoj mangě i anime Dandadan (od 2021 g.)
Iztočniky
- ↑ "Hledání smrtícího červa". Mackerle.cz (in ). Bylo arhivovano iz iztočnika 12 junija 2009. Data dostupa: 15 januara 2026.
- ↑ Andrews, Roy Chapman (1926). On the Trail of Ancient Man: a Narrative of the Field Work of the Central Asiatic Expeditions. New York, London: Knickerbocker Press. str. 103–104.
- ↑ Andrews, str. 103.
- ↑ Radford, Benjamin (21 junija 2014). "Mongolian Death Worm: Elusive Legend of the Gobi Desert". Live Science. Data dostupa: 15 januara 2026.